Sheikh Hasina:
চুবুৰীয়া দেশ বাংলাদেশৰ অপসাৰিত প্ৰধানমন্ত্ৰী শ্বেখ হাছিনাৰ বিপদ ঘনীভূত ৷ তেওঁৰ বিৰুদ্ধে ঢাকাস্থিত ইণ্টাৰনেশ্যনেল ক্ৰাইমছ্ ট্ৰিবিউনেলত গোচৰ চলি আছে ৷
উল্লেখ্য যে ব্যাপক ছাত্ৰ আন্দোলনৰ ফলশ্ৰুতিত প্ৰধানমন্ত্ৰী পদ ত্যাগ কৰি ভাৰতত আশ্ৰয় লৈ আছে শ্বেখ হাছিনা ৷ দেশৰ পৰা পলায়ন কৰাৰ পিছতে তেওঁৰ বিৰুদ্ধে মহম্মদ ইউনুছ নেতৃত্বাধীন অন্তৱৰ্তীকালীন চৰকাৰে অপসাৰণ,পলায়ন আৰু গণহত্যাৰ গোচৰ ৰজু কৰিছিল ইণ্টাৰনেশ্যনেল ক্ৰাইমছ্ ট্ৰিবিউনেলত ৷ আনকি এই সন্দৰ্ভত ট্ৰিবিউনেল আদালতত সোঁ- শৰীৰে শ্বেখ হাছিনা সহ আন সকলক হাজিৰ হ’বলৈ বাৰম্বাৰ নটিছ জাৰি কৰিছিল যদিও শ্বেখ হাছিনা হাজিৰ ন’হল ৷
ইতিমধ্যে বহু শুনানিৰ অন্তত ৰায়দান চলিত সপ্তাহত দিয়াৰ কথা আছিল যদিও ট্ৰিবিউনেলে গোচৰৰ ৰায়দান পিছুৱালে ১৭ নৱেম্বৰলৈ। একেদৰে আৱামী লীগৰ আন আন নেতা সকলৰ বিৰুদ্ধে আদালতত চলি থকা গোচৰৰ ৰায়দানো পিছুৱালে ১৭ নৱেম্বৰলৈ।
এনে প্ৰেক্ষাপটত ভাৰতত আশ্ৰয় লৈ থকা বাংলাদেশৰ অপসাৰিত প্ৰধানমন্ত্ৰী গৰাকীৰ ভাগ্য নিৰ্ণয় হ’ব ১৭ নৱেম্বৰত ৷ উল্লেখ্য যে,অহা বৰ্ষৰ জানুৱাৰীত অনুষ্ঠিত হ’ব দেশ খনৰ সাধাৰণ নিৰ্বাচন ৷ তাৎপৰ্যপূৰ্ণভাৱে এই নিৰ্বাচনত অংশ ল’ব নোৱাৰিব শ্বেখ হাছিনা নেতৃত্বাধীন আৱামী লীগ ৷ কিয়নো মহম্মদ ইউনুছ নেতৃত্বাধীন অন্তৱৰ্তীকালীন চৰকাৰে আৱামী লীগক নিষিদ্ধ ঘোষণা কৰিছে ৷ কাৰ্যত: এই নিৰ্বাচনত অৱতীৰ্ণ হ’ব খালেদা জিয়া নেতৃত্বাধীন বিএনপি ,জাতীয় পাৰ্টি,জমিয়ত ই ইছলামী আৰু নেচনেল চিটিজেন পাৰ্টিয়ে ৷
