Nepal Bus Accident :
চুবুৰীয়া হিমালয়ান ৰাষ্ট্ৰ নেপালত শিহৰণকাৰী পথ দুৰ্ঘটনা ৷ সোমবাৰে পুৱতি নিশা ১:১৫ বজাত পোখাৰাৰ পৰা কাঠমাণ্ডুলৈ গৈ থকা অৱস্থাত এখন যাত্ৰীবাহী বাছ ঢাডিং জিলাৰ ত্ৰিশুলি নদীত বাগৰি পৰে ৷ দুৰ্ঘটনাটোত ১৮ জন লোকৰ মৃত্যু হোৱা বুলি নিশ্চিত হোৱাৰ বিপৰীতে ২৫ জন যাত্ৰী আহত হৈছে। বেনিঘাট ৰোৰাং গ্ৰাম্য পৌৰসভা-৩ৰ চিনাধৰা, চৰাউণ্ডি অঞ্চলত সংঘটিত হয় এই দুৰ্ঘটনা। পৃথ্বী ৰাষ্ট্ৰীয় ঘাইপথত গৈ থকা বাছখন হঠাতে পথৰ পৰা পিছলি প্ৰায় ৩০০ মিটাৰ ঠেক ঢালৰ পৰা নদীত ডুব যায়। বাছখন বিধ্বস্ত অৱস্থাত উদ্ধাৰ কৰে উদ্ধাৰকাৰী দলে
কাঠমাণ্ডু জিলা যান-বাহন আৰক্ষী অধীক্ষক শিশিৰ থাপাই উল্লেখ কৰিছে যে মৃত লোকসকলৰ ভিতৰত ৬ গৰাকী মহিলা আৰু ১১ জন পুৰুষ আছে। আহতসকলৰ ভিতৰত আছে ৮ গৰাকী মহিলা, ১৮ গৰাকী পুৰুষ আৰু এগৰাকী নাবালিকা ছোৱালী। কিছু সংখ্যক যাত্ৰীৰ অৱস্থা সংকটজনক বুলি জানিব পৰা গৈছে।
দুৰ্ঘটনাটোৰ পিছতে নেপালী সেনা, সশস্ত্ৰ আৰক্ষী বাহিনী, নেপাল আৰক্ষী, আৰু স্থানীয় বাসিন্দাসকলে একত্ৰিত হৈ উদ্ধাৰ আৰু সাহায্য অভিযানত অংশগ্ৰহণ কৰে। গভীৰ নিশা আৰু পাহাৰীয়া ভূখণ্ডই উদ্ধাৰ কাৰ্যত বাধাৰ সৃষ্টি কৰিছে যদিওউদ্ধাৰকাৰী দলে যুদ্ধকালীন তৎপৰতাৰে নিজৰ কাম অব্যাহত ৰাখিছে। আনহাতে প্ৰশাসনে উল্লেখ কৰিছে যে দুৰ্ঘটনাৰ প্ৰকৃত কাৰণ তদন্তৰ অন্ততহে পোহৰলৈ আহিব।
উল্লেখ্য যে ইয়াৰ পূৰ্বেও চলিত মাহৰ ৬ ফেব্ৰুৱাৰীত নেপালৰ বৈতাদী জিলাৰ ১৫০ মিটাৰ দ খাৱৈত বিবাহযাত্ৰী কঢ়িয়াই অনা এখন বাছ ডুব যায়। সেই দুৰ্ঘটনাত ১৩ জন লোকৰ মৃত্যু হৈছিল আৰু ৩৪ জন আহত হৈছিল।কইনাক কঢ়িয়াই বাঝাংলৈ লৈ যোৱা বাছখনে বদগাঁও পাকত নিয়ন্ত্ৰণ হেৰুৱাইছিল। এই সঘনাই সংঘটিত দুৰ্ঘটনাবোৰে নেপালৰ পথ সুৰক্ষাক লৈ গুৰুতৰ প্ৰশ্নৰ উত্থাপন কৰিছে।
পাহাৰীয়া পথৰ দুৰ্বল অৱস্থা, তীব্ৰ বেগ আৰু ৰাতি দীৰ্ঘ দূৰত্বৰ যাত্ৰা প্ৰায়ে মাৰাত্মক বুলি প্ৰমাণিত হয়। দিনক দিনে নেপালত বাঢ়িছে পথ দুৰ্ঘটনা। এই শেহতীয়া দুৰ্ঘটনাটোৱে পুনৰ সকীয়াই দিছে যে আগন্তুক দিনত সংশ্লিষ্ট কৰ্তৃপক্ষই কঠোৰ ব্যৱস্থা গ্ৰহণ নকৰিলে এনে দুৰ্ঘটনা আৰু সম্ভাৱনা নুই কৰিব নোৱাৰি I
