CID:✒️অসমৰ হিয়াৰ আমঠু জুবিন গাৰ্গৰ ৰহস্যজনক মৃত্যুৰ আজি ১৮ দিন অতিক্ৰম কৰাৰ পাছতো শিল্পীগৰাকীৰ মৃত্যুৰ দুখ আৰু ক্ষোভ তিলমাত্ৰও দূৰ হোৱা নাই লক্ষ লক্ষ অনুৰাগীৰ। জুবিনৰ সমাধিক্ষেত্ৰৰ পৰা আৰম্ভ কৰি গাঁৱে-ভূঞে, চুবুৰিয়ে চুবৰিয়ে সকলোতে ধূপৰ ধোঁৱাই আৱৰি ৰখা বন্তিশিখাৰ পোহৰে আলোকময় কৰি ৰাখিছে জুবিনৰ প্রতিচ্ছবি।
প্ৰাৰ্থনাৰ সুৰত বাজি আছে ‘মায়াবিনী ৰাতিৰ বুকুত, দেখা পালো তোমাৰ ছবি…..।’ সমান্তৰালভাৱে অব্যাহত আছে অসম আৰক্ষীৰ চিআইডিৰ দ্বাৰা গঠিত বিশেষ তদন্তকাৰী গোটৰ তদন্ত। যিমানে দিন বাগৰিছে, সিমানে এই ঘটনা অধিক ৰহস্যঘন হৈ পৰিছে। তাৰ মাজতে পোহৰলৈ আহিছে যে জুবিনৰ মৃত্যুৰ সময়ত তথা যোৱা ১৯ ছেপ্টেম্বৰত সুদূৰ ছিংগাপুৰৰ সাগৰৰ পৃষ্ঠত উটি-ভাহি থকা সেই বিশেষ য়টখনত উপস্থিত থকা ছিংগাপুৰৰ প্রবাসী অসমীয়াই লাভ কৰা নাই চিআইডিৰ জাননী।
উল্লেখ্য যে ৰাজ্যৰ মুখ্যমন্ত্রী ড° হিমন্ত বিশ্ব শর্মাই ঘটনাস্থলীত উপস্থিত থকা প্রবাসী অসমীয়াসকলক ছয় অক্টোবৰৰ ভিতৰত চিআইডিৰ কার্যালয়ত হাজিৰ হ’বলৈ সময় বান্ধি দিছিল আৰু য়টখনত থকা প্রতিজন প্রবাসী অসমীয়ালৈ হাজিৰ হ’বলৈ জাননী জাৰি কৰা বুলি সদৰী কৰিছিল যদিও য়টখনত উপস্থিত থকা নলবাৰীৰ তথা ছিংগাপুৰৰ প্রবাসী অসমীয়া বাজিদ ৰহমানে চিআইডিৰ পৰা তেনে কোনো জাননী লাভ কৰা নাই বুলি মন্তব্য কৰে ৰহমানৰ মাতৃয়ে।
যাক লৈ সম্প্ৰতি পুনৰ বহু প্ৰশ্নৰ উদ্ৰেক হৈছে। ৰহমানৰ মাতৃয়ে কয়, ‘মোৰ ল’ৰাৰ নামত এতিয়ালৈ কোনো কাগজ-পত্র যোৱা নাই।’ইফালে, ঘটনাৰ সন্দৰ্ভত ছিংগাপুৰবাসী অসম এছ’চিয়েছন তথা প্রবাসী অসমীয়াসকলৰ ওপৰত অসমবাসীৰ দৃষ্টি নিৱদ্ধ হৈ পৰিছে। বিশেষকৈ জুবিনৰ সমুদ্রকেলিৰ সময়ত যিসকল প্রবাসী অসমীয়া তাত উপস্থিত আছিল তেওঁলোকে কি দেখিছিল, কি জানিছিল সেয়া অসমবাসীয়ে প্রশ্ন তুলি আহিছে।
লক্ষ্যণীয় যে অসম এছ’চিয়েছন বা জুবিনক সমুদ্রকেলিৰ সময়ত সংগ দিয়া প্রবাসীসকলৰ ভিতৰত আছিল নলবাৰীৰ বাজিদ ৰহমান নামৰ যুৱকজন। তেওঁৰ ঘৰ নলবাৰীৰ ভকতপাৰাত। পেছাত তেওঁ এজন ইলেকট্রনিক ইঞ্জিনিয়াৰ। ১৬-১৭ বছৰ পূৰ্বৰ পৰা পত্নী-সন্তানসহ তেওঁ ছিংগাপুৰতে থাকে। তেওঁৰ পৰিয়ালে প্রকাশ কৰা মতে দুই-তিনি বছৰৰ মূৰত এবাৰ ঘৰলৈ আহে আৰু কেইদিনমান থাকি গুচি যায়। অৱশ্যে সঘনে পুত্ৰৰ লগত টেলিফোনিক বার্তালাপ হয় বুলি রাজেদৰ পিতৃ-মাতৃয়ে প্রকাশ কৰিছে।
