Center has banned TRP ratings:
ভাৰতত চাৰি সপ্তাহৰ বাবে নিউজ চেনেলৰ টি আৰ পি নিষিদ্ধ কৰা হৈছে ৷ পশ্চিম এছিয়াত চলি থকা যুদ্ধৰ মাজতে তথ্য আৰু সম্প্ৰচাৰ মন্ত্ৰালয়ে এক বৃহৎ পদক্ষেপ গ্ৰহণ কৰিছে। তৎকালীনভাৱে কাৰ্যকৰী হোৱাকৈ নিউজ টিভি চেনেলসমূহে টেলিভিছন ৰেটিং পইণ্টৰ ৰিপ’ৰ্ট বন্ধ কৰি দিছে চৰকাৰে।
উল্লেখ্য যে ইজৰাইল-ইৰাণ যুদ্ধৰ সন্দৰ্ভত নিউজ চেনেলসমূহে কৰা অপ্ৰয়োজনীয় চাঞ্চল্য আৰু জল্পনা-কল্পনাৰ বাতৰিৰ প্ৰতি লক্ষ্য ৰাখি এই সিদ্ধান্ত লোৱা হৈছে। চৰকাৰৰ মতে ৰেটিংৰ অন্ধ দৌৰৰ ফলত ব্ৰেকিং নিউজৰ নামত বিভ্ৰান্তিকৰ তথ্য প্ৰচাৰ কৰা হৈছে।
মনকৰিবলগীয়া যে ,তথ্য আৰু সম্প্ৰচাৰ মন্ত্ৰালয়ে BARC ক স্পষ্ট নিৰ্দেশনা জাৰি কৰি কয় যে অহা চাৰি সপ্তাহৰ বাবে বা পৰৱৰ্তী জাননী নিদিয়ালৈকে নিউজ চেনেলৰ ৰেটিং ৰিপৰ্ট বন্ধ কৰি দিব লাগে। ২০১৪ চনৰ ১৬ জানুৱাৰীৰ মিডিয়া পলিচি গাইডলাইনৰ উদ্ধৃতি দি মন্ত্ৰালয়ে এই সিদ্ধান্ত জনস্বাৰ্থত প্ৰয়োজনীয় বুলি উল্লেখ কৰে।
উল্লেখযোগ্য মধ্যপ্ৰাচ্যত ২৮ ফেব্ৰুৱাৰীৰ পৰা ইজৰাইল আৰু ইৰাণৰ সংঘাত আৰম্ভ হোৱাৰ পিছৰে পৰা বৰ্তমানলৈকে অব্যাহত আছে তয়াময়া যুদ্ধ ৷ আমেৰিকা-ইজৰাইলৰ যৌথ আক্ৰমণৰ পিছত ইৰাণেও উভতি ধৰিছে ইজৰাইল আৰু মধ্য প্ৰাচ্যৰ দেশ সমূহত থকা মাৰ্কিন সেনাৰ ঘাটিত ৷ ইৰাণে আক্ৰমণ তীব্ৰতৰ কৰি তুলিছে।
ইয়াৰ ফলত খাৰুৱা তেলৰ মূল্য বৃদ্ধি আৰু শ্বেয়াৰ বজাৰত অস্থিৰতা বৃদ্ধি পাইছে। বৃহৎ সংখ্যক ভাৰতীয় নাগৰিক যুদ্ধবিধ্বস্ত অঞ্চলত আবদ্ধ হৈ আছে, আৰু সীমিত বিমান চলাচলৰ বাবে তেওঁলোকৰ উভতি অহাত পলম হৈছে।
এনে পৰিস্থিতিত যুদ্ধৰ পৰিবেশ গ্ৰাফিক্স আৰু ভয়ংকৰ শব্দৰে ৰিপৰ্ট কৰিলে তেওঁলোকৰ সুৰক্ষাৰ প্ৰতি ভাবুকি কঢ়িয়াই আনিব পাৰে। বাণিজ্যিক লাভতকৈ সাংবাদিকতাৰ নৈতিকতাই অগ্ৰাধিকাৰ লাভ কৰে। এক নম্বৰত থাকিবলৈ ভাৰতীয় নিউজ চেনেলসমূহে প্ৰায়ে যুদ্ধক মনোৰঞ্জন হিচাপে উপস্থাপন কৰে।
টি আৰ পিৰ ওপৰত এই অস্থায়ী স্থগিতাদেশে চেনেলসমূহক তথ্যভিত্তিক প্ৰতিবেদনলৈ ঘূৰি আহিবলৈ অনুমতি দিব বুলি কেন্দ্ৰীয় চৰকাৰৰ নিৰ্দেশনাটোত স্পষ্ট কৰি দিয়ে ৷
