AASU:
সদৌ অসম ছাত্ৰ সন্থাই আজি অসমৰ মুখ্য নির্বাচনী বিষয়ালৈ এখন দাবী পত্র প্ৰেৰণ কৰি ভোটাৰ তালিকাৰ বিশেষ সংশোধনীৰ পোষকতাৰে কয় যে ছাত্র সন্থাই অসমত ভোটাৰ তালিকাৰ বিশেষ সংশোধন বিচাৰিছে। কিন্তু খিলঞ্জীয়া মুছলমান মানুহ সমস্যাৰ সন্মুখীন হ’ব নালাগে। ছাত্র সন্থাৰ স্পষ্ট মত-অবৈধ বাংলাদেশীৰ নাম ভোটাৰ তালিকাৰপৰা কৰ্তন হ’বই লাগিব।
ছাত্ৰ সন্থাৰ সভাপতি উৎপল শর্মা আৰু সাধাৰণ সম্পাদক সমীৰণ ফুকনে এই সন্দৰ্ভত সদৰি কৰি কয় যে- অসম অবৈধ বাংলাদেশীৰ অনুপ্ৰৱেশৰ সমস্যাৰে ভাৰাক্ৰান্ত এখন বাজ্য। অবৈধ বাংলাদেশীয়ে অসমৰ ভোটাৰ তালিকাত নাম সন্নিৱিষ্ট কৰিছে। অসম আন্দোলনৰ সময়ৰপৰাই অসমৰ ৰাইজ আৰু ছাত্ৰ সন্থাই এই বিষয়টো উত্থাপন কৰি আহিছে। বহুতো সমষ্টিত জন প্রতিনিধি কোন হ’ব সেয়া সন্দেহযুক্ত বাংলাদেশীৰ ভোটে নির্ধাৰণ কৰাৰ উপক্ৰম হৈছে। তেনে প্রেক্ষাপটত অসমত ভোটাৰ তালিকাৰ বিশেষ সংশোধনৰ প্রয়োজন আছে। সদৌ অসম ছাত্র সন্থাই স্পষ্টভাবে অসমত ভোটাৰ তালিকাৰ বিশেষ সংশোধনীৰ পোষকতা কৰে। অসমৰ ভোটাৰ তালিকাৰপৰা অবৈধ বাংলাদেশীৰ নাম কর্তন কৰিবলৈ সকলো কঠোৰ, আইনগত ব্যৱস্থা গ্রহণ কৰিব লাগে।
কিন্তু শেহতীয়াকৈ ভোটাৰ তালিকাৰ বিশেষ সংশোধনৰ সময়ত বিভিন্ন স্থানত খিলঞ্জীয়া লোকে জাননী লাভ কৰা পৰিলক্ষিত হৈছে। বহুকেইখন জিলাত যথেষ্ট সংখ্যক খিলঞ্জীয়া মুছলমান পৰিয়াললৈ জাননী জাৰি কৰা হৈছে। এনে ঘটনাই খিলঞ্জীয়া মানুহৰ মাজত অসন্তোষ সৃষ্টি কৰাৰ লগতে ভোটাধিকাৰ হেৰুৱাব পাৰে বুলি সংশয়ৰ জন্ম দিছে।
নির্বাচন আয়োগলৈ ছাত্ৰ সন্থাৰ স্পষ্ট দাবী- বিশেষ সংশোধনী প্রক্রিয়াটো আগবঢ়াই নিওঁতে নির্বাচন আয়োগ আৰু অধিক সংবেদনশীল, দায়িত্বশীল হ’ব লাগে। যিসকল খিলঞ্জীয়া মুছলমান লোকলৈ জাননী জাৰি কৰা হৈছে তেওঁলোক কোনো সমস্যাৰ সন্মুখীন নোহোৱাকৈ অগ্ৰাধিকাৰৰ ভিত্তিত বিষয়টোৰ স্থায়ী সমাধান কৰিব লাগে।
