Bangladesh’s ousted PM Hasina convicted in students crackdown case:
সোমবাৰে বহিষ্কৃত প্ৰধানমন্ত্ৰী শ্বেখ হাছিনাক মানৱতাৰ বিৰুদ্ধে অপৰাধৰ বাবে দোষী সাব্যস্ত বাংলাদেশৰ ঢাকাস্থিত ইন্টাৰনেচনেল ক্ৰাইমচ ট্ৰিবিউনেল আদালতৰ ৷ আদালতে মৃত্যুদণ্ডৰে দণ্ডিত কৰে বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক I
যোৱা বছৰ ছাত্ৰ নেতৃত্বাধীন বিদ্ৰোহৰ বিৰুদ্ধে মাৰাত্মক দমনৰ নিৰ্দেশ দিয়াৰ বাবে দোষী সাব্যস্ত কৰা কেইবামাহোজোৰা বিচাৰৰ সামৰণি মাৰে এইদৰেই ।
ফেব্ৰুৱাৰী মাহৰ আৰম্ভণিতে অনুষ্ঠিত হ’বলগীয়া সংসদীয় নিৰ্বাচনৰ কেইমাহমান পূৰ্বে এই ৰায়দান। ন্যায়াধিকৰণক নিয়ন্ত্ৰণ কৰা আইনৰ অধীনত সৰ্বোচ্চ শাস্তি হ’ল মৃত্যুদণ্ড।
উল্লেখ্য যে হাছিনাৰ আৱামি লীগ দলক ইতিমধ্যে মহম্মদ ইউনুছ নেতৃত্বাধেন অন্তৱৰ্তীকালীন চৰকাৰে প্ৰতিদ্বন্দ্বিতা কৰাত বাধাৰোপ কৰিছে আৰু সোমবাৰৰ ৰায়দানে দেশ খনৰ সাধাৰণ নিৰ্বাচনৰ পূৰ্বে ব্যাপকঅশান্তিৰ সৃষ্টি কৰিব পাৰে বুলি আশংকা কৰা হৈছে ।
ৰাজধানী ঢাকাত অৱস্থিত বাংলাদেশৰ আভান্তৰীণ যুদ্ধ অপৰাধ আদালতৰ আন্তঃৰাষ্ট্ৰীয় অপৰাধ ন্যায়াধিকৰণে ২০২৪ চনৰ আগষ্ট মাহত ভাৰতলৈ পলায়ন কৰাৰ পিছত কটকটীয়া নিৰাপত্তাৰ মাজত আৰু হাছিনাৰ অনুপস্থিতিত দোষী সাব্যস্ত কৰে। অৱশ্যে এই ৰায়ৰ বিৰুদ্ধে উচ্চতম ন্যায়ালয়ত আবেদন কৰিব পাৰিব শেখ হাছিনাই।
আনহাতে হাছিনাৰ পুত্ৰ তথা আবামী লীগৰ উপদেষ্টা ছাজিব ৱাজেদে ৰায়দানৰ প্ৰাকক্ষণত ৰয়টাৰক কয় যে আৱামি লীগৰ অংশগ্ৰহণেৰে গণতান্ত্ৰিকভাৱে নিৰ্বাচিত চৰকাৰে কাৰ্যভাৰ গ্ৰহণ নকৰালৈকে তেওঁলোকে আবেদন নকৰে।
উল্লেখ্য যে ব্যাপক ছাত্ৰ আন্দোলনৰ ফলশ্ৰুতিত প্ৰধানমন্ত্ৰী পদ ত্যাগ কৰি ভাৰতত আশ্ৰয় লৈ আছে শ্বেখ হাছিনা ৷ দেশৰ পৰা পলায়ন কৰাৰ পিছতে তেওঁৰ বিৰুদ্ধে মহম্মদ ইউনুছ নেতৃত্বাধীন অন্তৱৰ্তীকালীন চৰকাৰে অপসাৰণ,পলায়ন আৰু গণহত্যাৰ গোচৰ ৰজু কৰিছিল ইণ্টাৰনেশ্যনেল ক্ৰাইমছ্ ট্ৰিবিউনেলত ৷ আনকি এই সন্দৰ্ভত ট্ৰিবিউনেল আদালতত সোঁ- শৰীৰে শ্বেখ হাছিনা সহ আন সকলক হাজিৰ হ’বলৈ বাৰম্বাৰ নটিছ জাৰি কৰিছিল যদিও শ্বেখ হাছিনা হাজিৰ ন’হল ৷
