Viral video:✒️বিবাহৰ ‘কেক’ কটাক লৈয়ে কাজিয়াত লিপ্ত হ’ল নৱজীৱন আৰম্ভ কৰা দম্পতী। এনে এক ভিডিঅ’ সম্প্রতি সামাজিক মাধ্যমত ভাইৰেল হৈছে। এই ভিডিঅ’ত দেখা গৈছে যে বিবাহ অনুষ্ঠান উপলক্ষে অভ্যাগতৰ সমাগমৰ মাজতে শুভমুহূর্ত উদ্যাপন কৰিবলৈ এটা কেক অতি সুন্দৰকৈ সজাই কাটিবলৈ লৈছিল দম্পতীয়ে।
কিন্তু নৱপৰিণীতা পত্নীৰ পূৰ্বে তৰুণ স্বামীয়ে কেকৰ সোৱাদ ল’লে। তাকে দেখিয়েই একপ্রকাৰ হুলস্থূল আৰম্ভ কৰে তৰুণী পত্নীয়ে। সকলোৰে সন্মুখতে স্বামীক গালিও পাৰে। নববিবাহিতা পত্নীৰ গালি-গালাজ সহ্য কৰিব নোৱাৰি খঙতে কেকটো হাতেৰে দাঙি মজিয়ালৈ দলিয়াই দিয়ে দৰাই। এনে এক ভিডিঅ’ এতিয়া ভাইৰেল হৈছে। সামাজিক মাধ্যম ‘এক্স’ত লিছা নামৰ এটা একাউণ্টৰ পৰা এই ভিডিঅ’টো প’ষ্ট কৰা হৈছে।
ভিডিঅ’ত দেখা গৈছে যে নৱদম্পতীয়ে বিবাহ অনুষ্ঠান উদ্যাপনৰ বাবে আনন্দত মতলীয়া হৈ কেকটো সজাইছে।অতিথিসকলেও নবদম্পতীক আশীৰ্বাদ কৰাৰ বাবে তেওঁলোকৰ চৌপাশে থিয় দিছে। কেকটো অলপ পাছতে কটাৰ কথা। দৰা-কইনাই আনন্দৰে নাচি-বাগি কেকটো সজাই থকাৰ সময়তে সংগীতো বাজিছে। দেখা গৈছে যে দুয়ো নাচি নাচি কেকটোৰ ওপৰত ফল-মূলৰ টুকুৰা আদি ঢালিছিল।
তাৰ পাছত কেকটোৰ ওপৰত দুয়ো চেনিৰ গুড়িও ছটিয়াইছিল। এইদৰে দুয়ো কেক সজোৱাৰ কাম প্রায় সম্পূৰ্ণ কৰাৰ পাছত ঘটিল পয়মাল। কেক সজা সম্পূৰ্ণ হোৱাৰ পাছ মুহূর্ততে সামান্য কেক হাতত লৈ যুৱকজনে জিভাত লগাই সোৱাদৰ উমান লৈছিল। এই দৃশ্য দেখাৰ লগে লগে স্বামীক গালি পাৰিবলৈ আৰম্ভ কৰিলে নৱপৰিণীতা পত্নীয়ে। অৱশ্যে ভিডিঅ’ত দেখা অনুসৰি অতিথিসকলে বোধহয় পত্নীৰ কথা শুনিবলৈ পোৱা নাছিল।
কিন্তু পত্নীৰ কথা শুনি ক্ষুব্ধ হয় যুৱকজন। ক্রোধ সামৰিব নোৱাৰি কেকটো প্রচণ্ড জোৰেৰে মাটিলৈ দলিয়াই দিয়ে। এই ঘটনা সকলোৰে সন্মুখত ঘটাত অপ্রস্তুত হৈ কইনাগৰাকীয়ে বিবাহ গৃহ ত্যাগ কৰি বাহিৰলৈ ওলাই যায়। পাছে পাছে যায় দৰাও। ইয়াতে ভিডিঅ’টো শেষ হৈছে। এই ভিডিঅ’টো ভাইৰেল হোৱাই নহয়, বিভিন্নজনে স্বামীৰ ব্যৱহাৰক লৈ সমালোচনাও কৰিছে।
জীৱনৰ এনে এটা বিশেষ দিনত পত্নীক এইদৰে অপমান কৰা উচিত নহয় আৰু এজন লোকৰ স’তে গোটেই জীৱন কিদৰে কটাব সেয়া ভাবিব লাগে বুলি কৈছে।