42 Umrah pilgrims from Telangana killed in bus-tanker collision in Saudi:
আজি পুৱতি নিশা চৌদি আৰৱত সংঘটিত এক শোকাৱহ পথ দুৰ্ঘটনাত কৰুণ মৃত্যুক সাবটি লয় ৪২গৰাকী ভাৰতীয় হজযাত্ৰীয়ে ৷
মক্কাৰ পৰা মদিনালৈ উমৰাহ হজযাত্রী লৈ যোৱা বাছ আৰু বিপৰীত ফালৰ পৰা অহা পেট্ৰল কঢ়িয়াই অনা অইল টেংকাৰৰ মুখামুখি সংঘর্ষত অগ্নিকাণ্ড সংঘটিত হৈ কৰুণ মৃত্যুক সাবটি লয় ২০ গৰাকী মহিলা আৰু ১১ গৰাকী শিশুসহ ৪২ জন ভাৰতীয় হজযাত্ৰীয়ে ৷ আনহাতে ভয়ংকৰ দুৰ্ঘটনাত আহত বহু কেই গৰাকীক ততাতৈয়াকৈ ভৰ্তি কৰা হয় চিকিৎসালয়ত । আনহাতে ঘটনাৰে পিছতে হায়দৰাবাদৰ ইমিগ্ৰেচন বিষয়াসকলে নিশ্চিত কৰিছে যে আটাইকেইজন ৪২ জন ভুক্তভোগী হাইদৰাবাদৰ।
এই দুৰ্ঘটনাক লৈ বৈদেশিক পৰিক্ৰমা মন্ত্ৰী ড: এছ জয়শংকৰে গভীৰ শোক প্ৰকাশ কৰি কয় যে ৰিয়াদৰ দূতাবাস আৰু জেদ্দাত থকা কনছুলেটে ভাৰতীয় নাগৰিক আৰু তেওঁলোকৰ পৰিয়ালক সম্পূৰ্ণ সহায় আগবঢ়াইছে। তেওঁ লগতে কয়, ‘শোকসন্তপ্ত পৰিয়াললৈ আন্তৰিক সমবেদনা, আহতসকলৰ আশু আৰোগ্যৰ বাবে প্ৰাৰ্থনা জনালোঁ।
ভাৰতীয় কনছুলেট জেনেৰেল জেদ্দাত কণ্ট্ৰল ৰুমও স্থাপন কৰি নিহতসকলৰ পৰিয়ালক সহায় কৰাৰ লগতে তথ্য প্ৰদান কৰা হৈছে। টোল ফ্ৰী নম্বৰ হৈছে ৮০০২৪৪০০০৩, ০১২২৬১৪০৯৩, ০১২৬৬১৪২৭৬, ০৫৫৬১২২৩০১ (ৱাটছএপ)
ৰিয়াদত থকা দূতাবাস আৰু জেদ্দাত থকা কনছুলেটে ছৌদি হজ আৰু উমৰা মন্ত্ৰালয়, স্থানীয় কৰ্তৃপক্ষ, আৰু সংশ্লিষ্ট উমৰা অপাৰেটৰৰ সৈতে সমন্বয় সাধন কৰি আছে। কনছুলেটৰ কৰ্মচাৰী আৰু ভাৰতীয় সম্প্ৰদায়ৰ স্বেচ্ছাসেৱকৰ এটা দল চিকিৎসালয় আৰু দুৰ্ঘটনাস্থলীত ভুক্তভোগী আৰু তেওঁলোকৰ পৰিয়ালক সহায় কৰিবলৈ আছে বুলি কনছুলেটৰ এক প্ৰেছ বিজ্ঞপ্তিযোগে প্ৰকাশ কৰিছে।
আনহাতে তেলেংগানাৰ মুখ্যমন্ত্ৰী ৰেৱন্ত ৰেড্ডীয়ে এই ভয়ানক দুৰ্ঘটনাক লৈ গভীৰ শোক প্ৰকাশ কৰিছে। তেওঁ ৰাজ্যৰ মুখ্য সচিব আৰু ডিজিপিক সম্পূৰ্ণ সবিশেষ লাভ কৰিবলৈ নিৰ্দেশ দিছে। তেওঁ বৈদেশিক পৰিক্ৰমা মন্ত্ৰালয় আৰু ছৌদি দূতাবাসৰ বিষয়াসকলকো যোগাযোগ কৰি তাৎক্ষণিক সাহায্যৰ ব্যৱস্থা গ্ৰহণ কৰিবলৈ নিৰ্দেশ দিছে।
মুখ্য সচিব কে ৰামকৃষ্ণ ৰাৱে দিল্লীস্থিত তেলেংগানা ভৱনৰ আবাসিক আয়ুক্ত গৌৰৱ উপ্পালৰ সৈতে বাৰ্তালাপ কৰি নিৰ্দেশনা জাৰি কৰিছে। একদৰে তেলেংগানা সচিবালয়ত পৰিস্থিতি নিৰীক্ষণ আৰু পৰিয়ালক তথ্য প্ৰদানৰ বাবে এটা নিয়ন্ত্ৰণ কক্ষ স্থাপন কৰা হৈছে। নিয়ন্ত্ৰণ কক্ষৰ নম্বৰ হৈছে: +৯১ ৭৯৯৭৯ ৫৯৭৫৪,+৯১ ৯৯১২৯ ১৯৫৪৫
ইপিনে ,হায়দৰাবাদৰ সাংসদ আছাদুদ্দিন ওৱেইচীয়ে নিশ্চিত কৰিছে যে বাছখনত অগ্নিকাণ্ড সংঘটিত হোৱাৰ সময়ত ৪২ জন ওমৰাহ তীৰ্থযাত্ৰী আছিল। তেওঁ কয় যে ৰিয়াদস্থিত ভাৰতীয় দূতাবাসৰ মিছন উপ -মুৰব্বী আবু মাথেন জৰ্জৰ সৈতে যোগাযোগত আছে আৰু তেওঁ এই সন্দৰ্ভত তথ্য সংগ্ৰহ কৰি আছে। ওৱাইছিয়ে কেন্দ্ৰীয় চৰকাৰক ভুক্তভোগীৰ মৃতদেহ ভাৰতলৈ ঘূৰাই অনাটো নিশ্চিত কৰিবলৈ আৰু আহতসকলৰ বাবে উপযুক্ত চিকিৎসা সেৱাৰ ব্যৱস্থা কৰিবলৈও আহ্বান জনায়।