Hydro power plant:✒️সকলো আন্দোলন, প্রতিবাদ ওফৰাই অৱশেষত বিদ্যুৎ উৎপাদনৰ টার্বাইন ঘূৰিল নামনি সোৱণশিৰি জলবিদ্যুৎ প্রকল্পৰ। অসমৰ মূৰৰ ওপৰত নিৰ্মাণ কৰা জলবোমা সদৃশ প্রকল্পটোত কালি এটা গোটৰ টার্বাইন ঘূৰাই পৰীক্ষামূলকভাৱে বিদ্যুৎ উৎপাদন আৰম্ভ কৰে এনএইছপিচিৰ অধ্যক্ষ তথা পৰিচালন সঞ্চালক ভূপেন্দৰ গুপ্তাই।
ইয়াৰ লগে লগে অহা নৱেম্বৰৰ পৰা প্ৰকল্পটোত বিদ্যুৎ উৎপাদনৰ দুৱাৰো মুকলি হ’ল। অসমৰ এটা বৃহৎ অংশক চিৰদিনলৈ মৃত্যুৰ গহ্বৰলৈ নিক্ষেপৰ আশংকাৰ সৃষ্টি কৰি এই বৃহৎ প্রকল্পত দৈনিক দুহেজাৰ মেগাৱাটকৈ বিদ্যুৎ উৎপাদন কৰা হ’ব।
অৱশ্যে প্রথমতে পাঁচটা গোটতহে বিদ্যুৎ উৎপাদনৰ লক্ষ্য স্থিৰ কৰা হৈছে। মুঠ আঠটা গোট থকা প্রকল্পটোৰ প্রতিটো গোটৰ দৈনিক উৎপাদন ক্ষমতা হ’ল ২৫০ মেগাৱাট। নৱেম্বৰৰ পৰা উৎপাদন আৰম্ভ কৰিব পৰাকৈ জল ভাণ্ডাৰত পানী জমা কৰা প্রক্রিয়া সম্প্রতি অব্যাহত আছে।
বৃহৎ এই নদীবান্ধটো নিৰ্মাণৰ বাবে কেন্দ্ৰীয় চৰকাৰে ২০০৩ত অনুমোদন জনাইছিল। তাৰ দুবছৰ পাছৰ পৰা বান্ধ নিৰ্মাণৰ কাম আৰম্ভ হয়। নির্মাণ কার্য আগবঢ়াৰ পাছত বান্ধটোৰ বিৰুদ্ধে অসমত ২০০৯ৰ পৰা বিৰোধ আৰম্ভ হয়। সেই বিৰোধ ক্রমে তীব্ৰতৰ হৈ পৰে। আনকি নৰেন্দ্ৰ মোদীৰ নেতৃত্বত কেন্দ্ৰত চৰকাৰ গঠনৰ পূৰ্বে বিজেপিৰ তদানীন্তন সভাপতি ৰাজনাথ সিং পর্যন্ত বান্ধ বিৰোধী আন্দোলনত জঁপিয়াই পৰিছিল। ইয়াৰ ফলস্বৰূপে ২০১১ৰ পৰা নিৰ্মাণ কাৰ্য সম্পূর্ণৰূপে বন্ধ হৈ পৰে।
বান্ধটো অসমৰ বাবে অতি ভয়াবহ হৈ পৰা হেতুকে আৰু নিৰ্মাণৰ বিসংগতিৰ অভিযোগেৰে বিষয়টো ন্যায়ালয়ৰো মজিয়া পায়। সোৱণশিৰি নদীকে ধৰি অসমৰ জৈৱ বৈচিত্র্য বান্ধটোৱে ধ্বংস কৰিব বুলি অভিযোগ উত্থাপিত হয়। ইয়াকে লৈ সেউজ ন্যায়াধিকৰণতো গোচৰ ৰুজু হয়। বান্ধটোৰ সুৰক্ষাক লৈ বিশেষজ্ঞ সমিতি গঠন হয়। বিশেষজ্ঞ সমিতিয়ে বান্ধটোৰ বহু দুৰ্বল দিশ পোহৰলৈ আনে। সমান্তৰালভাৱে ৰাজ্যৰ বিভিন্ন দল- সংগঠনৰ ৰাজপথত প্রতিবাদ অব্যাহত থাকে।
এইবোৰৰ মাজতে ২০১৪ত বিজেপিৰ নেতৃত্বত কেন্দ্ৰত এনডিএৰ চৰকাৰ গঠন হয়। চৰকাৰ গঠনৰ পাছত নিৰ্বাচনৰ আগৰ স্থিতিৰ পৰা ওলোটা খৰ মাৰি স্তব্ধ হৈ পৰা বান্ধটোৰ নিৰ্মাণ কাৰ্যক গতি দিবলৈহে নৰেন্দ্ৰ মোদী চৰকাৰ তৎপৰ হয়। লক্ষ্যণীয়ভাবে বান্ধ বিৰোধী আন্দোলনেৰে এটা সময়ত অসমক স্তব্ধ কৰি দিয়া আন্দোলনকাৰীসকলো সন্দেহজনক স্থিতিত গাঁতত সোমাবলৈ ধৰে।
২০১৯৩ সেউজ ন্যায়াধিকৰণে এনএইছপিচিৰ সপক্ষে ৰায় দিয়ে। তাৰ পাছতে অর্ধনির্মিত হৈ থকা বান্ধটো সম্পূৰ্ণ কৰি তুলিবলৈ এনএইছপিচি একপ্ৰকাৰ জঁপিয়াই পৰে। অৱশেষত তাৰেই ফলশ্রুতিত শুকুৰবাৰে টার্বাইন ঘুৰিবলৈ সক্ষম হয়। শেহতীয়া নির্মাণ কাৰ্যৰ সময়তো পানীৰ প্ৰবল হেঁচাৰ ফলত প্রায় সঘনে বান্ধটোৰ বিভিন্ন অংশৰ ক্ষতি হৈ আহিছে। এইবোৰেও বান্ধৰ সুৰক্ষাৰ দিশটোক লৈ প্রশ্ন উত্থাপন কৰি আহিছে।
লক্ষ্যণীয়ভারে তেনে বিষয়বোৰক উপেক্ষা কৰি আহিছে এনএইছপিচি কর্তৃপক্ষই। কাৰণ সংস্থাটোৰ মূল লক্ষ্য হ’ল বান্ধটোৰ নির্মাণ তৎপৰতাৰে সম্পূর্ণ কৰি তোলা। অৱশেষত সেই লক্ষ্যত আজি ৰাজহুৱা খণ্ডৰ প্রতিষ্ঠানটো উপনীত হ’ল। ২০০৫ত নিৰ্মাণ কাৰ্য আৰম্ভ কৰাৰ সময়ত বৃহৎ বান্ধটোৰ প্ৰস্তাৱিত ব্যয় ধার্য কৰা হৈছিল ৬,২৮৫ কোটি টকা। আনহাতে, নির্মাণ সম্পূৰ্ণ কৰাৰ লক্ষ্য লোৱা হৈছিল ২০১১। সেই ব্যয়ৰ পৰিমাণ সম্প্রতি বৃদ্ধি হৈছে প্রায় ২৬ হেজাৰ কোটি টকালৈ।
বিগত ২০১১ৰ পৰা ২০১৯লৈ নিৰ্মাণকাৰ্য বন্ধ হৈ থকাৰ ফলতে ব্যয়ৰ পৰিমাণ এনেদৰে বৃদ্ধি হয় বুলি সংস্থাটোৱে দাবী কৰে।