Israel-Iran Conflict:✒️মার্কিন ৰাষ্ট্রপতি ড’নাল্ড ট্রাম্পৰ কঠোৰ সকীয়নিত কেতিয়াও হাৰ নামানে বুলি ওলোটাই ভাবুকি দিছে ইৰানৰ ৰাষ্ট্ৰপতি মাছুদ পেজেস্কিয়ানে। ইয়াৰ বিপৰীতে ট্রাম্পলৈ কঠোৰ বাৰ্তা প্ৰেৰণ কৰি ৰাষ্ট্ৰপতি পেজেস্কিয়ানে প্রতিবেশী দেশসমূহৰ ওচৰত ক্ষমা মার্জনাও বিচাৰে। তেওঁ কয় যে ইৰানৰ বিৰুদ্ধে মার্কিন বা ইজৰাইলৰ আক্রমণত সহায়-সমর্থন নকৰিলে কোনো প্রতিবেশী দেশকে তেওঁলোকে আক্রমণ নকৰে। উপসাগৰীয় অঞ্চলৰ দেশসমূহৰ স’তে ইৰানৰ শত্রুতা নাই বুলিও স্পষ্ট কৰি দিয়ে।
ইপিনে, ট্রাম্পেও চর্তবিহীন আত্মসমর্পণ কৰিবলৈ ইৰানক হেঁচা দিছে যদিও তেহবানে ইজৰাইল আৰু উপসাগৰীয় অঞ্চলত ধাৰাবাহিকভাবে বিভিন্ন লক্ষ্যস্থলীত আক্রমণ কৰিয়ে আছে। আমেৰিকা আৰু ইজৰাইলৰ যুদ্ধই দ্বিতীয় সপ্তাহত ভৰি দিলে যদিও ক্ষান্ত হোৱাৰ কোনো লক্ষণ নাই। ট্রাম্পে ইৰানৰ বিৰুদ্ধে অতি কঠোৰ আক্ৰমণৰ ভাবুকি দিছে আৰু ইৰানৰ ভাষ্যৰ পৰিপ্ৰেক্ষিতত দাবী কবে যে ইৰানে চুবুৰীয়া দেশসমূহৰ ওচৰত আত্মসমর্পণ কৰিলে।
উল্লেখ্য যে মার্কিন-ইজৰাইলৰ যৌথ আক্ৰমণত ইৰানৰ সর্বোচ্চ নেতা আয়াতুল্লা আলী খামেনেইৰ মৃত্যুৰ পাছত প্রাথমিকভাৱে তেহৰানে এক অন্তর্বর্তী পৰিষদ গঠন কৰে। ৰাষ্ট্রপতি পেজেস্কিয়ানসহ তিনি সদস্যৰ পৰিষদৰ সম্প্রতি আছে দেশ চলোৱাৰ দায়িত্ব। পেজেস্কিয়ানে জনোৱা মতে এই অন্তর্বর্তী পৰিষদে প্রতিবেশী দেশসমূহত আক্রমণ নকৰাৰ সিদ্ধান্ত লৈছে।
উপসাগৰীয় অঞ্চলৰ কোনো দেশসমূহে যদি ইৰানক আক্রমণ নকৰে তেন্তে ইৰানেও আক্রমণ নকৰে বুলি সিদ্ধান্ত গ্রহণ কৰে বুলিও পেজেস্কিয়ানে কয়।
মার্কিন-ইজৰাইলৰ আক্ৰমণৰ প্ৰত্যুত্তৰত ভিন্ন দেশৰ মার্কিন ঘাটিত আক্রমণ চলাইছিল তেহৰানে। ইয়াকে লৈ কিছুমান দেশে সমালোচনা কৰিছে যে তেহৰানে শান্তিপূর্ণ দেশসমূহক অযথা যুদ্ধৰ মাজলৈ ঠেলি দিছে। অবশ্যে ইমানদিনে এনে কোনো সমালোচনাই টলাব পৰা নাছিল ইৰানক। তেওঁলোকৰ দাবী যে উদ্ভৱ হোৱা পৰিস্থিতিৰ বাবে দায়ী ইজৰাইল আৰু আমেৰিকা। কিয়নো তেওঁলোকে যুদ্ধ আৰম্ভ কৰা নাই। অৱশেষত এই সুৰ নৰম কৰিলে তেহৰানে। পেজেস্কিয়ানে দাবী কৰে যে সামৰিক বাহিনীৰ মাজত ভুল বুজাবুজিৰ বাবে এই পৰিস্থিতিৰ সৃষ্টি হৈছিল। এতিয়াৰে পৰা ইৰানে অযথা কোনো প্রতিবেশী দেশৰ বিৰুদ্ধে আক্রমণ নকৰে।
আনহাতে সম্প্ৰতি ট্রাম্পে কয় যে ইৰানে নিঃচর্ত আত্মসমর্পণ কৰিব লাগে। তাৰ পাছতেই ৰাষ্ট্ৰখনৰ নেতা নিৰ্বাচন কৰি উন্নয়নৰ কাম কৰিব ইৰানে। এই দাবীৰ প্ৰত্যুত্তৰ দি পেজেস্কিয়ানে কয়, ‘এয়া ট্রাম্পৰ এক সপোন। এই সপোন লৈয়ে তেওঁ সমাধিস্থ হ’ব লাগিব।’ প্রতিবেশীৰ বিৰুদ্ধে আগ্রাসন বন্ধ কৰিলেও ইৰানে এতিয়াও শিৰনত নকৰে বুলি স্পষ্ট কৰে।
