Bihar Election:✒️তেজস্বী যাদৱক সন্মুখত লৈ নীতিশ কুমাৰ আৰু নৰেন্দ্ৰ মোদীৰ বিৰুদ্ধে সর্বশক্তিৰে নিৰ্বাচনত অৱতীৰ্ণ হোৱা বিহাৰত এনডিএৰ নেতৃত্বত পুনৰ চৰকাৰ গঠনৰ সম্ভাৱনা ব্যক্ত কৰা হৈছে অধিকাংশ একজিট প’লত।
২৪৩ খন আসন সমৃদ্ধ বিহাৰ বিধানসভা নির্বাচনত মঙলবাৰে দ্বিতীয় তথা অন্তিম পৰ্যায়ৰ ভোটগ্রহণ অনুষ্ঠিত হয়। অহা ১৪ নৱেম্বৰত ভোটগণনা অনুষ্ঠিত হ’ব। সেইদিনাই নিশ্চিত হ’ব বিহাৰত এইবাৰো নীতিশ কুমাৰেই নেতৃত্ব দিব নে, ৰাজ্যবাসীয়ে তেজস্বী যাদৱৰ দৰে মুখ্যমন্ত্ৰীৰ পদৰ নতুন মুখক দায়িত্ব অর্পণ কৰিব। প্রথম পৰ্যায়ৰ নিৰ্বাচনত বিহাৰত ভোটদানৰ হাৰ আছিল ৬৫.০৮ শতাংশ। দ্বিতীয় পর্যায়ত অর্থাৎ কালি ভোটদানৰ হাৰ হয় প্রায় ৭৯ শতাংশ।
বিহাৰত ৭৯ শতাংশ ভোটদান হোৱাটো এক অভিলেখ। তথাপি এই হাৰ আন বহু ৰাজ্যৰ তুলনাত যথেষ্ট কম। বিৰোধীৰ মহাগট বন্ধনে ভোটদানৰ হাৰ বৃদ্ধিত বিশেষ গুৰুত্ব দিছিল। তেজস্বী যাদৱৰ নিৰ্বাচনৰ মূল বিষয় আছিল পৰিৱৰ্তন। এই পৰিৱৰ্তন আহিবলৈকে ৰাজ্যবাসীক হিলদল ভাঙি ভোটদান কৰিবলৈ বিৰোধীৰ মহাগট বন্ধনৰ অন্তর্ভুক্ত দলবোৰে হিলদল ভাঙি ৰাইজক ভোট কেন্দ্ৰলৈ আহিবলৈ আহ্বান জনাইছিল।
মঙলবাৰে ভোটদান প্রক্রিয়া শেষ হোৱাৰ পাছত মহাগট বন্ধনৰ সেই লক্ষ্য সন্তুষ্টি লাভ কৰিব পৰাকৈ পূৰণ নহ’ল বুলি ৰাজনৈতিক মহলত চর্চা চলিছে। বিহাৰৰ নিৰ্বাচনৰ ফলাফলৰে চমক দিবলৈ কার্পণ্য কৰা নাছিল বিজেপি আৰু মহাগট বন্ধনৰ অন্যতম কংগ্রেছে। দল দুটাৰ সমগ্ৰ দেশৰ নেতৃবৃন্দ প্ৰচাৰৰ সময়ত বিহাৰৰ নিৰ্বাচনত জঁপিয়াই পৰিছিল। প্ৰধানমন্ত্ৰী নৰেন্দ্ৰ মোদীয়ে ধাৰাবাহিক প্ৰচাৰত ভাগ লোৱাৰ সমান্তৰালকৈ ৰাহুল গান্ধীয়েও এই ক্ষেত্ৰত কার্পণ্য কৰা নাছিল।
এই সকলো তৎপৰতা মঙলবাৰে ভোটদান প্রক্রিয়া সম্পন্ন হোৱাৰ লগে লগে সামৰণি পৰে। লগে লগে আৰম্ভ হৈছে এইবাৰ চৰকাৰ বোলা প্রশ্নটোক লৈ উৎকণ্ঠা। এক চিৰাচৰিত ব্যৱস্থা হৈ পৰাৰ দৰে ভোটদান শেষ হোৱাৰ লগে লগে কালি কে’বাটাও সংস্থাই বিহাৰৰ নিৰ্বাচনৰ সম্ভাব্য ফলাফল ঘোষণা কৰে। বিহাৰত এই পৰিৱৰ্তন হ’বই বুলি দেশৰ বিৰোধী ৰাজনৈতিক শিবিৰ আত্মবিশ্বাসী হৈ থকাৰ সময়তে অধিকাংশ একজিট প’লত প্রতিষ্ঠান বিৰোধী ভোটকহে নস্যাৎ কৰা হৈছে। সেই কাৰণে বিজেপি নেতৃত্বাধীন এনডিএক অধিকাংশ একজিট প’লত কংগ্রেছ নেতৃত্বাধীন মহাগট বন্ধনৰ তুলনাত বেছি আসন দিয়া হৈছে।
