Aycaa:
আকৌ এক নতুন সংগঠনৰ জন্ম I আদিবাসী চাহ জনগোষ্ঠীৰ যুৱক-ছাত্ৰ সকলক লৈ আদিবাসী যুৱ- ছাত্ৰ সন্থা অসম চমুকৈ আইছাৰ কেন্দ্ৰীয় সমিতি গঠন কৰা হয়। সংগঠনটি গঠনত আগভাগ লোৱা ব্যক্তি সকলে কয় যে ,আদিবাসী জাতিসমূহ যুগযুগ ধৰি অন্যায়, অত্যাচাৰ , শোষণ আৰু বঞ্চনাৰ বলি হৈ আহিছে, আদিবাসী জনগোষ্ঠীৰ মৌলিক অধিকাৰ, সাংস্কৃতিক গৰিমা আৰু সামাজিক ন্যায় দিনক দিনে হেৰাই গৈছিল। এই বিপৰ্যস্ত পৰিস্থিতিৰ অন্ত ঘটাবলৈ, নতুন যুগৰ শক্তিশালী নেতৃত্বৰ প্ৰয়োজন আছিল।
সেই মহান উদ্দেশ্যক আগত ৰাখি আজি ডিব্ৰুগড় জিলাৰ হাতীগড়বকপৰা অঞ্চলত “আদিবাসী যুৱ- ছাত্ৰ সন্থা, অসম (আইছা)”ৰ এক শক্তিশালী ৩২ জনীয়া কেন্দ্ৰীয় সমিতি গঠন কৰা হৈছে । এই নতুন সমিতিৰ সভাপতি হিচাপে নৃপেন মুণ্ডাক আৰু সাধাৰণ সম্পাদক ৰূপে ৰাজেশ কেৰকেটাক সৰ্বসন্মতভাবে নিৰ্বাচিত কৰা হৈছে বুলি জানিব পৰা গৈছে।
তেওঁলোকৰ নেতৃত্বত এই সংগঠনটিয়ে আদিবাসী জাতিৰ অধিকাৰ, মর্যাদা আৰু সামাজিক ন্যায়ৰ বাবে অক্লান্তভাৱে যুঁজ দিয়ে আগবাঢ়ি যাব বুলি জানিবলৈ দিছে। বহু সংগঠন আছে তথাপিও জনগোষ্ঠীটোৰ স্বাৰ্থত নিৰবচ্ছিন্ন আৰু আপোচবিহীনতাৰে মাত মতা সংগঠন নাই বুলিয়েই কব পাৰি,এই সংগঠনটোৰ নেতৃত্বই কেনেধৰনৰ কাম কৰে সেইয়া অনাগত দিনত লক্ষণীয় হ’ব ।