Mexico:✒️গৰ্ভত সন্তান ধাৰণ, জন্মদান, প্রথম মাতৃত্বৰ স্বাদ- সেয়াতো এক স্বর্গীয় অনুভূতি। যুগ যুগ ধৰি এয়াই জীৱনৰ শ্রেষ্ঠতম মুহূর্ত বুলি বিবেচিত হৈ আহিছে। নাৰী হওক বা পুৰুষ, নৱজাতকৰ আগমনৰ লগে লগে অভিভাৱকৰূপে নৱজন্ম লাভ কৰে পিতৃ-মাতৃয়েও। সময় যিমানে আগুৱাই আহিছে, সন্তান জন্মৰ পদ্ধতি সিমানেই আধুনিক আৰু প্রায় যন্ত্রণাহীন হৈ আহিছে।ইয়াৰ অন্তৰালত আছে উন্নততৰ প্রযুক্তি।
অৱশ্যে সম্প্রতি মেক্সিকোৰ এগৰাকী মহিলাই যিদৰে মাতৃত্বৰ স্বাদ পালে, তাক যাদু বুলি ক’লেও হয়তো অত্যুক্তি নহ’ব। পদ্ধতি অৱশ্যে পৰিচিত- আইভিএফ; কিন্তু সেই কাম চিকিৎসক বা নাৰ্ছে কৰা নাই।আইভিএফৰ সমস্ত পদ্ধতি সম্পাদন হৈছে ‘এআই’ বা কৃত্রিম বুদ্ধিমত্তাৰ সাহায্যত। দাবী কৰা হৈছে যে চিকিৎসা বিজ্ঞানততো হয়েই, আনকি প্ৰযুক্তিৰ ইতিহাসতো ই এক বিপ্লৱ।
সম্প্রতি মেক্সিকোৰ গুয়াডালজাৰা চহৰত এগৰাকী ৪০ বছৰীয়া মহিলাৰ কোলা শুৱনি কৰি আহিছে এটি নৱজাতক আইভিএফ পদ্ধতিত শিশুটিৰ জন্ম হৈছে। অৱশ্যে নেপথ্যত সকলো কাম কৰিছে পৃত্রিম বুদ্ধিমত্তাই। নিউ য়ৰ্কৰ এটা সংস্থা ইমানেই উন্নত প্রযুক্তি নির্মাণত সক্ষম বুলি দাবী কৰা হৈছে। সংস্থাটোৱে দাবী কৰিছে যে মেক্সিকোৰ সেই মহিলাগৰাকীৰ মাতৃ হোৱাৰ ঘটনাই সন্তান উৎপাদনৰ পদ্ধতিক এক বিপ্লৱত পৰিণত কৰিছে।
ভৱিষ্যতে এই পথৰে বাট বুলিবলৈকে আগ্রহী হ’ব ভাবী পিতৃ-মাতৃসকল।এতিয়া প্রশ্ন হ’ল, এই পদ্ধতি আচলতে কি? সাধাৰণ আইভিএফ পদ্ধতিত ইন্ট্রাছাইট’প্লাজম স্পার্ম ইঞ্জেকচন বা ‘আইচিএছআই’ পদ্ধতি প্রয়োগ কৰা হয়। সেই পদ্ধতিত এটা শুক্রাণুক এটা ডিম্বাণুৰ ভিতৰত প্ৰৱেশ কৰোৱা হয়। এই পদ্ধতি সততে শংকাজনক। শুক্রাণু-ডিম্বাণুৰ নিষেক সঠিকভাবে নহ’লে সমগ্র পদ্ধতিটোৱেই বাতিল হৈ যায়।
কোনো বিশেষজ্ঞ চিকিৎসকে এই কাম কৰিলেও ‘হিউমেন এৰ’ৰ’ক লৈ অনিশ্চয়তা থাকিয়ে যায়। এতিয়া সেই ‘ভুল’খিনি নিৰাময় কৰিবলৈকে এআই বা কৃত্রিম বুদ্ধিমত্তাৰ সাহায্য লৈছে নিউ য়ৰ্কৰ সেই সংস্থাটোৱে। এই কামৰ বাবে এআই ৰবট নিয়োগ কৰা হৈছে। ‘আইচিএছআই’ৰ সমস্ত পদ্ধতিটো যাতে সঠিকভাৱে সম্পন্ন হয়, তাৰ বাবে ২৩টা স্তৰত ৰবটটোক নির্মাণ কৰা হৈছে। কাঁটাই কাঁটাই দক্ষতাৰে প্ৰতিটো স্তৰ সম্পন্ন কৰাত সক্ষম সেই ৰবট। নিউ য়ৰ্কৰ এই সংস্থাত এআই ৰবটৰ সাহায্য লৈ মুঠ পাঁচটা ভ্রূণ তৈয়াৰৰ চেষ্টা কৰিছিল। প্ৰথমটো ব্যর্থ হয়। দ্বিতীয়ৰ পৰা সফলতা আহে। ইয়াৰ ভিতৰত মেক্সিকোৰ সেই মহিলাই ইতিমধ্যেই সন্তান জন্ম দিছে। বাকী তিনিটা ভ্রূণ লাহে লাহে বিকশিত হৈ থকা বুলি সংস্থাটোৱে দাবী কৰিছে।
মাতৃত্বক লৈ দীর্ঘদিন ধৰি গৱেষণা অব্যাহত ৰখা এজন চিকিৎসকৰ মতে, আইভিএফ আৰু এআইৰ এই সংযোগত এক ঐতিহাসিক ঘটনা ঘটিবলৈ গৈ আছে। যিসকলে কিবা নহয় কিবা জটিলতাৰ কাৰণে এতিয়াও পিতৃ-মাতৃ হ’ব পৰা নাই, তেওঁলোকৰ বাবে এই কৃত্রিম বুদ্ধিমত্তা আৰু আইভিএফ পদ্ধতি এক সুৱৰ্ণ সুযোগ। নিউ য়ৰ্কৰ সেই সংস্থাৰ অন্যতম প্রতিষ্ঠাপকে দাবী কৰিছে যে তেওঁলোক যিদৰে এই কামটোক আগুৱাই নি আছে, সেয়া সম্পূৰ্ণৰূপে সফল হ’লে আইভিএফৰ জটিলতা আৰু খৰচ বহুখিনি হ্রাস পাব। এটো লেবৰেটৰীত এআই ৰবটেই অনেক শুক্রাণু-ডিম্বাণুৰ মিলন ঘটাবলৈ সক্ষম হ’ব আৰু সেয়া হ’ব অতি সূক্ষ্মতা আৰু দ্রুততাৰে। কোনো দম্পতীয়েই আৰু সন্তানহীন হৈ থাকিব নালাগিব।