বিধানসভা নির্বাচন আসন্ন হৈ উঠাৰ সময়ত মুখ্যমন্ত্রী ড° হিমন্ত বিশ্ব শর্মাই ঘোষিত বিদেশী বহিষ্কাৰত তৎপৰতা দেখুৱাবলৈ গৈ চুবুৰীয়া বাংলাদেশৰে ভাৰতৰ কূটনৈতিক সম্পর্ক জটিল কৰি তোলাৰ আভাস স্পষ্ট হৈছে।
কাৰণ মুখ্যমন্ত্রীৰ এই কাৰ্য সমস্যাটোৰ সমাধানত কিমান ফলপ্রসূ হ’ব তাক লৈ সন্দিহান হৈছে বহুজন। উল্লেখ্য যে স্পর্শকাতৰ অবৈধ বিদেশী সমস্যাক লৈ মুখ্যমন্ত্রীয়ে মন্তব্য কৰি আহিছে যে জিলা আয়ুক্তসকলে বিদেশী ন্যায়াধিকৰণৰ দ্বাৰা ঘোষিত বিদেশীসকলক ১০ দিনৰ ভিতৰত দেশৰ পৰা বহিষ্কাৰ কৰিব পাৰে।
জিলা আয়ুক্তসকলক অনুপ্রবেশকাৰী (অসমৰ পৰা বহিষ্কাৰ) আইন, ১৯৫০ এ এই অধিকাৰ প্ৰদান কৰিছে। উচ্চতম ন্যায়ালয়ে উক্ত আইনক লৈ জাৰি কৰা এক নির্দেশৰ ভিত্তিত বিদেশী ন্যায়াধিকৰণে বিদেশী ঘোষণা কৰা ব্যক্তিয়ে ২৪ ঘণ্টাৰ ভিতৰত নাগৰিকত্ব প্ৰমাণ কৰিব নোৱাৰিলে তেনে ব্যক্তিক ১০ দিনৰ ভিতৰত জিলা আয়ুক্তসকলে বহিষ্কাৰ কৰি আহিছে বুলিও মুখ্যমন্ত্রীয়ে ঘোষণা কৰি আহিছে।
আৰক্ষীয়ে এনে বিদেশী নাগৰিকক বাংলাদেশলৈ পিছুৱাই (পুছ বেক) কৰি আহিছে। কিন্তু অসম চৰকাৰৰ এই কাৰ্যই ঢাকাৰ স’তে দেশৰ কূটনৈতিক সম্পর্ক জটিল কৰি তোলাৰ তথ্য শেহতীয়াভাৱে পোহৰলৈ আহিছে। উচ্চস্তৰীয় সূত্রই জনেৱা মতে, কূটনৈতিক মাধ্যমেৰে পূৰ্বপুৰুষৰ নথিপত্র পৰীক্ষণ অবিহনে কাকোৱেই গ্রহণ কৰা নহ’ব বুলি ইতিমধ্যে নতুন দিল্লীস্থিত বাংলাদেশী উচ্চায়ুক্তই দেশৰ বৈদেশিক মন্ত্রণালয়ক স্পষ্ট কৰি দিছে। ইয়াৰ দ্বাৰা স্পষ্ট হৈছে যে অসমে পুছ বেক কৰা বিদেশীৰ বিষয়টো বাংলাদেশ চৰকাৰে সহজভাবে লোৱা নাই।
সূত্রই জনোৱা মতে, বিদেশী ঘোষিতক সীমান্তৰে বহিষ্কাৰ কৰা কাৰ্যই কোনো উদ্দেশ্য পূৰণ নকৰে বুলি বাংলাদেশৰ উচ্চায়ুক্তই দেশৰ বৈদেশিক মন্ত্রণালয়ৰ বাংলাদেশ আৰু ম্যানমাৰ শাখাক অৱগত কৰিছে। এনেদৰে বাংলাদেশলৈ বহিষ্কাৰ কৰাসকল পুনৰ ভাৰতৰ ভূমিত প্ৰৱেশ কৰিবলৈ চেষ্টা কৰাটো নিয়মমাফিক ঘটনাত পৰিণত হৈছে বুলিও সূত্রই জনায়।
এই সম্পর্কত সূত্রই কয়, ‘যদি বাংলাদেশে পুছ বেক কৰা সকলক গ্রহণ নকৰে তেন্তে দুয়ো দেশৰ নিৰপেক্ষ অঞ্চল বা ন’ মেনছ লেগুলৈ কৰা এনে পুছ বেকে কোনো আকাংক্ষিত ফল নিদিয়ে। তাৰ পৰিৱৰ্তে বাংলাদেশে এইসকলক পুনৰ ভাৰতৰ ভূমিলৈ বা ন’ মেনছ লেগুলৈ ঘূৰাই পঠিয়াইছে।’
