Kokrajhar:✒️কোকৰাঝাৰত বুধবাৰে নিশা সংঘটিত বোমা বিস্ফোৰণৰ আঁৰত কোন? কি উদ্দেশ্যে আৰু কোনে এই বিস্ফোৰণ ঘটালে? পুনৰ বিটিচি অস্থিৰ কৰি তোলাৰ পৰিকল্পনা ৰচা হৈছে নেকি? সুদীর্ঘ সময় অশান্ত হৈ থকাৰ পাছত শান্তিৰ বাটত খোজকঢ়া বিটিচিক পুনৰ অশান্ত কৰিবলৈ বুধবাৰে নিশা কোকৰাঝাৰ-ছালেকাটি ৰেল স্টেছনৰ মাজৰ শিঙিমাৰী গাঁৱৰ ৰেলপথত এটা শক্তিশালী আইইডি বিস্ফোৰণৰ ঘটনাই এনে বহু প্ৰশ্নৰ অৱতাৰণা কৰিছে।
আৰক্ষী সূত্রই জনোৱা মতে, নিশা প্রায় ১২-৫০ বজাত উজনিমুৱা মালবাহী ৰেল এখন পাৰ হৈ যোৱাৰ পাছতে এটা শক্তিশালী আইইডি বিস্ফোৰণৰ ফলত কথমপি ৰেলখন বাগৰি নপৰিল যদিও প্রচণ্ড শক্তিৰ ফলত কিছুদূৰ যোৱাৰ পাছত ৰেলখন ৰৈ যায়। এই ঘটনাৰ কিছু সময়ৰ পাছতে উজনিমুৱা আন এখন কয়লা কঢ়িওবা মালবাহী ৰেল কোকৰাঝাৰ ষ্টেছনত বখাই দিয়া হয়।
উচ্চ প্রাবল্যৰ আইইডি বিস্ফোৰণৰ ফলত মাজনিশা সমগ্র অঞ্চলটো কঁপি উঠাত এক তীব্র আতংকৰ পৰিৱেশৰ সৃষ্টি হয়। দীর্ঘদিনৰ মূৰত এনে উচ্চ প্রাবল্যৰ বিস্ফোৰণৰ শব্দত সমগ্ৰ কোকৰাঝাৰ কঁপি উঠাৰ ফলত স্বাভাৱিকতে অতীতৰ ভয়াৱহ স্মৃতি সোঁৱৰি পুনৰবাৰ ভীতি বিহ্বল হৈছে ৰাইজ। প্রচণ্ড শব্দৰ সৃষ্টি কৰা বিস্ফোৰণ ইমানেই ভয়াৱহ আছিল যে ৰেলপথৰ প্ৰায় দুফুট অংশ ছিঙি দূৰলৈ ওফৰি যায়।
এই পর্যন্ত ৰেলপথৰ এই অংশটো বিচাৰি পোৱা নাই। ফলত বহু দূৰলৈ ওফৰি যোৱা বুলি সন্দেহ কৰা হৈছে। তদুপৰি বিস্ফোৰণৰ ফলত দাঁতিকাষৰীয়া অঞ্চলত ভূমিকম্প সদৃশ কম্পনৰ সৃষ্টি হয়। তদুপৰি বিদ্যুৎ পৰিবাহী তাঁবো ছিঙি যায়। অৱশ্যে দুর্ঘটনাটোত দৈবক্রমে কোনো লোক হতাহত নহ’ল আৰু মালবাহী বেলখন বিশেষ ক্ষতি নোহোৱাকৈ ৰক্ষা পৰে।
ছিন্ন-ভিন্ন ৰেলপথঃ ঘন জোপোহাৰ আঁৰত লুকাই আছিল সন্দেহজনক উগ্রপন্থী
আৰক্ষীয়ে লাভ কৰা তথ্য অনুসৰি ৰেল লাইনৰ সমীপৰ ঘন জংঘলত লুকাই আছিল সন্দেহজনক উগ্রপন্থী। মাজনিশা শিঙিমাৰী ৰেলআলিত সংস্থাপন কৰা আইইডি বিস্ফোৰণৰ ফলত ৰেলপথ ছিন্ন-ভিন্ন হোৱাই নহয়, তাৰ তলত পাৰি থোৱা চিমেণ্টৰ খুঁটাসমূহো ছিন্ন-ভিন্ন হয়।
