পাকিস্তানী সাধক বিয়াজ আহমদ গৌহৰ শ্বাহীক কেন্দ্ৰ কৰি পুনৰ চাঞ্চল্যৰ সৃষ্টি হৈছে। কাৰণ তেওঁ এক সর্বনাশী ভবিষ্যদ্বাণী কৰিছে। পাক সাধকজনে এসময়ত দাবী কৰিছিল যে বছৰটো শেষ হোৱাৰ পূর্বেই এটা ধ্বংসাত্মক ধুমকেতুৱে পৃথিৱীত আঘাত কৰিব আৰু সেই আঘাততেই শেষ হৈ যাব মানবসভ্যতা আৰু পৃথিৱীৰ জীৱন।
বহু বছৰ ধৰি গৌহৰ শ্বাহীৰ অনুগামীসকলৰ মাজত এই সতর্কবার্তা গোপনে ঘূৰি আছিল যদিও সম্প্রতি ই নতুনকৈ বিয়পি পৰিছে। বিশেষকৈ অনলাইন আলোচনা আৰু সামাজিক মাধ্যমৰ গুজৱত এই বিষয়টোবে সম্প্রতি বিশেষভাৱে ঠাই পাইছে।’ডেইলী মেইল’ কাকতত প্রকাশিত এক প্রতিবেদনত কোৱা হৈছে, গৌহৰ শ্বাহীয়ে বিশ্বাস কৰিছিল যে এই বিপর্যয় একেবাৰেই আকস্মিক নহয়।
মানৱ জাতিটো নিজৰ বিবেক, সহমর্মিতা আৰু আধ্যাত্মিক সত্যৰ পৰা ইমানেই বিচ্যুত হৈ পৰিছে যে ঈশ্বৰীয় প্রতিক্রিয়া এতিয়া অবশ্যম্ভাবী। সাধকজনে বৰ্ণনা কৰিছে যে মানুহে অহংকাৰ, ঘৃণা, যুদ্ধ, লোভ আৰু হিংসাত নিমজ্জিত হৈ নিজৰ পথ হেৰুৱাই পেলাইছে। সেই বাবেই ঈশ্বৰে পৃথিৱীলৈ এক মহাজাগতিক আঘাত পঠাব- এটা ধূমকেতু, যি সকলোবোৰ নিমিষতে ধ্বংস কৰি দিব। ২০০০ত প্রকাশ পোৱা নিজৰ গ্রন্থ ‘দ্য ৰেলিজন অব গড’ত গৌহৰ শ্বাহীয়ে লিখিছিল, ‘এটা ধুমকেতু পৃথিৱীখন সম্পুৰ্ণৰূপে ধ্বংস হোৱাৰ উদ্দেশ্যে প্ৰেৰণ কৰা হৈছে।আগন্তুক ২০-২৫ বছৰৰ ভিতৰতে ই আহি পৃথিৱীত পৰিব। সেয়াই হ’ব এই বিশ্বৰ শেষ দিন।’
সেই সময়সীমা গণনা কৰিলে দেখা যায় যে ঠিক এই সময়।সময়খিনিয়েই সেই ভবিষ্যদ্বাণীৰ মেছায়া ফাউণ্ডেচন ইন্টাৰনেচনেলৰ অনুগামীসকলে দাবী কৰে যে ধুমকেতুৰ আঘাতত বিশ্বব্যাপী বিপর্যয় নামি আহিব। ভূমিকম্পত মহাদেশ ফাটি যাব, অনেক চহৰ প্ৰৱল টৌত তল যাব, খহি পৰিব সামগ্রিক বিশ্ব ব্যবস্থা। তেওঁলোকে বিশ্বাস কৰে যে গৌহৰ শ্বাহী হয়তো ক’ৰবাত আঁৰত আছে, পৃথিৱীৰ এই অধঃপতন দেখিছে আৰু প্রতীক্ষা কৰিছে সেই ‘শেষ মুহূর্ত’লৈ।