এই সম্পর্কত সূত্রই লগতে জনায় যে বিদেশী নাগৰিকৰ এই জটিল সমস্যা সমাধানৰ বাবে ভাৰত-বাংলাদেশ উভয়ে বুজাবুজিবে কাম কৰিব লাগিব। উল্লেখ্য যে শ্বেইখ হাছিনা চৰকাৰৰ পতনৰ পাছৰে পৰা ভাৰত-বাংলাদেশৰ সম্পর্ক জটিল হৈ আছে। এনে অৱস্থাতে অসম চৰকাৰে ঘোষিত বিদেশী দেশখনলৈ বহিষ্কাৰ কৰি আছে। এই সম্পর্কত সূত্রই লগতে উল্লেখ কৰে যে অসমৰ পৰা পুছ বেক কৰা এজন ব্যক্তিক পুনৰ ভাৰতলৈ ঘূৰাই অনা হয়। গতিকে চুবুৰীয়া দেশখনলৈ পুছ বেক কাৰ্য অসম চৰকাৰে কৰা লেখীয়াকৈ একপক্ষীয়ভাবে সম্ভর নহয় বুলিও সূত্রই ইংগিত দিছে।
উল্লেখ্য যে বৰ্তমানে অসমৰ চাৰি ঠাইৰ বন্দী শিবিৰত ৪৫ জন ঘোষিত বাংলাদেশী নাগৰিকক আটক কৰি ৰখা হৈছে। এইসকল বাংলাদেশী নাগৰিক গুৱাহাটী কেন্দ্ৰীয় কাৰাগাৰ, ধুবুৰী জিলা কাৰাগাৰ, কৰিমগঞ্জ জিলা কাৰাগাৰ আৰু গোৱালপাৰাৰ মাটিয়া বন্দী শিবিৰত ৰখা হৈছে।
আনহাতে, চৰকাৰী তথ্য অনুসৰি ২০২১ৰ মে’ৰ পৰা ২০২৫ৰ নৱেম্বৰলৈ অসমৰ পৰা ১,৫১৭ বিদেশীক বহিষ্কাৰ বা প্রত্যর্পণ কৰা হয়। তদুপৰি উক্ত সময়ছোৱাত বিভিন্ন বিদেশী ন্যায়াধিকৰণে ৫৯,৭৫৭ টা গোচৰ নিষ্পত্তি কৰে। এই গোচৰসমূহত ৩০,২৬৪ জন ব্যক্তিক বিদেশী আৰু ১৫,৩৯৫ জনক বিদেশী নহয় বুলি ঘোষণা কৰা হয়। আনহাতে, ৭৭,৮৮৩ টা গোচৰ নিষ্পত্তিহীন হৈ আছে।
লক্ষ্যণীয়ভাবে কালি গুৱাহাটীত গণৰাজ্য দিৱসৰ অনুষ্ঠানত ৰাজ্যপাল লক্ষ্মণ প্রসাদ আচাৰ্যই কয় যে প্রতিষ্ঠাৰ সময়ৰে পৰা বিদেশী ন্যায়াধিকৰণসমূহলৈ যোৱা বছৰৰ ৩১ অক্টোবৰলৈকে ৪.৩৫ লাখ গোচৰ প্ৰেৰণ কৰে ৰাজ্য চৰকাৰে। ইয়াৰে ১.৭ লাখক বিদেশী ন্যায়াধিকৰণসমূহে বিদেশী বুলি ঘোষণা কৰে। আশ্চর্যজনকভাবে এই ঘোষিত বিদেশীসকলৰ ৪৬৭জনকহে দেশৰ পৰা বহিষ্কাৰ কৰা হৈছে বুলি ৰাজ্যপালে সদৰী কৰে। আনহাতে, মুখ্যমন্ত্রী ড° শৰ্মাই দাবী কৰি আহিছে যে অসমত অবৈধভাৱে বাস কৰা প্ৰায় দুহেজাৰ বিদেশীক পুছ বেক কৰা হয়।
শেহতীয়া ৰাষ্ট্রনীতিৰ আধাৰত প্ৰতি বছৰে ১০ৰ পৰা ১৫ হেজাৰ ঘোষিত বিদেশীক অসমৰ পৰা বহিষ্কাৰ কৰিব পৰা হ’ব বুলিও মুখ্যমন্ত্রীয়ে আশা প্রকাশ কৰি আহিছে।