মনকৰিবলগীয়া যে বিদ্যুৎ পৰিবাহী তাঁৰ ছিঙি যোৱাৰ বাবেই ঘটনাস্থলীৰ পৰা সামান্য নিলগত মালবাহী ৰেলখন ৰৈ যায়। সূত্ৰত প্রকাশ যে সন্দেহজনক উগ্রপন্থীয়ে ঘন জংঘলৰ আঁৰতে থাকি বিস্ফোৰণ সংঘটিত কৰে। আৰক্ষীয়ে ধাৰণা কৰে যে ৰেলখন বগৰোৱাৰ উদ্দেশ্যৰে বেলআলিত আইইডি সংস্থাপন কৰা হৈছিল আৰু বিম’ট কন্ট্র’লৰে বিস্ফোৰণ সংঘটিত কৰা হৈছিল।
আৰক্ষীৰ সন্দেহ অনুসৰি ৰেলআলিৰ পৰা ৩০-৪০ মিটাৰ নিলগৰ ঘন জংঘলত লুকাই থকা সন্দেহজনক উগ্রপন্থীয়ে বেল চলাচলৰ সঠিক স্থান অনুমান কৰিব নোৱাৰিলে আৰু ৰেল অহাৰ লগে লগে অনুমানতে বোমা বিস্ফোৰণ ঘটোৱাৰ বাবেই হয়তো মালবাহী ৰেলখন ৰক্ষা পৰিল। এক ভয়ংকৰ দুৰ্যোগৰ পৰা মালবাহী ৰেলখন ৰক্ষা পৰে যদিও বিস্ফোৰণৰ ফলত ৰেলৰ চলাচল ব্যাহত হয়। অৱশ্যে কালি পুৱা ৯-৩০ বজাৰ পৰা ৰেলৰ চলাচল পুনৰ স্বাভাবিক হয়। বেল বিভাগে যুদ্ধকালীন তৎপৰতাৰে ৰেলপথসমূহ মেৰামতি কৰা বুলি প্রকাশ কৰিছে।
বিকট শব্দ আৰু প্ৰচণ্ড জোঁকাৰণিত আতংকিত স্থানীয় বাসিন্দা
মাজনিশা হঠাতে বিকট শব্দত সাৰ পাই উঠে স্থানীয় বাসিন্দা। ইয়াৰ লগে লগে পূৰ্বৰ বিস্ফোৰণৰ ভয়াৱহতা মনলৈ আহে আৰু স্বাভাৱিকতে আতংকিত ৰাইজৰ মাজত হুৱা-দুৱা লাগে। উল্লেখ্য বিগত সময়ছোৱাত কেন্দ্ৰ আৰু ৰাজ্য চৰকাৰে বিটিচিলৈ শান্তিৰ কপৌ ওভতাই অনা বুলি বাৰম্বাৰ দাবী কৰি অহাৰ সময়তে মাজনিশা সংঘটিত বিস্ফোৰণে আৰক্ষীৰ ব্যর্থতা উদঙালে বুলি স্থানীয় ৰাইজে ক্ষোভ প্রকাশ কৰিছে।
এই বিস্ফোৰণ ইমানে শক্তিশালী আছিল যে দুই কিলোমিটাৰ ব্যাসার্ধৰ অঞ্চলত তীব্ৰ জোঁকাৰণিৰ সৃষ্টি কৰাৰ লগতে ছয়-সাত কিলোমিটাৰ দূৰৰ ৰাইজে প্রচণ্ড শব্দ শুনে। শিঙিমাৰী গাঁৱৰ ৰেল ক্ৰছিঙৰ পৰা মাত্র তিনিশ কিলোমিটাৰ দূৰত্বত ঘটনা সংঘটিত হোৱাত ক্ৰছিঙৰ দায়িত্বত থকা ৰেল বিভাগৰ কর্মচাৰীসকলো আতংকিত হয়। তেওঁলোকে তাৎক্ষণিকভাবে আৰক্ষীক খবৰ দিয়ে আৰু আৰক্ষীৰ দল ঘটনাস্থলীত উপস্থিত হয়। ইয়াৰ কিছু সময় পাছতে আলিপুৰ ৰেলৱে ডিভিজনৰ কৰ্মচাৰী উপস্থিত হৈ ৰেলআলি মেৰামতিত ব্যস্ত হয়। ঘটনা সংঘটিত হোৱাৰ পাছত প্রায় ছঘণ্টা ব্যাহত হয় বেল সেৱা। বিভিন্ন ষ্টেছনত ঘণ্টাৰ পাছত ঘণ্টা বেল বখাই থোৱাত যাত্ৰীসকলৰ মাজত হাহাকাৰৰ সৃষ্টি হয়।
