CM Himanta Viswa Sarma:
ক্রমাৎ ৰহস্যঘন হৈ পৰিছে জুবিন গাৰ্গৰ হত্যাৰ তদন্ত। একে সময়তে তদন্তই পূর্ণাংগ ৰূপ পাব নে নাপায়, তাক লৈও অনিশ্চয়তাৰ সৃষ্টি হৈছে। জুবিনৰ মৃত্যুৰ সময়ত ঘটনাস্থলীত উপস্থিত থকা ছিংগাপুৰৰ প্রৱাসী অসমীয়াৰ আঠজনীয়া দলটোৰ আটাইৰে পৰা এতিয়ালৈকে তদন্তত সহযোগিতাৰ কোনো ইংগিত পোৱা নাই। কেবল ছিংগাপুৰৰ অসম এছ ‘চিয়েছনৰ লগত জড়িত অভিমন্যু তালুকদাৰ আৰু তন্ময় ফুকনৰ লগতহে অসম আৰক্ষীৰ যোগাযোগ হৈছে।
হত্যাৰ মূল গোচৰটোৰ তদন্ত এই কাৰণে অধিক ৰহস্যঘন হৈ পৰিছে যে ধৃত বাদ্যযন্ত্রী শেখৰজ্যোতি গোস্বামীয়ে জুবিনক বিহপান কৰাই হত্যাৰ অভিযোগ আনিছে। ইয়াৰ বিপৰীতে এই অভিযোগ উত্থাপিত হোৱা জুবিন গাৰ্গৰ মেনেজাৰ সিদ্ধার্থ শর্মাই এয়া ষড়যন্ত্র বুলি দাবী কৰিছে। যি নর্থ-ইষ্ট ফেষ্টিভেললৈ গৈ অসমীয়াৰ হিয়াৰ আমঠু শিল্পীগৰাকীয়ে অকাল মৃত্যুক সাবটিবলগীয়া হ’ল, তাৰ মূল উদ্যোক্তা শ্যামকানু মহন্তয়ো সিদ্ধার্থ শর্মাই লোৱা স্থিতিতে আছে।
লক্ষ্যণীয়ভারে মুখ্যমন্ত্রী ড: হিমন্ত বিশ্ব শৰ্মায়ো মন্তব্য কৰে যে শেখৰজ্যোতি গোস্বামীয়ে জুবিনক হত্যাৰ যি অভিযোগ আনিছে, সেয়া আইনগতভাবে প্রমাণিত নহয়। কাৰণ বহু সময়ত অভিযুক্তই নিজক বচাবৰ বাবেও এনে ধৰণৰ বক্তব্য আগবঢ়াব পাৰে। কাৰোবাক বদনাম কৰিবলৈয়ো এনে কথা ক’ব পাৰে। গতিকে তদন্ততহে আচল কথাবোৰ স্পষ্ট হ’ব বুলি মুখ্যমন্ত্রীয়ে কয়। সমান্তৰালভাৱে এছআইটিৰ দায়িত্বত থকা জ্যেষ্ঠ আৰক্ষী অধীক্ষক ৰ’জী কলিতাই কয় যে তদন্ত ভালকৈ চলি আছে। তদন্ত ব্যৱস্থাৰ ওপৰত সকলোকে বিশ্বাস ৰাখিবলৈ কলিতাই আহ্বান জনায়।
