Food shortages in prisons :
বিভিন্ন উৎসৰ পৰা ঋণ লৈ ৰাজ্য চলোৱা বুলি সততে সমালোচিত হৈ অহা ড: হিমন্ত বিশ্ব শৰ্মা চৰকাৰ দেউলীয়া হোৱাৰ লক্ষণ ফুটি উঠিছে। একমাত্র ধনৰ অভাৱৰ বাবে ৰাজ্যৰ কাৰাগাৰসমূহত অচিৰে হাহাকাৰ সৃষ্টিৰ আশংকা প্ৰবল হৈছে। অভিযোগ অনুসৰি, কাৰাগাৰসমূহত কয়দীসকলৰ বাবে খাদ্য যোগান ধৰা ঠিকাদাৰসকলে ২০১৮ৰ পৰাই প্রাপ্য বিলৰ ধন লাভ কৰা নাই।
ফলত এই ঠিকাদাৰসকলে পাবলগীয়া ধনৰ পৰিমাণে পাহাৰ সদৃশ ৰূপ ধাৰণ কৰিছে। শেহতীয়াকৈ পোহৰলৈ অহা মতে, ২০১৮ৰ পৰা বিগত সাত বছৰত কাৰাগাৰসমূহত খাদ্য যোগান ধৰা ঠিকাদাৰসকলে চৰকাৰৰ পৰা কমেও ৯০ কোটি টকা পাবলৈ বাকী আছে। গতিকে অহা পহিলা আগষ্টৰ পৰা কাৰাগাৰসমূহৰ বন্দীসকলৰ বাবে খাদ্য যোগান নধৰাৰ হুংকাৰ দিছে ঠিকাদাৰসকলে।
অর্থাৎ আগন্তুক দুদিনৰ ভিতৰত এই সমস্যা সমাধান নহ’লে কাৰাগাৰসমূহত হাহাকাৰ পৰিৱেশ সৃষ্টিৰ আশংকা প্রকট হৈছে। সূত্রই জনোৱা মতে, নলবাৰী জিলাৰ কেন্দ্ৰীয় কাৰাগাৰসহ ৰাজ্যৰ ৩১ খন কাৰাগাৰৰ বিপৰীতে চৰকাৰে বাতৰি লিখা পর্যন্ত ঠিকাদাৰক কমেও ৯০ কোটি টকা মুকলি কৰি দিয়া নাই। ইয়াৰে ৫০ কোটি টকাৰ বিল ইতিমধ্যে খাদ্য যোগনীয়াৰসকলে সংশ্লিষ্ট বিভাগক দাখিল কৰিছে।
বিভাগীয় যুটীয়া সচিব ডি কে বোদ্ধাই এই ক্ষেত্রত বিধি পথালি দিয়া বুলি একাংশ ঠিকাদাৰে অভিযোগ উত্থাপন কৰিছে। আন এক অভিযোগ অনুসৰি বিভাগীয় কর্তৃপক্ষই নীতি-নিয়ম অনুসৰি, বিল প্রস্তুত নকৰাৰ বাবে বাকী ৪০ কোটি টকাৰ বাবে ঠিকাদাৰসকলে বিলেই দাখিল কৰিব পৰা নাই।
সূত্রই জনোৱা মতে, ৰাজ্যৰ আটাইকেইখন কাৰাগাৰৰ খাদ্য যোগানৰ বাবদ ৪০ কোটি টকাৰ প্ৰয়োজন হয় যদিও চলিত ২০২৫-২৬ বিত্তীয় বৰ্ষত চৰকাৰে মাথোঁ ১০ কোটি টকাহে আবণ্টন দিছে। ইয়াৰে ছয় কোটি টকাৰ বিল ঠিকাদাৰসকলে দাখিল কৰিছে যদিও এই বিলসমূহ কাৰাগাৰ মহা-পৰিদৰ্শকলৈ ওভতাই পঠোৱা হৈছে বুলি সূত্রই জনায়।
কাজেই খাদ্য যোগানদাতা ঠিকাদাৰসকলে মূৰে-কপালে হাত দিবলগীয়া পৰিস্থিতিৰ উদ্ভৱ হৈছে। এনেদৰে প্ৰাপ্য ধনৰ পৰা বঞ্চিত হোৱাৰ ক্ষোভত ঠিকাদাৰসকলে অহা পহিলা আগষ্টৰ পৰা কাৰাগাৰসমূহৰ কয়দীসকলৰ বাবে খাদ্য যোগান নধৰাৰ সিদ্ধান্ত গ্রহণ কৰিছে। ইতিমধ্যে এই কথা বিভাগীয় কর্তৃপক্ষক লিখিতভাৱে অৱগত কৰা হৈছে বুলি সূত্রই জনায়।
আনহাতে, খাদ্য যোগানকাৰী ঠিকাদাৰসকলৰ সন্থাই অভিযোগ কৰা অনুসৰি, জিলা কাৰাগাৰ তথা কেন্দ্ৰীয় কাৰাগাৰসমূহৰ পৰা বিভিন্ন পদ্ধতিৰ মাজেৰে কাৰাগাৰ মহাপৰিদৰ্শকলৈ যোৱা বিলসমূহ তেওঁৰ কাৰ্যালয়ত পৰি থকাৰ ফলত বছৰৰ পাছত বছৰ ধৰি খাদ্য যোগানধাৰীসকলে বিলৰ ধন নাপায়। গতিকে এই ক্ষেত্ৰত কাৰাগাৰ মহাপৰিদৰ্শকৰ লগতে বিভাগীয় কর্তৃপক্ষৰ ভূমিকাও সন্দেহজনক বুলি সন্থাই মন্তব্য কৰিছে।
সন্থাই প্রকাশ কৰা অনুসৰি কয়দীসকলক খাদ্য-সামগ্রী চাৰিটা গ্ৰুপৰ ভিত্তিত যোগান ধৰা হয়। ইয়াৰে ‘এ’ গ্রুপত চাউল, দাইল, গেছ আদি থাকে। আনহাতে, ‘বি’ গ্রুপত চাহ, চেনি, গাখীৰ, বিস্কুট আদি যোগান ধৰা হয়। তৃতীয়টো তথা ‘চি’ গ্রুপত কেঁচা শাক-পাচলি আৰু ‘ডি’ গ্ৰুপত মাছ-মাংস, কণী আদি যোগান ধৰে ঠিকাদাৰসকলে।