এই বিস্ফোৰণ ইমানে শক্তিশালী আছিল যে দুফুট ৰেলপথৰ টুকুৰা এটা বহু দূৰলৈ ছিটিকি যায় আৰু ৰেলৰ শিপাৰ ছিন্ন-ভিন্ন হয়। ঘটনাস্থলীত আনহাতে উপস্থিত হয় আৰক্ষী সঞ্চালক প্রধান হৰমীত সিং, বিটিচিৰ দায়িত্বত থকা আৰক্ষী-মহাপৰিদৰ্শক বিবেক ৰাজ সিং। ৰেলৱে আৰক্ষী বাহিনী (আৰপিএফ) ৰ জ্যেষ্ঠ আৰক্ষী অধীক্ষক প্রাণজিৎ বৰা, জিলা আৰক্ষী অধীক্ষক পুষ্পৰাজ সিং, স্থানীয় বিধায়ক লৰেন্স ইছলাৰী আদি। আৰক্ষীৰ স্নিফাৰ ডগৰে তদন্ত আৰম্ভ কৰে। ঘটনাস্থীত উপস্থিত হোৱা আইজিপি সিঙে বিস্ফোৰণস্থলী পর্যবেক্ষণ কৰি তদন্তৰ পাছতে ক’ব পৰা যাব বুলি সাংবাদিকক কয়।
ঘটনাস্থলীত মানৱ আৰু কাৰিকৰী দিশৰ তথ্য লাভঃ ডিজিপি
পুৱাৰ পৰা ১১-৩০ বজাত ঘটনাস্থলীত উপস্থিত হোৱা আৰক্ষী সঞ্চালক প্রধান সিঙে ঘটনাস্থলী পৰিদৰ্শনৰ অন্তত চৰাইখোলাৰ সপ্তম আৰক্ষী বেটেলিয়নৰ মুখ্য কাৰ্যালয়ৰ শীৰ্ষ আৰক্ষী বিষয়া ৰেল বিষয়াৰ স’তে বৈঠকত মিলিত হয়। ডিজিপি সিঙে সংবাদ মাধ্যমক কয় যে তদন্তত সকলো কথা ওলাই পৰিব আৰু শীঘ্ৰে ধৰা পৰিব দুষ্কৃতিকাৰী।তেওঁ তদন্ত প্রক্রিয়া কিদৰে আগবঢ়াব লাগিব সেই নির্দেশনা দিয়া বুলি আৰক্ষীয়ে সদৰী কৰে।
তেওঁ কয়, ‘এইটো সন্দেহজনক বিস্ফোৰণ যেন লাগিছে। ফৰেনচিক বিশেষজ্ঞই ইতিমধ্যে নমুনা সংগ্রহ কৰিছে। কিছু বিস্ফোৰক সামগ্রী সংগ্ৰহ কৰা হৈছে।
ইতিমধ্যে তদন্ত আৰম্ভ হৈছে আৰু উদ্ধাৰ হোৱা বিস্ফোৰক সামগ্ৰীৰ দ্বাৰা অতি সোনকালে দুষ্কৃতিকাৰী ধৰা পৰিব।
ঘটনাৰ আঁৰত নিশ্চয় উদ্দেশ্য আছে: দেৰহাছৎ বসুমতাৰী
ইপিনে, শিঙিমাৰী বিস্ফোৰণস্থলীত উপস্থিত হয় স্থানীয় বিধায়ক তথা ইউপিপিএলৰ লৰেন্স ইছলাৰী, সাধাৰণ সম্পাদক ৰাজু নাৰ্জাৰী আদি। ইছলাৰীয়ে এই ঘটনাত তীব্র গৰিহণা প্রকাশ কৰি কয় যে যি সময়ত শান্তিৰ বিটিআৰ গঢ়িবলৈ সকলোরে প্রচেষ্টা কৰি আছে সেই সময়ত এনে ঘটনা দুর্ভাগ্যজনক। আনহাতে, বিপিএফৰ জ্যেষ্ঠ নেতা তথা কাৰ্যবাহী সদস্যই দেৰহাছাৎ বসুমতাৰীয়ে সংবাদমেলত এই ঘটনাৰ গৰিহণা দি আঁৰত থকা ব্যক্তিসকলক চিনাক্ত কৰি উচিত ব্যৱস্থা গ্ৰহণৰ দাবী জনায়। যাত্ৰীৰ জীৱনৰ স’তে জড়িত বেলপথত এনে ঘটনা উচিত হোৱা নাই বুলি তেওঁ কয়। বসুমতাৰীয়ে কয় যে বোমা বিস্ফোৰণৰ আঁৰত নিশ্চয় কিবা উদ্দেশ্য আছে। ইয়াৰ প্ৰভাৱ কেৱল বিটিচিতে নহয়, গোটেই অসমতে পৰিব। অসমক অশান্ত কৰাৰ পৰিকল্পনা কৰিয়ে বিস্ফোৰণ ঘটোৱা বুলি সন্দেহ প্রকাশ কৰে বসুমতাৰীয়ে।
গৰিহণা এবছুৰ
