Narendra Modi:✒️বানাক্ৰান্ত পঞ্জাৱ ভ্ৰমণ কৰিব প্ৰধানমন্ত্ৰী নৰেন্দ্ৰ মোডীয়ে। অহা ন ছেপ্টেম্বৰত পঞ্জাৱৰ গুৰদাসপুৰত বানাক্ৰান্ত লোক আৰু কৃষকক সাক্ষাৎ কৰিব মোডীয়ে। সাম্প্ৰতিক অবিৰত বৰষুণত ডুব গৈছে উত্তৰ ভাৰত।
ইটোৰ পাছত সিটো আকস্মিক বানত বিধ্বস্ত হিমাচল প্ৰদেশ, উত্তৰাখণ্ড আৰু জম্মু-কাশ্মীৰ। বানত ডুব গৈছে পঞ্জাৱ আৰু দিল্লীও ।
পঞ্জাৱৰ বানপানীৰ ফলত হোৱা ক্ষয়-ক্ষতিৰ বিষয়ে আলোচনা কৰিব প্ৰধানমন্ত্ৰীয়ে। বৃদ্ধি পোৱা পানীৰ বাবে শস্যৰ ক্ষতিৰ পৰিসৰৰ বিষয়েও আলোচনা কৰিব।
বিজেপিৰ পঞ্জাৱ সংগঠনটোৱে নিজৰ এক্স হেণ্ডেলত লিখিছে, ‘অহা ন ছেপ্টেম্বৰত গুৰদাসপুৰলৈ আহিব প্ৰধানমন্ত্ৰী নৰেন্দ্ৰ মোডী।’ তেওঁ বানাক্ৰান্ত ভাই-ভনী আৰু কৃষকসকলক সাক্ষাৎ কৰিব। লগতে তেওঁলোকক সহায় কৰিবলৈও তেওঁ সকলো প্ৰচেষ্টা চলাব।’
প্ৰাপ্ত তথ্য অনুসৰি, কেন্দ্রীয় চৰকাৰে বানপানীৰ পাছত কৃষিভূমি বচাবলৈ সকলো ব্যৱস্থা গ্রহণ কৰিব৷ ইয়াৰ ভিতৰত তাৎক্ষণিক আৰু দীৰ্ঘম্যাদী দুয়োটা ব্যৱস্থা অন্তৰ্ভুক্ত হ’ব।
লগতে ৰাজ্যৰ সমন্বয়ত পুনৰ্বাসনৰ কাম কৰা হ’ব বুলিও অৱগত কৰা হৈছে। তথ্য অনুসৰি , শতুদ্ৰ আৰু ইৰাৱডীকে ধৰি অন্যান্য নদীৰ পাৰ বচাবলৈ তেওঁ বিশেষ গুৰুত্ব দিব।
পঞ্জাৱত বিগত ৩৭ বছৰত ইমান ভয়াৱহ বানপানী দেখা পোৱা নাই। ধাৰাবাহিকভাৱে হোৱা ধাৰাসাৰ বৰষুণৰ ফলত পঞ্জাৱৰ বৃহৎ অঞ্চল ডুব গৈছে।
দ্ৰুতগতিত বৃদ্ধি পাইছে মৃতকৰ সংখ্যা ।এই ভয়াৱহ পৰিস্থিতিত আপ চৰকাৰে পঞ্জাৱক ‘দুৰ্যোগ ৰাজ্য’ হিচাপে ঘোষণা কৰিছে।
পৰিস্থিতি ইমানেই বেয়া যে ভাৰতীয় সেনাৰ তিনিটা শাখাক উদ্ধাৰৰ বাবে মাতি অনা হৈছে। ৰাষ্ট্ৰীয় দুৰ্যোগ সঁহাৰি বাহিনীৰ ২৩টা দলে ৰাজ্যত উদ্ধাৰ অভিযান চলাই আছে। ইতিমধ্যে পঞ্জাৱত ৩৭ জন লোকৰ মৃত্যু হৈছে।