অৱশ্যে বাস্তৱ বিজ্ঞানৰ পর্যবেক্ষণে সম্পূর্ণ ভিন্ন মত পোষণ কৰিছে। নাছাসহ বিশ্বৰ বিভিন্ন মহাকাশ গৱেষণা সংস্থাই স্পষ্টভাবে জনাইছে যে চলিত বছৰ বা অদূৰ ভবিষ্যতে পৃথিৱীৰ দিশে ধাৱমান হোৱা কোনো ধুমকেতু বা গ্রহাণু নাই।
যিবোৰ বস্তুক আগৰ দিনত সম্ভাব্য আশংকাৰ তালিকাত ৰখা হৈছিল, যেনে এপ’ফিচ, সেইবোৰকো বিস্তাৰিতভাৱে পৰ্যবেক্ষণৰ পাছত আশংকামুক্ত বুলি ঘোষণা কৰা হৈছে। এই সময়ত একমাত্র উল্লেখযোগ্য আগন্তুক হৈছে আন্তঃনাক্ষৰিক বস্তু ‘৩১/এটলাছ’, সেইটো পৃথিৱীৰ পৰা অত্যন্ত দূৰত আছে আৰু কোনোপধ্যেই বিপদৰ কাৰণ নহয়।
আনহাতে, সাম্প্রতিক এক গৱেষণাই অৱশ্যে সতৰ্ক কৰিছে যে সূৰ্যৰ সমীপৰ অঞ্চলত থকা কিছু গ্রহাণু মানুহৰ দৃষ্টিৰ বাহিৰত লুকাই থাকিব পাৰে। বিশেষকৈ শুক্র গ্রহে মাজে মাজে এনেদৰে অৱস্থান লয় যে তাৰ পাছফালে থকা ক্ষুদ্র বস্তুবোৰ টেলিস্কোপত ধৰা নপৰে।
অৱশ্য এই গৱেষণাত ক’তো কোৱা নাই যে এনে কোনো গোপন গ্রহাণু এতিয়াই পৃথিৱীৰ দিশে ধাৱমান হৈ আছে। উল্লেখ্য যে গৌহৰ শ্বাহী ২০০১ত লণ্ডনৰ পৰা ৰহস্যজনকভাৱে নিৰুদ্দেশ হয় আৰু তাৰ পৰা তেওঁক কোনোদিনেই প্রকাশ্যে দেখা পোৱা নাই।
কোনোবাই কয় যে তেওঁৰ মৃত্যু হৈছে, আকৌ তেওঁৰ অনুৰাগীসকলে দাবী কৰে যে তেওঁ অদৃশ্য হৈ পৰিছে কেৱল মানৱজাতিৰ চূড়ান্ত পৰিণতিৰ অপেক্ষাত। তেওঁলোকৰ বক্তব্য, কিছু দশকৰ পূৰ্বে বৃহস্পতি গ্রহত যি ধুমকেতু-খণ্ডৰ আঘাত লাগিছিল, সেয়া আছিল আসন্ন মহাবিপৰ্যয়ৰ প্রথম ইংগিত।
অৱশ্যে বিজ্ঞানীসকলৰ মতে, এইবোৰ দাবী কুসংস্কাৰ আৰু গুজৱৰ ওপৰত থিয় দি আছে। পৃথিৱীক ধ্বংস কৰিব পৰা কোনো ধুমকেতু সম্প্রতি মহাকাশত নাই আৰু মানৱসভ্যতাৰ শেষ সময় আহি পৰাৰ দৰে কোনো প্রমাণো নাই। বাস্তৱ তথ্যৰ ভিত্তিত ক’বলৈ হ’লে গৌহৰ শ্বাহীৰ ভৱিষ্যদ্বাণী বিশ্বাসৰ ক্ষেত্রতে সীমাবদ্ধ, বিজ্ঞানৰ নহয়।