বিস্ফোৰণৰ ঘটনাক তীব্র গৰিহণা দি এবছু সভাপতি দ্বীপেন বড়োরে কয়, ‘এনে ধৰণৰ হিংসা কাপুৰুষালিৰ নামান্তৰ। দুষ্কৃতিকাৰীৰ এনে অমানৱীয় আৰু বৰ্বৰ কাণ্ড শান্তি, প্রগতি আৰু সুৰক্ষাৰ ওপৰত প্ৰত্যক্ষ আক্রমণ। যিকোনো প্ৰকাৰে সংঘটিত হোৱা হিংসাই গণতন্ত্র, মানৱতা আৰু বড়োলেণ্ড অঞ্চলৰ শান্তিময় পৰিস্থিতি বিনষ্ট কৰিব।’ বোমা বিস্ফোৰণৰ দৰে জঘন্য কাণ্ডৰ আঁৰৰ দোষীক অতি সোনকালে কৰায়ত্ত কৰি কঠোৰ শাস্তি দিবলৈ এবছৱে দাবী জনাইছে।
উল্লেখ্য যে কোকৰাঝাৰ জিলাৰ মাজেৰে পাৰ হৈ যোৱা ৰেল লাইনত বিগত সময়ছোৱাত কে’বাবাৰো ভয়ংকৰ ঘটনা সংঘটিত হৈছে আৰু বহু যাত্রী নিহত হৈছে। চেঁচাপানী আৰু শিঙিমাৰী অঞ্চলৰ ৰেলপথ অতি স্পর্শকাতৰ বুলি বিবেচিত যদিও ৰেল বিভাগে পর্যাপ্ত টহল নিদিয়াৰ বাবে বাৰে বাৰে এনে ঘটনা সংঘটিত হোৱা বুলি অভিযোগ উত্থাপিত হৈছে।
ৰেলযাত্ৰীৰ সুৰক্ষাৰ প্রতি পিঠি দিয়া ৰেল বিভাগ আৰু আৰক্ষীৰ অৱহেলাৰ অভিযোগ কৰিছে ৰাইজে। প্রশ্ন উঠিছে যে শান্তি স্থাপন হোৱা বুলি দাবী কৰা বিটিচিত কোনে আৰু কিয় এই ঘটনা সংঘটিত কৰিলে? বিটিচি অস্থিৰ কৰি তোলাৰ পৰিকল্পনা আছে নেকি কাৰোবাৰ?
শান্তিৰ পৰিৱেশৰ মাজত অশান্তি বিয়পোৱাৰ চেষ্টা কৰাসকল কোন? হাগ্রামা মহিলাৰী নেতৃত্বাধীন বিপিএফ পুনৰ শাসনলৈ অহাৰ পাছতে বিটিচি অশান্ত কৰাৰ চেষ্টা কৰা হৈছে নেকি বুলিও বিভিন্নজনে প্রশ্ন উত্থাপন কৰিছে।
মাওবাদী জড়িত নেকি?
ইপিনে, কালি পুৱতি নিশা সংঘটিত আইইডি বিস্ফোৰণক লৈ মুখ্যমন্ত্রী ড° হিমন্ত বিশ্ব শর্মাই কয় যে এজন লক’ পাইলটৰ তৎপৰতাৰ বাবেই এক ভয়ংকৰ দুৰ্ঘটনাৰ পৰা সকলো ৰক্ষা পৰে। যদিহে লক’ পাইলটজনে ঘটনাটো দেখা নাপালেহেঁতেন, তেন্তে বহুত বেয়া খবৰ পালোহেঁতেন। ইপিনে, এই ঘটনাত কোন জড়িত, তাৰ অনুসন্ধান অব্যাহত আছে। ইয়াৰ মাজতে এজন বিশেষ লোকক আৰক্ষীয়ে গ্ৰপ্তাৰ কৰা বুলি মুখ্যমন্ত্রীয়ে সদৰী কৰে। ড° শৰ্মাই কয়, ‘বিশেষ সেই লোকজনৰ বিৰুদ্ধে অসম আৰু ঝাৰখণ্ডত কে’বাটাও গোচৰ ৰুজু হৈ আছে।’ অৱশ্যে লোকজন কোনো উগ্রপন্থী সংগঠনৰ লগত জড়িত হয়নে নহয়, সেয়া সদৰী কৰাৰ পৰা মুখ্যমন্ত্রী বিৰত থাকে। ইয়াৰ বিপৰীতে আৰক্ষী সূত্ৰই সদৰী কৰা অনুসৰি, লোকজন মাওবাদী সংগঠনৰ লগত জড়িত।