Dibrugarh :
অসমৰ এগৰাকী উচ্চ শিক্ষিত বিবাহিতা মহিলাক ঘৃণনীয় জগতৰ নায়িকা সজোৱাৰ অভিযোগত গ্রেপ্তাৰ হ’ল এজন অভিযন্তা। তিনিচুকীয়াৰ গেলাপুখুৰী বৰদলৈ নগৰ পথৰ পৰা ডিব্ৰুগড় আৰক্ষীয়ে গ্রেপ্তাৰ কৰা প্রতিম বৰা নামৰ যান্ত্রিক অভিযন্তা (মেকানিকেল অভিযন্তা) জনে তেওঁৰ প্রাক্তন প্রেমিকাৰ ফটো কৃত্রিম বুদ্ধিমত্তা (এআই)ৰ সহায়ত বিকৃত কৰি মহিলা গৰাকীক আমেৰিকাৰ প’র্ণ জগতৰ স’তে সম্পর্ক থকা বুলি সামাজিক মাধ্যমত ভুৱা একাউন্টৰে প্রচাৰ চলায়। ভুক্তভোগীৰ অভিযোগৰ ভিত্তিত ডিব্ৰুগড় আৰক্ষীয়ে ডিব্ৰুগড় সদৰ থানাত ২৩৪/২৫ নম্বৰত ভাৰতীয় ন্যায় সংহিতাৰ ৩৩৬ (৪) /৩৫৬ (২)/৭৪/৭৫/২১৪/৩৫১ (২) ধাৰাত এটা গোচৰ ৰজু কৰি যোৱা নিশা বৰাক গ্রেপ্তাৰ কৰিছে।
দেওবাৰে তেওঁক আৰক্ষীয়ে আদালতত হাজিৰ কৰায়। আদালতে অভিযুক্তজনক পাঁচ দিনৰ বাবে আৰক্ষী জিম্মালৈ প্ৰেৰণ কৰে। আৰক্ষীয়ে অভিযুক্তজনৰ ঘৰৰ পৰা এটা লেপটপ, এটা কম্পিউটাৰ, হার্ড ডিস্ক, দুটা ম’বাইল ফোন, টেবলেট, কার্ড ৰীডাৰ, কে’বাখনো এটিএম, ছীমকার্ডসহ বহু সামগ্রী জব্দ কৰে। তেওঁৰ ম’বাইল ফোন আৰু কম্পিউটাৰৰ পৰা ভুক্তভোগীৰ বহুসংখ্যক ফটোও উদ্ধাৰ কৰা হৈছে বুলি আৰক্ষীয়ে জনায়।
সূত্রই জনোৱা মতে, ২০২০ লৈকে ভুক্তভোগী গৰাকীৰ স’তে অভিযুক্তজনৰ প্ৰেমৰ সম্পৰ্ক আছিল। তেতিয়া দুয়ো দিল্লীত বাস কৰিছিল। সেই সময়ত ভুক্তভোগী অধ্যয়নৰত আছিল। পৰৱৰ্তী সময়ত ২০২১ত ভুক্তভোগী ডিব্ৰুগড়ৰে এটা সম্ভ্রান্ত পৰিয়াললৈ বিয়া হোৱাৰ পাছৰে পৰা বৰাৰ স’তে তেওঁৰ কোনো সম্পর্ক নাছিল।
পৰৱৰ্তী সময়ত তেওঁ প্রাক্তন প্ৰেমিকাৰ নামত এটা ভুৱা একাউন্ট খুলি গোপনে চলাই আহে। তেতিয়াৰে পৰা তেওঁ প্রাক্তন প্রেমিকাৰ বিভিন্ন ফটো লৈ আপত্তিজনকভাৱে সামাজিক মাধ্যমত আপলোড কৰি আহে। এই দুষ্কাৰ্য কৰোতে তেওঁ মহিলা গৰাকীৰ পৰিয়াল তথা আত্মীয়সকলক সামাজিক মাধ্যমত ব্লক কৰি ৰাখে। গতিকে তেওঁলোক তাৰ এই অপৰাধমূলক কার্যকলাপৰ বিষয়ে জ্ঞাত হোৱা নাছিল। শেহতীয়াভাৱে প্রায় ডেৰমাহ পূর্বে তেওঁ সামাজিক মাধ্যমৰ এই ভুৱা একাউন্ট ‘পাব্লিক’ কৰি দিয়াৰ লগে লগে প্রাক্তন প্ৰেমিকাৰ বিকৃত ভিডিঅ’ৰ দৰ্শনকাৰীৰ সংখ্যা তীব্ৰগতিত বৃদ্ধি পায়।