ইপিনে, সমগ্র বিষয়টোৰ তদন্তত এছআইটিয়ে সাক্ষ্য লোৱা লোকৰ সংখ্যা ক্রমে বিস্তাৰিত হৈছে। আজিও নতুনকৈ কে’বাজনো লোকৰ বক্তব্য গ্ৰহণ কৰা হয়। সেইসকলে বিভিন্ন সময়ত জুবিনৰ মৃত্যু সন্দৰ্ভত, অভিযুক্তৰ সন্দৰ্ভত নিজৰ মতামত প্রকাশ কৰিছিল। সামাজিক মাধ্যম অথবা আন আন মাধ্যমতো সেইসকলে তেনে বক্তব্য আগবঢ়াইছিল। তদুপৰি জুবিনৰ আন কে’বাজনো লোককো এছআইটিয়ে সাক্ষ্য গ্রহণৰ বাবে জাননী দিছে। তেনে লোকৰো সাক্ষ্য লোৱা হয়; কিন্তু এই সকলোৰে ওপৰত এই সময়ত এছআইটিৰ বাবে গুৰুত্বপূৰ্ণ হৈছে ছিংগাপুৰৰ প্ৰৱাসী অসমীয়া দলটো সাক্ষ্য দিবলৈ আহিব নে নাহে।
ছিংগাপুৰত থকা ভাৰতৰ উচ্চাযুক্তৰ জৰিয়তে যি আঠজনক এছআইটিয়ে তদন্তত সহযোগ তথা নিজৰ ভাষ্য প্রদান কৰিবলৈ জাননী জাৰি কৰিছে, সেইকেইজন হ’ল- তন্ময় ফুকন, অভিমন্যু তালুকদাৰ, দেৱজিৎ হাজৰিকা, ৰূপকমল কলিতা, সিদ্ধার্থ বৰা, পৰীক্ষিত শৰ্মা, বাজিদ আহমেদ আৰু ভাস্কৰ দত্ত। এইসকল ছিংগাপুৰৰ অসম এছ’চিয়েছনৰ লগত জড়িত। এই দলটোৱেই জুবিনক লগত লৈ য়ট পাৰ্টিৰ আয়োজন কৰিছিল। ইয়াৰে কে’বাজনো জুবিনৰ লগত সংঘটিত সমগ্ৰ ঘটনাৰ প্ৰত্যক্ষদর্শী। অভিমন্যু তালুকদাৰ অসম এছ’চিয়েছনৰ সভাপতি আৰু দেৱজিৎ হাজৰিকা সম্পাদক। অভিযোগ অনুসৰি, য়ট পাৰ্টিৰ মূল আয়োজক আছিল তন্ময় ফুকন। এছআইটিয়ে জাৰি কৰা জাননী অনুসৰি, কাইলৈ তেওঁলোক তদন্তকাৰী বিষয়াৰ ওচৰত হাজিৰ হোৱাৰ অন্তিম দিন।
আনহাতে, কালি নিশা অভিমন্যু তালুকদাৰৰ জ্যেষ্ঠ ভ্রাতৃ অনিৰুদ্ধ তালুকদাৰে কয় যে ছিংগাপুৰৰ কেতবোৰ আইনী বাধাৰ বাবেহে অভিমন্যু আহিব পৰা নাই। তালুকদাৰে লগতে কয়, ‘অসমৰ ল’ৰা অসমলৈ নাহি ক’লৈ যাব? সিয়ো তদন্তত সহযোগিতা কৰিব বুলি কৈছে। জুবিন আমাৰ আবেগ। আমাক সকলোকে ঘটনাৰ সঠিক তদন্ত লাগে। ছিংগাপুৰতো তদন্ত চলি থকা বুলি শুনিছো।’
# নন সাক্ষীৰ ভাষ্য গ্রহণ
চিআইডিৰ কাৰ্যালয়ত কালি পুনৰ জেৰাৰ সন্মুখীন আৰক্ষী বিষয়া তথা জুবিন গাৰ্গৰ সম্পৰ্কীয় ভ্রাতৃ সন্দীপন গার্গ। আজিও তদন্তকাৰী দলৰ আগত ভাষ্য প্রদান কৰে জুবিন গাৰ্গৰ দেহৰক্ষী নন্দেশ্বৰ বৰাই। ইপিনে, এছআইটিয়ে তলব কৰাত ভাষ্য প্রদানৰ বাবে দেওবাৰে নতুনকৈ উপস্থিত জুবিন গাৰ্গৰ এসময়ৰ সহ কণ্ঠশিল্পী মেঘনা বৰপূজাৰী আৰু বৈশালী মেধি। জুবিন গাৰ্গৰ দুই ঘনিষ্ঠ বাদ্যযন্ত্রী পার্থপ্রতিম গোস্বামী আৰু ৰাজা বৰুৱাৰো বক্তব্য আজি এছআইটিয়ে গ্রহণ কৰে। অভিনেত্রীদ্বয় সুস্মিতা কলিতা আৰু পম্পী মেচৰো ভাষ্য লোৱা হয়। ধৃত গায়িকা অমৃতপ্রভা মহন্তৰ ভ্ৰাতৃ নিশাদ মহন্তও আজি চিআইডিৰ কাৰ্যালয়ত উপস্থিত হয়।
এছআইটিয়ে তলব কৰাত কালি ভাষ্য প্রদান কৰে জুবিন গাৰ্গৰ গাড়ীচালক হিতেশ হালৈয়ে। এছআইটিৰ আগত ভাষ্য প্রদান কৰি ওলাই অহা বাদ্যযন্ত্ৰী ৰাজা বৰুৱাই কয় যে জুবিন গাৰ্গক তেওঁ কেতিয়া লগ পাইছিল, তেওঁ কি বজায়, কাৰোবাৰ বিষয়ে কিবা মন্তব্য আছে নেকি, আদি বিষয়ে সোধে। বৰুৱাই কয়, ‘যিহেতু মই ছিংগাপুৰলৈ যোৱা নাছিলো, তাত কি হৈছিল নাজানো; কিন্তু আমি ন্যায় বিচাৰো। গতিকে তদন্তত আমি সহায় কৰি যাম আৰু সেই কথা কৈছো।’ ইয়াৰ লগতে বৰুৱাই কয় যে বাদ্যযন্ত্র বজোৱাৰ বিনিময়ত তেওঁলোকক টকা দিছিল আৰু তাতেই তেওঁলোকৰ দায়িত্ব শেষ হৈছিল। তদুপৰি তেওঁ কয়, ‘জুবিনে নিজেই টকাৰ হিচাপ নিবিচাৰিছিল। গতিকে আমি আৰু কি টকাৰ হিচাপ বিচাৰি যাম। সিদ্ধার্থ শৰ্মাই অলপ দুর্ব্যৱহাৰ কৰে।’
ইপিনে, ন্যায়াধীশ সৌমিত্র শইকীয়াক লৈ গঠিত ন্যায়িক তদন্ত আয়োগৰ সন্মুখত আজি ভাষ্য প্রদান কৰে সাংবাদিক প্রণয় বৰদলৈ আৰু স্বাৰস্বত গোস্বামীয়ে। দুয়োজনে ইতিমধ্যে এছআইটিৰ আগত ভাষ্য প্রদান কৰিছিল। আনহাতে, দেওবাৰেও চিআইডিৰ কাৰ্যালয়ত উপস্থিত শ্যামকানু মহন্তৰ পত্নী অনিতা ডেকা মহন্ত। ইয়াৰ উপৰি শেখৰজ্যোতি গোস্বামীৰ পত্নী লনিমা গোস্বামীও আহে।
# ৰাজহুৱা নহয় মৰণোত্তৰ পৰীক্ষাৰ প্ৰতিবেদন
মুখ্যমন্ত্রী হিমন্ত বিশ্ব শর্মাই স্পষ্ট কৰি দিয়ে যে জুবিন গাৰ্গৰ মৰণোত্তৰ পৰীক্ষাৰ প্ৰতিবেদন চৰকাৰে ৰাজহুবা নকৰে। ৰাজহুৱা কৰিলে আদালতৰ বিচাৰ প্ৰক্ৰিয়াত প্রতিবেদনখনৰ মূল্য নাথাকিব বুলি মুখ্যমন্ত্রীয়ে যুক্তি