Indo-Bangladesh Conflict:
:বাংলাদেশী অনুপ্ৰৱেশকাৰীক বিতাড়ন প্রক্রিয়া ৰাজ্য চৰকাৰে শেহতীয়াভাৱে ত্বৰান্বিত কৰিছে। অনুপ্ৰৱেশৰ পাছ মুহূৰ্ততে সীমান্তত যিসকল লোক ধৰা পৰিছে সেইসকলক প্রয়োজনীয় আইনী ব্যৱস্থা গ্রহণ কৰি তাৎক্ষণিকভাবে ওভতাই পঠিওৱা হৈছে। বাংলাদেশৰ সীমান্ত বাহিনী (বিজিবি) য়েও তেনে লোকসকলক নিজৰ দেশৰ বুলি নিশ্চিত কৰি ঘুৰাই লৈছে। ইয়াৰ বিপৰীতে অসমৰ বিদেশী ন্যায়াধিকৰণে অনুপ্রৱেশকাৰী বুলি চিনাক্ত কৰাসকলক ‘পুছবেক’ নীতিৰে বিতাড়নৰ যি প্রক্রিয়া ৰাজ্য চৰকাৰে অব্যাহত ৰাখিছে সেই ক্ষেত্রত বাংলাদেশে শেহতীয়াকৈ গ্রহণ কৰিছে কঠোৰ স্থিতি।
বাংলাদেশৰ সীমান্তৰ ভিতৰলৈ ঠেলি দিয়া অনুপ্রৱেশকাৰী বুলি চিহ্নিত লোকসকলক বিজিবিয়ে ধৰি ভাৰতৰ সীমান্ত সুৰক্ষা বাহিনী (বিএছএফ) ক হস্তান্তৰৰ চেষ্ট চলাইছে। এনে টনা-তাঁজোৰাত পৰি ৰাষ্ট্ৰহীন নাগৰিকত পৰিণত হৈছে এইসকল ‘পুছবেক’ নীতিৰে বিতাড়ন কৰা লোক। তেওঁলোকক বাংলাদেশেও গ্রহণ নকৰে আৰু ভাৰতেও গ্রহণ কৰা নাই। অৱশ্যে পর্যাপ্ত নথি-পত্র থকাসকলৰ ক্ষেত্ৰত ভাৰতে নমনীয় স্থিতি গ্রহণ কৰিবলগীয়া হৈছে।
তেনে এক ঘটনাত বিজিবিৰ কঠোৰ নিৰীক্ষণৰ বাবেই যোৱা ২৭ ডিচেম্বৰৰ মাজ নিশা বিতাড়ন কৰা এগৰাকী মহিলাসহ তিনিজন লোকক লৈ শেহতীয়াকৈ সৃষ্টি হৈছে টনা-আঁজোৰা অসম চৰকাৰৰ তথ্য অনুসৰি সেইদিনা নিশা দুইবজাত দক্ষিণ শালমাৰা-মানকাচৰ জিলাৰ বোৱালমাৰি চৰ আন্তর্জাতিক সীমান্তৰ ১০৫৯ নম্বৰ খুঁটিৰে বিতাড়ন কৰা হয় আয়েশা খাতুন (৪৮) নামৰ এগৰাকী মহিলাৰ লগতে ৰুক্তম আলী (৬০) আৰু ইদ্রিছ আলী (৪৬) নামৰ দুজন লোকক নগাঁৱৰ বিদেশী ন্যায়াধিকৰণে তেওঁলোকক অনুপ্রৱেশকাৰী বুলি ঘোষণা কৰিছিল আয়েশা খাতুনে দাবী কৰা মতে, তেওঁৰ ঘৰ নগাঁও জিলাৰ চামগুৰি আৰক্ষী থানাৰ অধীনৰ শালনাত। তেনেদৰে ৰুক্তম আলীয়ে দাবী কৰা মতে, তেওঁৰ ঘৰ নগাঁৱৰে কলিয়াবৰ আৰক্ষী থানাৰ অধীনৰ হাতীগাঁৱত আৰু ইদ্রিছ আলীৰো ঘৰ নগাঁৱৰে বহা থানাৰ অধীনত।
মাজনিশা ভাৰতৰ পৰা বিতাড়িত হোৱাৰ পাছত তিনিও বাংলাদেশৰ অভ্যন্তৰলৈ সোমাই যায়। তেওঁলোক উপস্থিত হয় বাগেৰহাট নামৰ এখন বজাৰত। সেই বজাৰতে বিজিবিয়ে তেওঁলোকক কৰায়ত্ত কৰে। শেহতীয়া তথ্য অনুসৰি সকলো পৰীক্ষাৰ অন্তত বিজিবিয়ে লোককেইজন ভাৰতৰ নাগৰিক বুলি নিশ্চিত হৈ বিএছএফক ঘূৰাই ল’বলৈ কয়। কিন্তু বিএছএফে বাংলাদেশৰ নাগৰিকক ভাৰতে ঘূৰাই নলয় বুলি জনাই দিয়ে। বিজিবিয়েও কোনো কাৰণতে ভাৰতৰ মানুহক বাংলাদেশে গ্ৰহণ নকৰে বুলি জনাই দিয়ে।
সম্প্রতি তিনিও বিজিবিৰ জিম্মাত আছে। যদিহে ভাৰতে নিজৰ স্থিতি শীঘ্ৰে স্পষ্ট নকৰে তেন্তে বিজিবিয়ে বাংলাদেশৰ আইন অনুসৰি তেওঁলোকৰ বিৰুদ্ধে গোচৰ ৰুজু কৰি বিহিত ব্যৱস্থা গ্রহণ কৰিব। উল্লেখ্য যে নলবাৰীৰ বৰকুৰাৰ বাসিন্দা বুলি দাবী কৰা ছাকিনা খাতুন নামৰ এগৰাকী বয়োজ্যেষ্ঠা মহিলা অলপতে এনে কাৰণতে বাংলাদেশৰ কাৰাগাৰত বন্দী হ’বলগীয়া হয়। অবশেষত আশয় দিয়া বাংলাদেশৰে এটা পৰিয়ালৰ সহযোগত সম্প্রতি খাতুন জামিনত আছে যদিও পুনৰ বন্দী হোৱাৰ পূৰ্ণ সম্ভাৱনা আছে।