এজন অভিজ্ঞ বিজ্ঞানীয়ে যি কৃতিত্ব অৰ্জনৰ স্বপ্ন দেখে, যাৰ প্ৰয়োজন হয় আধুনিক গৱেষণাগাৰৰ। অথচ নিজৰ ঘৰত বহিয়েই তেনে এক কাম কৰিলে আমেৰিকাৰ ডালাছৰ এটি ১২ বছৰীয়া শিশুরে। এইডেন মেকমিলান নামৰ এই বিস্ময় বালকে নিজৰ ঘৰতে তৈয়াৰ কৰিলে এক পাৰমাণৱিক চিমনী।
এই ঘটনাই সমগ্ৰ বিশ্বৰ বিজ্ঞানীসকলৰ মাজত আলোড়ন তুলিছে। অসম্ভবক কিদৰে এই বিস্ময় বালকে সম্ভৱ কৰিলে বুলিও প্রশ্ন উঠিছে। একাধিক মার্কিন সংবাদ পত্রই জনাইছে যে ডালাছ ইন্ডিপেন্ডেন্ট স্কুল ডিস্ট্রিক্টৰ সপ্তম শ্ৰেণীৰ ছাত্ৰ এইডেন। তেওঁ নিজৰ পড়া আৰু খেলা কোঠাতে তৈয়াৰ কৰিছে এক নিউক্লিয়াৰ ফিউজন ৰিয়েক্টৰ।
বিগত চাৰি বছৰ ধৰি গৱেষণা চলাই শিশুটিয়ে সমগ্র বিশ্বকে অবাক কৰি তুলিছে। প্রাপ্ত তথ্য অনুসৰি, মাত্ৰ আঠ বছৰ বয়সতে এইডেনে এই প্রকল্পৰ কাম আৰম্ভ কৰে। প্ৰথম দুবছৰ এইডেনে নিউক্লিয়াৰ ফিজিক্স আৰু ফিউজনক লৈ পঢ়া-শুনা কৰে। ইয়াৰ পাছত এইডেনে সেই মেচিনৰ প্ৰাথমিক ৰূপ (ভাৰ্ছন) তৈয়াৰ কৰিবলৈ আৰম্ভ কৰে।
অৱশ্যে এইডেনৰ এই কামত তেওঁৰ সহকাৰীও আছিল। পৰমাণু চিমনী তৈয়াৰ কৰাত প্ৰতিভাৱান শিশুটিক সহায় কৰিছে ‘লঞ্চপেড’ নামৰ এক প্রতিষ্ঠানে। বিজ্ঞান আৰু প্রকৌশলত উচ্ছাভিলাষী গৱেষণাত শিক্ষার্থীসকলক সহায় কৰে এই প্রতিষ্ঠানে। ইয়াৰ পাছতো একাধিক বাধা অতিক্ৰম কৰি চাৰি বছৰৰ পৰিশ্ৰমক বাস্তৱত পৰিণত কৰে বিস্ময় বালকে।
এটা সময়ত যন্ত্ৰটোৱে নিউট্রনৰ উৎপাদন আৰম্ভকৰে। বিশ্বৰ সৰ্বকনিষ্ঠ ব্যক্তিৰূপে পৰমাণু চিমনী তৈয়াৰ কৰি গীনেছ ৱৰ্ল্ড ৰেকৰ্ডছত নাম তোলাৰ সপোন দেখিছে ১২ বছৰৰ এইডেনে। তেওঁ সাংবাদিকক জনাইছে যে এই কাম একেবাৰে সহজ নাছিল। কেতিয়াবা তৃপ্তিদায়ক, কেতিয়াবা আকৌ হতাশাজনক অভিজ্ঞতাৰ সন্মুখীন হৈছে এইডেন। আচল কথাটো হৈছে, এটি ১২ বছৰীয়া শিশুৰ কাণ্ডত বিজ্ঞানী মহলো অবাক হৈ পৰিছে।