দর্শায়। অৱশ্যে কোনো লোকে প্রতিবেদনখন চাব বিচাৰিলে চিআইডিৰ মহাপৰিদৰ্শকৰ লগত যোগাযোগ কৰিব পাৰিব। মুখ্যমন্ত্ৰীয়ে কয়, ‘লুৰীণজ্যোতি গগৈয়ে চাব বিচাৰিছে, তেওঁ চিআইডিৰ লগত যোগাযোগ কৰিলে চাব পাৰিব। মানুহৰ মনত যাতে সন্দেহ নাথাকে, তাৰ বাবেই চিআইডিৰ ওচৰলৈ গৈ প্রতিবেদনখন চোৱাৰ ব্যৱস্থা কৰা হৈছে। সেই বুলি আমি ৰাজহুৱাও কৰিব নোৱাৰো।’
উল্লেখ্য যে গুৱাহাটীত সম্পন্ন হোৱা প্ৰয়াত শিল্পীগৰাকীৰ মৰণোত্তৰ পৰীক্ষাৰ প্ৰতিবেদন নিয়ম অনুসৰি কালি পত্নী গৰিমা শইকীয়া গাৰ্গক অর্পণ কৰা হৈছিল; কিন্তু তেওঁ প্রতিবেদনখন ওভতাই দিয়ে। কাৰণ সেইখন ব্যক্তিগত সম্পত্তি নহয় বুলি তেওঁ কয়। ইয়াৰ লগতে তেওঁ কয় যে প্রতিবেদনত কি আছে, সেই কথা তেওঁ প্রকাশ নকৰে। চলি থকা তদন্ত প্রক্রিয়াত অসুবিধা নহ’বৰ বাবেই তথ্য ৰাজহুৱা কৰিবলৈ তেওঁ ইচ্ছুক নহয়।
#তদন্তক ৰাইজে ভাল পাইছে: মুখ্যমন্ত্ৰীৰ দাবী
মুখ্যমন্ত্রীয়ে এই দাবীও কৰে যে বৰ্তমান তদন্ত প্রক্রিয়া ভাল দিশেৰেই আগবাঢ়িছে। ৰাইজেও ভাল পাইছে। লগতে মুখ্যমন্ত্রীয়ে কয়, ‘আমি কাকো ক্ষমা কৰা নাই। যিয়ে ঘটনাত জড়িত, তাকে গ্ৰেপ্তাৰ কৰিছে চিআইডিয়ে। কাকো ভিআইপি বুলি গণ্য কৰা নাই। সকলোকে সমানে জেৰা কৰিছে চিআইডিয়ে। মই যিমান ৰাইজৰ লগত কথা পাতিছো, সকলোৱে তদন্তক লৈ যথেষ্ট সন্তুষ্ট।’ মুখ্যমন্ত্ৰীৰ এনে দাবীৰ বিপৰীতে বৰ্তমানৰ তদন্ত প্রক্রিয়াক লৈ অসন্তুষ্টি ব্যক্ত কৰি আহিছে বহু দল-সংগঠন আৰু ব্যক্তিয়ে। সেইসকলে চিবিআই তথা তেনে ধৰণৰ উচ্চ পৰ্যায়ৰ সংস্থাৰ দ্বাৰাহে জুবিনৰ মৃত্যুৰ তদন্ত দাবী জনাই আহিছে।
কালি মুখ্যমন্ত্রীয়ে লগতে কয় যে জাননী লাভ কৰা ছিংগাপুৰস্থ প্রবাসী অসমীয়াসকলে নির্দিষ্ট সময় তথা কাইলৈৰ ভিতৰত এছআইটিৰ আগত হাজিৰ নহ’লে কঠোৰ ব্যৱস্থা লোৱা হ’ব। সেই বুলি অসম আৰক্ষীয়ে ছিংগাপুৰলৈ গৈ কাকো ধৰি আনিব নোৱাৰে বুলিও মুখ্যমন্ত্ৰীয়ে সদৰী কৰে।