Meghalaya:✒️সমগ্র দক্ষিণ এছিয়াৰ সবাতোকৈ পৰিষ্কাৰ নদীৰূপে খ্যাত মেঘালয়ৰ উমনগোট নৈৰ পানী ক্রমাৎ ঘোলা হ’বলৈ ধৰিছে। নৈখনৰ পানীৰ এনে অস্বাভাৱিক পৰিৱৰ্তন প্রত্যক্ষ কৰি উভতিবলৈ লৈছে দেশী-বিদেশী পর্যটকসকলে।
উল্লেখ্য যে মেঘালয়ৰ পশ্চিম জয়ন্তী পাহাৰ জিলাৰ এই নৈৰ পানী ওচৰৰ পৰা চাবলৈ বহু পর্যটকে ভিৰ কৰে। নৈখনৰ ওপৰৰ অংশৰ নাম হৈছে ডাউকী। নৈখনক কেন্দ্ৰ কৰি ৰাজ্যখনত এক পর্যটক উদ্যোগ গঢ় লৈ উঠে।
নৈখনৰ পানী ঘোলা হ’বলৈ ধৰাক লৈ স্বাভাৱিকতে পৰিৱেশ প্রেমীসকল উদ্বিগ্ন হৈছে। স্থানীয় লোকৰ মতে বাৰিষা নৈখনৰ পানী ঘোলা হোৱাটো স্বাভাৱিক কথা। কিন্তু খৰালিত হোৱা এই পৰিৱৰ্তন অস্বাভাবিক। সাধাৰণতে অক্টোবৰৰ মাজভাগৰ পৰা নৈখনৰ পানী নির্মল হৈ পৰে।
আইনাৰ দৰে মুখ চাব পৰা হৈ উঠে এই পানী। কিন্তু এইবাৰ নৈখনৰে ঘোলা পানী প্রবাহিত হৈ আছে। আনহাতে, এই নৈখনৰ এনে অৱস্থাৰ বাবে ৰাষ্ট্ৰীয় ঘাইপথ আৰু আন্তঃগাঁথনি উন্নয়ন নিগম লিমিটেড (এনএইছআইডিএল) ক জগৰীয়া কৰিছে ভিপিপি দলসহ একাংশই।
ইতিমধ্যে বিষয়টোক লৈ ভিপিপিৰ সাংসদ বিকি সিংকনে কেন্দ্রীয় পথ পৰিবহণ মন্ত্রী নীতিন গাডকাৰী আৰু পৰিৱেশ মন্ত্রী ভূপেন্দ্ৰ যাদৱলৈ পত্ৰ প্ৰেৰণ কৰিছে। সাংসদজনে অভিযোগ কৰা অনুসৰি ৰাষ্ট্ৰীয় ঘাইপথ উন্নয়ন আৰু আন্তঃগাঁথনি লিমিটেডে মেঘালয়ত কৰি থকা কাম-কাজৰ ফলত নৈখনৰ এনে শোচনীয় অৱস্থাৰ সৃষ্টি হৈছে।
পত্রত তেওঁ কয়, ‘উমনগোট নদী মেঘালয়ৰ প্ৰাকৃতিক সম্পদ আৰু ঐতিহ্যৰ প্রতীক। কেরল সেয়াই নহয়, এই নৈ ৰাজ্যখনৰ অন্যতম প্রধান পর্যটন কেন্দ্র। কিন্তু এই বছৰ অক্টোবৰৰ পৰা নৈখনৰ পানী ঘোলা হৈছে আৰু নিষ্প্রাণ হৈছে।’
একেদৰে বিষয়টোক লৈ উদ্বিগ্ন হৈছে মেঘালয় চৰকাৰো। উল্লেখ্য যে ৰাজ্যখনত উক্ত কেন্দ্রীয় সংস্থাই এটা পথ নির্মাণ কৰি আছে। সংস্থাটোৰ স’তে বিষয়টোক লৈ যোগাযোগ কৰা বুলি সদৰী কৰিছে উপ-মুখ্যমন্ত্রী পেস্টোন তিনছঙে। আনহাতে, ঘটনা সন্দর্ভত এনএইছআইডিচিএলৰ এজন শীর্ষ বিষয়াই জনায় যে উমনগোট নদীৰ ওপৰত এখন দলং নিৰ্মাণৰ কাম চলি আছে।
নদীৰ ওপৰত এশ মিটাৰ উচ্চতাত আৰু চাৰিশ মিটাৰ বহল এই দলং নিৰ্মাণৰ বাবে সম্ভৱপৰ সতর্কতা অৱলম্বন কৰা হৈছে বুলি বিষয়াজনে জনায়। অৱশ্যে পথ নিৰ্মাণৰ ফলত মাটি, বালি আদি নৈত পৰা বুলি একাংশই অভিযোগ উত্থাপন কৰিছে। এনে কাৰণত নৈখনৰ পানী ঘোলা হোৱা বুলিও এইসকলে ক্ষোভ প্রকাশ কৰিছে।