বিহাৰৰ এইবাৰৰ নিৰ্বাচনত প্ৰশান্ত কিশোৰৰ জনসুৰজ পাৰ্টিৰ ওপৰত বিশেষ দৃষ্টি নিবদ্ধ আছিল; কিন্তু একজিট প’লত দলটোক অতি নিশকতীয়া ৰূপতহে দেখা পোৱা গৈছে। মাত্ৰিজে নামৰ সংস্থাই এনডিএক ১৪৭-১৬৭লৈ আসন দিছে। সংস্থাটোৰ মতে, মহাগট বন্ধনক ৭০-৯০ খন আসন দিছে। অন্যান্যক দিয়া হৈছে দুই-আঠ খন আসন। পিপ’লছ পালছ নামৰ সংস্থাটোৰ সমীক্ষা মতে, এনডিএই লাভ কৰিব ১৩৩-১৫৯ খন আসন। মহাগট বন্ধনে লাভ কৰিব ৭৫-১০১ খন আসন। অন্যান্যক দিয়া হৈছে দুই-আঠখন আসন।
জেভিচি নামৰ সংস্থাটোৰ সমীক্ষা মতে, এনডিএই লাভ কৰিব ১৩৫-১৫০ খন আসন। মহাগট বন্ধনে পাব ৮৮-১০৩ খন আসন। অন্যান্যই লাভ কৰিব তিনি-ছখন আসন। আনহাতে, দৈনিক ভাস্কৰৰ মতে, এনডিএই পাবলগীয়া আসনৰ সংখ্যা ১৪৫-১৬০ খন। ইয়াৰ বিপৰীতে মহাগট বন্ধনে ৭৩-৯১ খন আসন পাব। দৈনিক ভাস্কৰৰ সমীক্ষা মতে, জনসুৰজ পার্টিয়ে এখনো আসন নাপায়। অন্যান্যই পাঁচ-১০ খন আসন পাব।
চাণক্যৰ মতে, এনডিএ লাভ কৰিবলগীয়া আসনৰ সংখ্যা হ’ল ১৩০-১৩৮ খন। মহাগট বন্ধনে পাব ১০০-১০৮ খন আসন। আনহাতে, তিনি-পাঁচখন আসন অন্যান্যই লাভ কৰিব।
পিপ’লছ ইনছাইডৰ সমীক্ষা মতে, এনডিএই লাভ কৰিবলগীয়া আসনৰ সংখ্যা ১৩০-১৪৮ খন। মহাগট বন্ধনে পাব ৮৭-১০২ খন। অন্যান্যই লাভকৰিব তিনি-ছখন আসন।
এনেদৰে ইটোৰ পাছত সিটো সংস্থাই এনডিএৰ জয়জয়কাৰ দেখুওৱাৰ বিপৰীতে জাৰ্ণ’ মিৰৰ নামৰ সংস্থাটোৱে বিপৰীত ছবিহে দাঙি ধৰিছে। সংস্থাটোৰ মতে, বিহাৰত এইবাৰ পৰিৱৰ্তন নিশ্চিত। কিয়নো বিৰোধীৰ মহাগট বন্ধনে লাভকৰিবলগীয়া আসনৰ সংখ্যা হ’ল ১৩০-১৪০ খন। ইয়াৰ বিপৰীতে এনডিএ ১০০-১১০ খন আসনত সীমাবদ্ধ থাকিব।
উল্লেখ্য যে বিহাৰত একক সংখ্যাগৰিষ্ঠতা লাভ কৰিবলৈ ন্যূনতম ১২২ খন আসনৰ প্ৰয়োজন। যদিও ভাৰতীয় নির্বাচনী ইতিহাসত বহু সময়ত এনে প্রাক্ নির্বাচনী সমীক্ষা ফলাফলৰ বিপৰীত হোৱাৰ বহু উদাহৰণ আছে, তাৰ মাজতে ফলাফল মিলি যোৱাৰো উদাহৰণ কম নহয়।