আনহাতে, অসম এছ’চিয়েছন বা ছিংগাপুৰৰ প্রবাসী অসমীয়াসকলে যিয়ে যি জানে বা দেখিছে সেয়া অসমলৈ আহি ক’ব লাগে বুলি বাজেদ পিতৃয়ে মন্তব্য কৰিছে। লগতে তেওঁ জুবিনৰ মৃত্যুৰ ন্যায় লাগে বুলি দাবী কৰি ‘দৈনিক অগ্রদূত’ৰ আগত কয়, ‘ছিংগাপুৰ অসম এছ’চিয়েছনত যিসকল আছে বা ছিংগাপুৰৰ প্রবাসী অসমীয়াসকলে যি জানে আৰু যি দেখিছে সেয়া অসমলৈ আহি ক’ব লাগে। আমাৰ এটাই ল’ৰা আৰু তাৰ লগত ফোনত কথা হৈ থাকো। লগতে জুবিনৰ মৃত্যুৰ ন্যায় লাগে, আমি ন্যায় বিচাৰো।’
তেওঁ পুনৰ কয়, ‘মই মোৰ ল’ৰাকো আহ্বান জনাইছো যে যি দেখিছে, যি জানে সেয়া অসমলৈ আহি ক’ব লাগে।’ একেদৰে ৱাজিদৰ মাতৃয়ে পুত্ৰৰ লগত হোৱা কথা-বতৰাৰ উদ্ধৃতি দি কয়, ‘তাত জুবিনে কৈছিল যে তেওঁ অলপ ফুৰিব। তেতিয়া সিহঁতে (প্রবাসী অসমীয়া) ভালেই পালে। কেবল জুবিনেই নহয়, অসমৰ পৰা যিসকল শিল্পী তালৈ যায় বা কোনোবা মন্ত্রী গ’লে ছিংগাপুৰৰ অসমীয়া মানুহখিনিয়ে এবাৰ দেখা কৰে। জুবিনে ফুৰিম বুলি কোৱাত সিহঁতৰ কোনোবা এজনে হেনো য়টখন বুক কৰিছিল। তেনেকৈ গৈ সিহঁতে ধুনীয়াকৈ ফুৰিছিল। তাৰ পাছত জুবিন যেতিয়া পানীত নামিলে, সিহঁতিও পানীত নামিছে। জুবিনৰ লগত ইয়াৰ পৰা যিসকল গৈছিল, তেওঁলোকো পানীত নামিছে। ছিংগাপুৰৰ প্রবাসী অসমীয়া কেইজনে কৈছেও যে যদি অসুখ হৈছে পানীত কিয় নামিব দিছে। তেওঁলোকে নিজেও নামিছে আৰু জুবিনকো নমাই দিছে।’
যুৱকজনৰ মাতৃয়ে লগতে কয়, ‘মোৰ ল’ৰাই কৈছে যে চাৰি-পাঁচ বছৰত এবাৰ ঘৰলৈ যাওঁ, আমিতো গম নাপাওঁ, কাৰ কি অসুখ হৈছে। সেয়ে সিহঁতৰ তথা প্রবাসী অসমীয়াসকলৰ সেইটোৱেই খং যে লগত যোৱাকেইজনে জুবিনক কিয় পানীত নামিবলৈ দিলে? এই ঘটনাত প্রবাসী অসমীয়াসকলেও ন্যায় বিচাৰিছে। সিহঁতে কৈছে আমাক ন্যায় লাগে। অসম এছ’চিয়েছনৰ অভিমন্যুৰ লগত যোগাযোগ চলি আছে। কিছুমানৰ নামত কাগজ গৈছে যদিও মোৰ ল’ৰালৈ যোৱা নাই। গ’লে সি পূর্ণ সহযোগ কৰিব; কাৰণ সিহঁতে জুবিনক আগতেও পাইছে আৰু আগতেও জুবিনক সংগ দিছে।’