ইতিমধ্যে বহু শুনানিৰ অন্তত ৰায়দান চলিত সপ্তাহত দিয়াৰ কথা আছিল যদিও ট্ৰিবিউনেলে গোচৰৰ ৰায়দান পিছুৱাইছিল ১৭ নৱেম্বৰলৈ। একেদৰে আৱামী লীগৰ আন আন নেতা সকলৰ বিৰুদ্ধে আদালতত চলি থকা গোচৰৰ ৰায়দানো পিছুৱাইছিল ১৭ নৱেম্বৰলৈ ৷
অবশেষত সকলো উৎকণ্ঠাৰ অন্ত পেলাই আজি আদালতে মানৱতাৰ বিৰুদ্ধে অপৰাধ আৰু প্ৰতিবাদীক মাৰণাস্ত্ৰৰে আক্ৰমণৰ বাবে দোষী সাব্যস্ত কৰে শেখ হাছিনাক ৷
# ১৯৭১ চনৰ পিছত আটাইতকৈ বেয়া দিশৈ গতি বাংলাদেশৰ !
বিচাৰৰ সময়ত অভিযুক্তসকলে আদালতক কয় যে তেওঁলোকে ২০২৪ চনৰ জুলাই আৰু আগষ্ট মাহত ছাত্ৰ নেতৃত্বাধীন বিদ্ৰোহ দমন কৰিবলৈ মাৰাত্মক শক্তি ব্যৱহাৰ কৰিবলৈ তেওঁৰ প্ৰত্যক্ষ আদেশ আমাক দিছিল ৷
ৰাষ্ট্ৰসংঘৰ প্ৰতিবেদন অনুসৰি ২০২৪ চনৰ ১৫ জুলাইৰ পৰা ৫ আগষ্টৰ ভিতৰত হোৱা প্ৰতিবাদৰ সময়ত ১৪০০ জনলৈকে লোক নিহত হ’ব পাৰে, আৰু হাজাৰ হাজাৰ লোক আহত হৈছে৷ ইয়াৰে অধিকাংশই নিৰাপত্তাৰক্ষীৰ গুলীত ৷১৯৭১ চনৰ স্বাধীনতা যুদ্ধৰ পিছত বাংলাদেশত হোৱা আটাইতকৈ ভয়াৱহ হিংসা হিচাপে বিবেচিত হৈছে ৷
হাছিনাৰ হৈ ৰাষ্ট্ৰনিযুক্ত প্ৰতিৰক্ষা অধিবক্তাই আদালতত কয় যে তেওঁৰ বিৰুদ্ধে উত্থাপিত অভিযোগ ভিত্তিহীন আৰু তেওঁক দোষমুক্ত কৰাৰ বাবে আবেদন জনায়।
ৰায়দানৰ পূৰ্বে হাচিনাই অভিযোগ আৰু ন্যায়াধিকৰণৰ কাৰ্য্যবিধিৰ ন্যায্যতাক খাৰিজ কৰি দোষী সাব্যস্ত কৰা ৰায় “এটা পূৰ্বনিৰ্ধাৰিত সিদ্ধান্ত” বুলি দাবী কৰে। এই ৰায়দানৰ পূৰ্বে বাংলাদেশত উত্তেজনা সৃষ্টি হৈছে, বিগত কিছুদিনত সমগ্ৰ দেশতে কমেও ৩০টা হস্ত নিৰ্মিত বোমা বিস্ফোৰণ আৰু ২৬খন বাহন জ্বলাই দিয়া হৈছে। অৱশ্যে এতিয়ালৈকে কোনো লোক হতাহত হোৱা নাই।
