The British Museum:✒️আগন্তুক বৰ্ষত অসমলৈ প্ৰদৰ্শনৰ বাবে অনা হ’ব অসমীয়াৰ গৌৰৱময় সভ্যতাৰ প্ৰতীক বৃন্দাবনী বস্ত্র। কালি লণ্ডনৰ ব্ৰিটিছ মিউজিয়ামত এই সম্পৰ্কত অসম চৰকাৰ আৰু সংগ্ৰহালয় কর্তৃপক্ষৰ মাজত ‘লেটাৰ অৱ ইন্টেন্ট’ স্বাক্ষৰিত হয়। মুখ্যমন্ত্রী ড° হিমন্ত বিশ্ব শৰ্মাৰ উপস্থিতিত এই চুক্তি স্বাক্ষৰিত হয়।
এই সন্দর্ভত মুখ্যমন্ত্রীয়ে কয়,’অসমৰ ঐতিহ্য, অতিকৈ আপুৰুগীয়া সম্পদ অসমৰ ভূমিলৈ উভতি আহিব আৰু অসমবাসীয়ে এই পরিত্র বস্তুভাগি দৰ্শন কৰিব। গতিকে আজিৰ দিনটো আমাৰ বাবে সদায় স্মৰণীয় হৈ ৰ’ব। ব্রিটিছ মিউজিয়ামত থকা এই সম্পদবিধ অসমলৈ বিশেষ কিছু নিয়মৰ মাজেৰে সীমিত সময়ৰ বাবেহে অনা হ’ব। এই বার্তাই নিশ্চিতকৈ জাতীয় জীৱন তথা ভাৰতবাসীকো গৌৰৱান্বিত কৰিব।’
মুখ্যমন্ত্ৰীয়ে লগতে সদৰী কৰে যে অসমৰ বাদেও বস্তুভাগি দিল্লী আৰু মুম্বাইত প্ৰদৰ্শনৰ বাবেও ৰাজ্য চৰকাৰে প্ৰচেষ্টা চলাব। ইয়াৰ জৰিয়তে অসমৰ গৌৰৱময় সভ্যতাৰ অধিক প্ৰচাৰ আৰু প্ৰসাৰ হ’ব। উল্লেখ্য যে ১৫০০ শতিকাৰ শেষভাগত আৰু ১৬০০ শতিকাৰ আগভাগত কোচ ৰজা মহাৰাজ নৰনাৰায়ণৰ আগ্ৰহ অনুসৰি মহাপুৰুষ শ্রীমন্ত শংকৰদেৱে এই বস্তু প্ৰস্তুত কৰিছিল। ভাগৱতৰ সমস্ত বর্ণনা উল্লেখ থকা এই বস্ত্ৰ বৈ উলিওৱাৰ দায়িত্ব গুৰুজনাই তেওঁৰ অন্যতম প্রিয় শিষ্য মথুৰাদাস বুঢ়া আতাক অর্পণ কৰিছিল।
গুৰুৰ আজ্ঞা অনুসৰি বুঢ়াআতাই বৰপেটাৰ শিপিনীৰ হাতেৰে এই বৃহৎ আকাৰৰ বস্তুখন বৈ উলিয়াইছিল। বস্ত্রখন দীঘলে আছিল ১২০ হাত আৰু বহল আছিল ৬০ হাত। বস্ত্রখন বৈ উলিওৱাৰ পাছত গুৰুজনাই মহাৰাজক অর্পণ কৰিছিল। পৰৱৰ্তী সময়ত হাতবাগৰি বস্ত্ৰখন খণ্ড বিখণ্ড হয়।
তাৰে কে’বাটাও অংশ বিশ্বৰ কে’বাটাও প্রসিদ্ধ সংগ্রহালয়ত সংৰক্ষিত হৈ আছে। সেইবোৰৰ ভিতৰত ব্রিটিছ মিউজিয়ামৰ অংশটোৱে সর্বাধিক প্ৰচাৰ লাভ কৰি আহিছে। সেয়াই অসমলৈ প্ৰদৰ্শনৰ বাবে আনিবলৈ আজি ৰাজ্য চৰকাৰে চুক্তিত স্বাক্ষৰ কৰে।