আনকি এনে ভিডিঅ’ৰ দৰ্শনকাৰীৰ সংখ্যা কিছুদিনৰ ভিতৰতে ১০ লাখ পর্যন্ত হয়। পৈশাচিক মানসিকতাৰে সংঘটিত কৰা এই অপৰাধৰ জৰিয়তে তেওঁ বর্তমানলৈ ১০ লাখ টকা উপার্জন কৰা বুলি সূত্রই জনায়। ইপিনে, দেওবাৰে ঘটনা সংক্রান্তত ডিব্ৰুগড়ৰ ভাৰপ্ৰাপ্ত আৰক্ষী অধীক্ষক ছিজল আগৰৱালাই সাংবাদিকৰ আগত কয়, ‘আমি এটা অভিযোগ পালো আৰু এই অভিযোগৰ ভিত্তিত কালি এটা গোচৰ পঞ্জীয়ন কৰা হয়। অভিযোগকাৰীয়ে ইনস্টাগ্রামৰ এটা ‘পেজ’ দিছিল আৰু পেজটো পুংখানুপুংখভাবে অধ্যয়ন কৰি ইয়াৰ সবিশেষ অনুসন্ধান কৰোতে এটা ম’বাইল ফোনৰ নম্বৰ পাওঁ আৰু নম্বৰটো হৈছে ধৃত প্রতিম বৰাৰ।
অভিযোগকাৰীক এই বিষয়ে সোধাত বৰা তেওঁৰ একালৰ সহপাঠী বুলি জনায়।’ তদন্তকাৰী আৰক্ষীয়ে সকলো চালি-জাৰি চাই প্রতিমেই এই সকলো বিকৃত ভিডিঅ’ আৰু ফটো আপলোড কৰাটো নিশ্চিত কৰে বুলি আৰক্ষী অধীক্ষকগৰাকীয়ে জনায়। তেওঁ লগতে জনোৱা মতে, জব্দকৃত ইলেক্ট্র’নিক সামগ্ৰীৰ লগত বহু প্রক্রিয়া জড়িত হৈ আছে। এইসমূহ পৰীক্ষা কৰি ইয়াৰ লগত জড়িত লোকসকল তদন্তৰ আওতালৈ অনাৰ সম্ভাৱনাও তেওঁ ব্যক্ত কৰে।
তেওঁ লগতে কয়, ‘নেটত বা সামাজিক মাধ্যমত যিকোনো এটা বস্তু প্রত্যক্ষ কৰিলে তাৰ সত্যসত্যতা নিৰূপণ কৰি ল’ব লাগে। প্রথম অৱস্থাত অভিযুক্তই ব্যক্তিগত আখেজৰ বাবে মহিলা গৰাকীক হাৰাশাস্তি কৰি আছিল। কিন্তু পৰৱৰ্তী সময়ত এই ইনস্টাগ্রাম পেজৰ পৰা তেওঁ টকা লাভ কৰিবলৈ ল’লে। এনেদৰে লোভ বাঢ়ি যোৱাত তেওঁ বিকৃত ফটো আৰু ভিডিঅ’ আপলোডক টকা ঘটাৰ আহিলাৰূপে ব্যৱহাৰ কৰিবলৈ ধৰিলে।
এতিয়ালৈকে প্রায় ডেৰ লাখ টকা ঘটিছে।’ আৰক্ষী অধীক্ষকে লগতে জনোৱা মতে, ভুৱা প্রফাইল, জি-মেইল, ইনস্টাগ্রাম, ৱেব ক্রিয়েটত ব্যৱহৃত সংশ্লিষ্ট প্রতিষ্ঠানসমূহৰ আৰক্ষীয়ে বিচাৰিব। সূত্ৰই জনোৱা মতে, এই সমগ্র অপৰাধৰ যিসকলে ভিডিঅ’ ক্ৰয় কৰিছিল বা যিসকলে অশ্লীল মন্তব্য কৰিছিল তেওঁলোকৰ তথ্যও পোহৰলৈ আহিব। আনহাতে, যিসকল ইউটিউবাৰে এইসমূহ ঘটনা সামাজিক মাধ্যমৰ জৰিয়তে বিয়পাই দিছিল তেওঁলোকৰ বিৰুদ্ধে ব্যৱস্থা গ্ৰহণৰ সম্ভাৱনাও সূত্রই ব্যক্ত কৰিছে।
