Tinsukia Zila Parishad :
তিনিচুকীয়া জিলা পৰিষদৰ সভাপতি, উপ-সভাপতিৰ বাচনি আজি আনুষ্ঠানিকভাৱে অনুষ্ঠিত হয় ৷ এই বাচনি অনুষ্ঠানত তিনিচুকীয়াৰ বিধায়ক সঞ্জয় কিষাণ, এগৰাকী বিজেপিৰ ৰাজ্যিক নেতা আৰু তিনিচুকীয়া জিলা সমিতিৰ বিষয়ববীয়া সকলৰ লগতে বহু বিজেপি কৰ্মী ৷
জিলা পৰিষদৰ সভাপতি হিচাপে পুৰণি পুখুৰী জিলা পৰিষদ সমষ্টিৰ পৰা বিজয়ী হোৱা ভাদেশ্বৰ মৰাণক সভাপতি হিচাপে বাচনি কৰে ৷ আনহাতে উপ-সভাপতিৰ পদটো মহিলাৰ বাবে সংৰক্ষিত হোৱাত গৰিষ্ঠ সংখ্যকৰ আপত্তিৰ পাছতো গুঁইজান জিলা পৰিষদ সমষ্টিৰ পৰা জয়ী হৈ অহা চিত্ৰলেখা দুৱৰা চুনাক উপ-সভাপতি হিচাপে বাচনি কৰে ৷
ইয়াকেলৈ তিনিচুকীয়া জিলা পৰিষদৰ মুঠ ২২ গৰাকী সদস্যৰ ভিতৰত ১৭ গৰাকীয়ে ক্ষোভ প্ৰকাশ কৰিছে ৷ উল্লেখ্য যে যোৱা ২৫ জুলাইত পঞ্চায়ত আৰু গ্ৰামোন্নয়ন মন্ত্ৰী ৰঞ্জিত দাস তিনিচুকীয়া ভ্ৰমণলৈ আহোতে জিলা পৰিষদৰ সমিতি বাচনিৰ এক সভাত তিনিচুকীয়া জিলা বিজেপিৰ কাৰ্যালয়ত এক বৈঠকত অংশ লৈছিল ৷ উক্ত বৈঠকত সভাপতি হিচাপে ভাদেশ্বৰ মৰাণক সবৰ্সন্মতিক্ৰমে প্ৰস্তাৱ দিছিল ৷ কিন্তু উপ-সভাপতিৰ পদটো যিহেতু মহিলাৰ বাবে সংৰক্ষিত আছিল সেইবাবে বিজয়ী হোৱা গৰাকীৰ ভিতৰত নিৰ্বাচনৰ বাবে গৰিষ্ঠ সংখ্যকে আহবান জনাইছিল ৷
কিন্তু বিভিন্ন কাৰণত নিৰ্বাচনৰ পৰিৱৰ্তে চিত্ৰলেখা দুৱৰা চুনাক উপ-সভাপতিৰ বাবে বাচনি কৰিবলৈ এটা পক্ষই হেঁচা প্ৰয়োগ কৰে ৷ সেয়ে বিজয়ী হোৱা ১৭ গৰাকী সদস্য-সদস্যাই স্বাক্ষৰ কৰি এই সন্দেহ প্ৰকাশ কৰি তিনিচুকীয়া জিলা পৰিষদৰ উপ-সভাপতি পদৰ বাচনিৰ সন্দৰ্ভত বিজেপিৰ ৰাজ্যিক সভাপতিলৈ এক পত্ৰ প্ৰেৰণ কৰিছিল ৷
এই পত্ৰত উল্লেখ কৰিছিল যে পঞ্চায়ত নিৰ্বাচনৰ অন্ত তিনিচুকীয়া জিলা পৰিষদত বিজেপিয়ে সুন্দৰ কৰ্মসূচী আৰু ৰাইজৰ আশীৰ্বাদত নিৰংকুশ সংখ্যাগৰিষ্ঠতা লাভৰ পিছত জিলা পৰিষদৰ সমিতি গঠনৰ বাচনি প্ৰক্ৰিয়া চলি আছে ৷ এই প্ৰক্ৰিয়াৰ চূড়ান্ত সিদ্ধান্ত ২৯ জুলাইত ল’বলৈ জিলা প্ৰশাসনে দিন ধাৰ্য কৰিছে ৷ বিশেষকৈ উপ-সভাপতি পদৰ বাবে জিলা পৰিষদৰ বিভিন্ন সমষ্টিৰ পৰা নিৰ্বাচিত বিজেপিৰ সদস্যৰ একমত প্ৰতিফলন কৰি এই বাচনি বিজেপিৰ পূৰ্ব পৰম্পৰা অক্ষুণ্ণ ৰাখি সৰ্বসন্মত মতদান প্ৰক্ৰিয়াৰে সূচাৰুপে সম্পন্ন কৰাৰ বাবে অনুৰোধ জনাইছিল ৷
কিন্তু দেখা গ’ল তেওঁলোকৰ আহবানক নেওচি বিভিন্ন প্ৰকাৰে চল চাতুৰি হেঁচা প্ৰয়োগ কৰি চিত্ৰলেখা দুৱাৰ চুনাক উপ-সভাপতি হিচাপে বাচনি কৰে ৷ অভিযোগ পোৱা মতে এই পদৰ বাবে জয়ী হৈ অহা আন চাৰিগৰাকী মহিলা সদস্যা ক্ৰমে হাপজান সমষ্টিৰ জেউতী মৰাণ, ডুমডুমা সমষ্টিৰ পাৰুমণি মহন্ত, টঙনা সমষ্টিৰ ৰশ্মিৰেখা দহোতীয়া আৰু কুণ্ডিল সমষ্টিৰ ৰূপালী গগৈয়ে মনোনয়ন পত্ৰ দিছিল ৷
কিন্তু অভিযোগ পোৱা মতে বিশেষকৈ বিধায়ক সঞ্জয় কিষাণে বিভিন্ন হেঁচা দি নিৰ্বাচন অনুষ্ঠিত কৰিবলৈ নিদিলে ৷ তেওঁলোকে এইয়া মুখ্যমন্ত্ৰীৰ নিৰ্দেশ বুলি সকলোৰে আপত্তি থকাৰ পাছতো নিৰ্বাচনী প্ৰক্ৰিয়ালৈ ন’গৈ চিত্ৰলেখা দুৱৰা চুনাক উপ-সভাপতিৰ বাবে বাচনি কৰে ৷
উল্লেখ্য যে জিলা সভাপতিয়ে জানিবলৈ দিয়া মতে মুখ্যমন্ত্ৰী গৰাকীয়ে কোৱা মতে যি সমষ্টিত বৰ্তমান বিধায়ক নাই সেই সমষ্টিৰ প্ৰাৰ্থীক গুৰুত্ব প্ৰদান কৰিবলৈ কোৱাৰ বাবে মাকুম বিধান সভা সমষ্টিৰ অন্তৰ্গত গুঁইজান জিলা পৰিষদৰ সদস্যাক উপ-সভাপতি হিচাপে বাচনি কৰিছে ৷ কিন্তু আজি প্ৰথম গঠন হোৱাৰ দিনাই গৰিষ্ঠ সংখ্যকে অসন্তোষ প্ৰকাশ কৰিছে ৷ সেয়ে ভৱিষ্যতে এই অসন্তোষে অন্য ৰূপ লোৱাৰ সম্ভাৱনাই অধিক ৷