Christopher Columbus Jewish:✒️আমেৰিকা মহাদেশ ‘আৱিষ্কাৰ’ক খ্ৰীষ্ট’ফাৰ কলম্বাছ আচলতে কোন দেশৰ লোক আছিল?শেহতীয়াভাবে এই প্রশ্ন উত্থাপন হৈছে। কলম্বাছ দীর্ঘকাল ধৰি ইটালীৰ বুলিয়েই চলি থকা ধাৰণাক সম্প্রতি প্রত্যাহ্বান জনাইছে এজন বিশেষজ্ঞ নেতৃত্বাধীন এটা দলে। স্পেইনৰ গ্ৰেণাডা বিশ্ববিদ্যালয়ৰ বিজ্ঞানী তথা ফৰেনচিক বিশেষজ্ঞ এন্টনিঅ’ লৰেণ্টো নেতৃত্বাধীন এটা গৱেষকৰ দলে শেহতীয়াভাবে দাবী কৰিছে যে কলম্বাছ ইটালী বংশোদ্ভূত শোদ্ভূত নাছিল। বৰঞ্চ তেওঁ স্পেইনত জন্মলাভ কৰিছিল আৰু ইহুদী আছিল।
কে’বা দশক ধৰি চলোৱা গৱেষণাৰ অন্তত কলম্বাছ সম্পর্কত এই সিদ্ধান্তত উপনীত হোৱা বুলি গৱেষকৰ দলটোৱে দাবী কৰিছে। তেওঁলোকে দাবী কৰে যে কলম্বাছৰ পুত্ৰ ডিয়েগো আৰু ফার্ডিনাণ্ডৰ শৰীৰৰ অৱশেষৰ ডিএনএ পৰীক্ষা সম্পন্ন কৰা হৈছে। এই পৰীক্ষাৰ সময়ত গৱেষকৰ দলটোৱে ক্রম’জ’ম আৰু মাইট’কন্দ্রিয়াল ডিএনএ বিশ্লেষণ কৰে।
এই বিশ্লেষণত দেখা যায় যে তেওঁলোকৰ ডিএনএ অধিক সামঞ্জস্য আছে ইহুদীসকলৰ স’তেহে। উল্লেখ্য যে পর্তুগাল আৰু স্পেইনত ইহুদীসকল ছেফার্ডিক নামৰে পৰিচিত।
ফৰেনচিক বিশেষজ্ঞ লৰেণ্ট’বে দাবী কৰে যে স্পেনিছসকলৰ স’তে কলম্বাছৰ ডিএনএৰ সাদৃশ্য আছে। অৱশ্যে তেওঁৰ দাবী অনুসৰি কলম্বাছ ইটালীৰ নাছিল বুলি প্রতিষ্ঠা হোৱা নাই। উল্লেখ্য যে ১৪৯৮ৰ ২২ ফেব্ৰুৱাৰীত ইউৰোপত কলম্বাছে লিখিছিল যে তেওঁৰ সম্পত্তি ইটালীৰ জেনোয়াত আছে আৰু সেই সম্পত্তিৰ গৰাকী তেওঁৰ পৰিয়াল হ’ব।
তেওঁৰ জন্মও জেনোয়া চহৰতে বুলি উল্লেখ কৰি গৈছে। গতিকে অধিকাংশ ইতিহাসবিদে মতপোষণ কৰে যে কলম্বাছৰ জনবৃত্তান্তক লৈ চলি থকা সকলো বিতৰ্কৰ অন্ত পৰা উচিত। কাৰণ তেওঁ নিজেই কৈ গৈছে যে তেওঁৰ জন্ম ইটালীৰ জেনোয়া চহৰত হৈছিল।
উল্লেখ্য যে পঞ্চদশ শতিকাত স্পেইনৰ পৰা ইহুদীসকলক বিতাড়নৰ ধুম উঠিছিল। তেতিয়া বহু ইহুদী পৰিয়ালে ইটালীত আশ্ৰয় লৈছিল। তাৰ বহু পাছত কলম্বাছৰ জন্ম হয়। উল্লেখ্য যে চীন আৰু ভাৰত উপ-মহাদেশলৈ সাগৰীয় পথ আৱিষ্কাৰৰ উদ্দেশ্যে যাত্ৰা কৰাৰ সময়ত পথ ভুল কৰি কলম্বাছ আমেৰিকাত উপস্থিত হয়। সেই সূত্রে আমেৰিকা মহাদেশ আৱিষ্কৃত হয়।
অৱশ্যে কলম্বাছ ইহুদীহে দাবী কৰা গৱেষকৰ দলটোৱে ইয়াৰ সমর্থনত ডিএনএ পৰীক্ষাৰ তথ্যপাতি ৰাজহুৱা কৰা নাই বুলি একাংশই অভিযোগ উত্থাপন কৰিছে। আনহাতে, একাংশ ইতিহাসবিদৰ মতে ১৪৫১ৰ আগষ্টৰ পৰা অক্টোবৰৰ ভিতৰত ইটালীৰ জেনোয়া চহৰত কলম্বাছৰ জন্ম হয়। যৌৱন কালত তেওঁ পর্তুগালৰ লিছবনলৈ যায়। পূব এছিয়ালৈ সাগৰৰে এক চুটি জলপথ আৱিষ্কাৰৰ তেওঁৰ এক সপোন আছিল।এই সপোন পূৰণৰ উদ্দেশ্যে তেওঁ ধনী ব্যক্তিৰ পৃষ্ঠপোষকতা বিচাৰিছিল।
এই তথ্যতে অধিকাংশ ইতিহাসবিদে আস্থা ৰাখিছে। ইতিহাসবিদসকলৰ এই তথ্যক শেহতীয়াভাবে গ্রেণাডা বিশ্ববিদ্যালয়ৰ গৱেষকৰ দলটোৱে প্রত্যাহ্বান জনায়।