PM Modi Assam Visit:
দুদিনীয়া অসম ভ্রমণসূচীৰে আজি বিয়লি বিশেষ বিমানেৰে গুৱাহাটীত উপস্থিত হ’ব প্রধানমন্ত্রী নৰেন্দ্ৰ মোদী। সন্ধিয়া প্রধানমন্ত্রীয়ে ড:ভূপেন হাজৰিকাৰ জন্মশতবৰ্ষৰ এক কার্যসূচীত ভাগ ল’ব। খানাপাৰাৰ পশু চিকিৎসা বিজ্ঞান মহাবিদ্যালয় খেলপথাৰত অনুষ্ঠিত হ’বলগীয়া এই কাৰ্যসূচীত অসমৰ কনিষ্ঠৰ পৰা জ্যেষ্ঠলৈকে এহেজাৰ শিল্পীয়ে একেটা সুৰত ভাৰতৰত্ন ড° হাজৰিকাৰ ১৪টা গীত অংশ অংশ কৰি পৰিবেশন কৰিব। এই অনুষ্ঠানতে প্রধানমন্ত্রীয়ে ভাৰতীয় ৰিজার্ভ বেংকে প্রস্তুত কৰি উলিওৱা ড° ভূপেন হাজৰিকাৰ প্ৰতিচ্ছবি সম্বলিত এটি এশটকীয়া মুদ্রা উন্মোচন কৰাৰ লগতে সুধাকণ্ঠৰ এখন জীৱনী গ্রন্থও উন্মোচন কৰিব। ১৪ ছেপ্টেম্বৰত প্ৰধানমন্ত্ৰীয়ে মঙলদৈ আৰু নুমলীগড়ত দুখন বৃহৎ ৰাজহুৱা সভাত অংশগ্ৰহণ কৰিব। মঙলদৈৰ সভাখনত মোদীয়ে কে’বাটাও প্ৰকল্পৰ আধাৰশিলা স্থাপন কৰিব। বিয়লি নুমলীগড়ত উপস্থিত হৈ প্রধানমন্ত্রীয়ে নুমলীগড় শোধনাগাৰত স্থাপন কৰা বাঁহৰ পৰা ইথানল প্ৰস্তুত কৰা প্ৰথমটো শোধনাগাৰ উদ্বোধন কৰিব।
যদিও তিনিটা চৰকাৰী কাৰ্যসূচী লৈ প্রধানমন্ত্রী অসমলৈ আহিব, আগন্তুক বিধানসভা নিৰ্বাচনৰ বাবেও তেওঁৰ এই ভ্রমণ বিজেপিৰ বাবে গুৰুত্বপূৰ্ণ বিবেচিত হৈছে। দুয়োখন ৰাজহুৱা সভাতে বৃহৎ সংখ্যক লোকক সমৱেত কৰাৰ লক্ষ্য নির্ধাৰণ কৰিছে ৰাজ্য চৰকাৰ তথা ৰাজ্যিক বিজেপিয়ে। মঙলদৈৰ সভাখনলৈ উত্তৰ অসমৰ লগতে কামৰূপ, নলবাৰী জিলাৰ পৰাও দলীয় কর্মী-সমর্থক সমৱেত হ’ব। ইয়াৰ বাবে প্রয়োজনীয় ব্যৱস্থা বিজেপি দল আৰু চৰকাৰে গ্ৰহণ কৰিছে। একেদৰে নুমলীগড়ৰ ৰাজহুৱা সভাখনত সমগ্র পূব অসমৰ লগতে কাৰ্বি আংলং আৰু ডিমা হাছাও জিলাকো সামৰি লোৱা হৈছে। দুয়োখন সভাৰ জৰিয়তে বিজেপিয়ে অসমত দলৰ নিৰ্বাচনী তৎপৰতাক অধিক গতি দিয়াৰ লক্ষ্য লৈছে। দুয়োখন সভা সফল কৰি তুলিবলৈ মন্ত্রী-বিধায়কক ভাগে ভাগে দায়িত্ব দিয়া হৈছে।
ইপিনে, প্ৰধানমন্ত্ৰীৰ আগমনক লৈ নিৰাপত্তা ব্যৱস্থাও কটকটীয়া কৰি তোলা হৈছে। শুকুৰবাৰে গুৱাহাটী আৰক্ষী আয়ুক্ত কার্যালয়ে প্ৰধানমন্ত্ৰীৰ আগমনক লক্ষ্য কৰি কে’বাটাও নিষেধাজ্ঞা আৰোপ কৰে। আৰক্ষী আয়ুক্তৰ প্ৰশাসনিক উপ-আৰক্ষী আয়ুক্তই জাৰি কৰা এক নির্দেশনা অনুসৰি তৎকালে কাৰ্যকৰী হোৱাকৈ গুৱাহাটীত সকলো ধৰণৰ শোভাযাত্রা, সমদল, দৌৰ, মাৰাথন, ৱাকাথন আদি নিষিদ্ধ কৰা হৈছে। গুৱাহাটীৰ যাতায়াত ব্যৱস্থা স্বাভাৱিক কৰি ৰখাৰ কাৰণ দর্শাই এই নিষেধাজ্ঞা আৰোপ কৰা হৈছে। ইয়াৰ লগতে স্পষ্ট কৰি দিয়া হৈছে যে কোনোৱে যদি এই নিষেধাজ্ঞা ভংগ কৰে, তেন্তে ভাৰতীয় নাগৰিক সুৰক্ষা সংহিতাৰ ১৬৩ ধাৰা অনুসৰি আৰক্ষীয়ে কঠোৰ ব্যৱস্থা গ্রহণ কৰিব। ইয়াৰ উপৰি সমগ্ৰ গুৱাহাটীত আৰক্ষীয়ে কে’বা তৰপীয়া নিৰাপত্তা ব্যৱস্থা গঢ়ি তুলিছে। সন্দেহজনক যানবাহন আৰু স্থানত তালাচী পর্যন্ত চলোৱা হৈছে। চোৰাংচোৱা ব্যৱস্থাকো অধিক সক্ৰিয় কৰিবলৈ অসম আৰক্ষীৰ মুখ্য কাৰ্যালয়ত বিগত কে’বাদিনৰ পৰা ধাৰাবাহিক বৈঠক অনুষ্ঠিত হৈছে।
একেদৰে মঙলদৈ আৰু নুমলীগড়তো ব্যাপক সুৰক্ষা ব্যৱস্থা গ্রহণ কৰা হৈছে। মঙলদৈৰ সভাখনৰ বাবে কালি নিশা ১২ বজাৰ পৰা কাইলৈ নিশা ১২ বজালৈকে কাৰ্যকৰী হোৱাকৈ বাইহাটা চাৰিআলিৰ পৰা মিছন চাৰিআলিলৈকে ১৫ নম্বৰ ৰাষ্ট্ৰীয় ঘাইপথত সকলো ধৰণৰ গধুৰ বাণিজ্যিক বাহনৰ চলাচল নিষিদ্ধ কৰা হৈছে। একেদৰে চাৰিচকীয়া লঘু বাহনৰ ক্ষেত্ৰতো বিকল্প পথ নির্ধাৰণ কৰি দিয়া হৈছে। আনকি বিশেষ জৰুৰী নাথাকিলে সাধাৰণ ৰাইজকো এই পথেৰে যাতায়াত নকৰিবলৈ আৰক্ষীয়ে আহ্বান জনাইছে I