Ranchi:✒️ৰাঁচীৰ বীৰছা মুণ্ডা বিমানবন্দৰ(Birsa Munda Airport)ৰ পৰা দিল্লীৰ উদ্দেশ্যে উৰা এখন এয়াৰ অ্যাম্বুলেন্স বিমান উৰাণৰ মাত্ৰ ২৩ মিনিট পাছতেই ৰাডাৰৰ পৰা অন্তৰ্ধান হয়। তাৰ কিছু সময় পাছতে ঝাৰখণ্ডৰ চত্ৰা জিলাৰ ছিমাৰিয়া অঞ্চলত বিমানখন দুৰ্ঘটনাগ্ৰস্ত অৱস্থাত উদ্ধাৰ কৰা হয়। এই শোকাৱহ ঘটনাত বিমানখনত থকা সকলোৰে মৃত্যু হৈছে।
তথ্য অনুসৰি, বিমানখন আছিল Redbird Airways Pvt Ltdৰ Beechcraft C90 ধৰণৰ এয়াৰ অ্যাম্বুলেন্স। সোমবাৰে সন্ধিয়া প্ৰায় ৭:১১ বজাত উৰা বিমানখন কিছু সময় পাছতে বিমান চলাচল নিয়ন্ত্ৰণ ব্যৱস্থা (Air Traffic Control)ৰ স’তে যোগাযোগ স্থাপন কৰিছিল। কিন্তু প্ৰতিকূল বতৰৰ বাবে পথ সলনি কৰাৰ অনুৰোধ কৰাৰ পিছতেই হঠাৎ যোগাযোগ বিচ্ছিন্ন হৈ পৰে।
প্ৰায় ৭:৩৪ বজাত, উৰাণৰ ২৩ মিনিট সম্পূৰ্ণ হোৱাৰ আগতেই বিমানখনৰ স’তে সকলো যোগাযোগ বন্ধ হৈ যায়। শেষবাৰৰ বাবে বিমানখনক ৰাডাৰত দেখা গৈছিল। তাৰ পিছতেই অনুসন্ধান আৰম্ভ কৰা হয় আৰু চত্ৰা জিলাৰ বনাঞ্চলত ধ্বংসাৱশেষ উদ্ধাৰ কৰা হয়।
বিমানখনত দুজন পাইলট, এজন ৰোগী, এজন চিকিৎসক, এজন পেৰামেডিক আৰু দুজন আত্মীয় আছিল। উদ্ধাৰকাৰী দলে ঘটনাস্থলীৰ পৰা সকলো দেহ উদ্ধাৰ কৰি মৰোনত্তৰ পৰীক্ষাৰ বাবে প্ৰেৰণ কৰিছে।
ঘটনাৰ তদন্ত আৰম্ভ কৰিছে নাগৰিক বিমান চলাচল মহাপৰিচালক দপ্তৰ (Directorate General of Civil Aviation )আৰু বিমান দুৰ্ঘটনা অনুসন্ধান ব্যুৰো(Aircraft Accident Investigation Bureau)য়ে। পাইলটৰ শেষ বাৰ্তা, প্ৰতিকূল বতৰৰ তথ্য আৰু বিমানখনৰ কাৰিকৰী দিশসমূহ খতিয়াই চাই দুৰ্ঘটনাৰ সঠিক কাৰণ নিৰ্ণয় কৰা হ’ব।
এই দুৰ্ঘটনাই পুনৰ এবাৰ দেশৰ বিমান সুৰক্ষাক লৈ গভীৰ চিন্তাৰ সৃষ্টি কৰিছে।