উল্লেখ্য যে কালিও বাহৰেইন, জর্দান, ছৌদি আৰব, সংযুক্ত আৰব, আমিবশ্বাহিক ইৰানে আক্রমণ কৰে।তিনিদিনত ধ্বংসপ্রাপ্ত ইৰানৰ ৪২ খন নৌ যুদ্ধাস্ত্র মার্কিন ৰাষ্ট্ৰপতি ড’নাল্ড ট্রাম্পে দাবী কৰে যে তিনিদিনত নৌ যুদ্ধাস্ত্র ধ্বংস কৰা হৈছে। ইপিনে, ইৰানৰ জল বিশুদ্ধিকৰণ কেন্দ্ৰত আমেৰিকাই আক্ৰমণ কৰা বুলি অভিযোগ কৰে ইৰানৰ বৈদেশিক মন্ত্রী আব্বাছ আৰাঘচিয়ে। এই কেন্দ্ৰটোক সাগৰৰ লুণীয়া পানীক পেয় জললৈ পৰিশোধিত কৰা হয়। ইৰানে দাবী কৰে যে আক্ৰমণৰ ফলত ৩০ খন গাঁৱলৈ বিশুদ্ধ খোৱাপানী সৰবৰাহ ব্যাহত হৈছে।
আক্রমণ-প্রত্যাক্রমণ
ইৰানী সেনাই কালি পুনৰ সকীয়নি দিয়ে যে মার্কিন আৰু ইজৰাইলৰ সামৰিক ঘাটি আক্ৰমণৰ মূল লক্ষ্য হ’ব। আজিও লেবাননৰ চহৰত ইজৰাইলৰ আকাশী-স্থল অভিযানৰ ফলত কমেও ৫০ জন লোকে প্রাণ হেৰুৱায়। লেবাননৰ স্বাস্থ্য মন্ত্রীয়ে কয় যে হিজবুল্লা আৰু ইজৰাইলী সেনাৰ মাজত ছিৰিয়াৰ সীমান্তবর্তী বেকা উপত্যকাত সংঘাতৰ ফলত এই নিৰীহ নাগৰিকসকলে প্রাণ হেৰুৱালে। একে সময়তে ইজৰাইলৰ প্রধানমন্ত্রী বেঞ্জামিন নেতানিয়াহুৱেও এই আক্ৰমণৰ বিষয়ে সদৰী কৰে। সামাজিক মাধ্যম ‘এক্স’ত এক বিবৃতিত নেতানিয়াহুরে কয় যে ৪০ বছৰ পূৰ্বে লেবাননত বন্দী হোৱা ৰণ আৰাদ নামৰ ইজৰাইলী পাইলটৰ দেহৰ অৱশিষ্টৰ উদ্ধাৰৰ বাবে এই অভিযান চলোৱা হৈছিল যদিও তেওঁলোকে একো বিচাৰি নাপালে। সন্ত্রাসবাদী সংগঠন হিজবুল্লাই দাবী কৰে যে ছিৰিয়াৰ দিশৰ পৰা ইজৰাইলৰ সামৰিক হেলিকপ্টাৰে এই আক্রমণ চলাইছে আৰু স্থলসেনায়ো অভিযান চলাইছে।
ইপিনে, ইজৰাইলে দাবী কৰে যে বিগত ৪৮ ঘণ্টাত ইৰানৰ তিনিশতকৈ অধিক লক্ষ্যস্থলীত আঘাত হানিছে ইজৰাইলী সেনাই আৰু একে সময়তে লেবাননৰ ১৭০তকৈ অধিক স্থানত আক্রমণ কৰে। ইজৰাইলী সেনাই ইৰানৰ ইছলামিক ৰিভলিউচনেৰী গাৰ্ডছ কর্পছ বায়ুসেনা বাহিনীৰ তেহৰানৰ মাজমজিয়াত থকা কেন্দ্রীয় বিমান প্রতিবক্ষা কমাণ্ড কেন্দ্রত আক্ৰমণ কৰা বুলি দাবী কৰে।ইপিনে, এই যুদ্ধ আৰম্ভণিৰ পাছত প্ৰথমবাৰৰ বাবে সংযুক্ত আৰব আমিৰশ্বাহিৰ ৰাষ্ট্ৰপতি শ্বেইখ মহম্মদ বিন জায়েদ অল নাহয়ানে কয় যে এয়া যুদ্ধৰ সময়। নিজ দেশ আৰু এয়া নাগৰিকৰ প্ৰতি দায়িত্ব পালন কৰিব বুলি এক সাক্ষাৎকাৰত কয়। তেওঁ হুংকাৰ দিয়ে, ‘আৰব আমিৰশ্বাহিৰ ছাল ডাঠ আৰু মাংসও তিতা, আমি সহজ চিকাৰ নহয়।’
আক্রমণ-প্রত্যাক্রমণ
ইৰানে কালি উপসাগৰীয় দেশসমূহত কে’বালানি ক্ষেপণাস্ত্ৰ আৰু ড্র’নৰে আক্ৰমণ কৰে। ইয়াৰ পৰিৱৰ্তে ইজৰাইল-মার্কিন বাহিনীয়ে তেহৰানৰ বিমান বন্দৰতো বৃহৎ আক্রমণ সংঘটিত কৰে যদিও ইয়াক নিষ্ক্রিয় কৰা বুলি দাবী কৰে ইৰানে। একেদৰে ইজৰাইলৰ জেৰুজালেম, কাটাৰৰ ড’হাৰ উপৰি সংযুক্ত আৰব আমিৰশ্বাহি আৰু বাহৰেইনত আজি পুৱা তথা আবেলিও বৃহৎ বিস্ফোৰণৰ শব্দ শুনিবলৈ পোৱা যায়।
আমিৰশ্বাহিয়ে কয় যে ৰাষ্ট্ৰখনৰ বিমান প্ৰতিৰোধী ব্যৱস্থাৱলীয়ে ১৫ টা ক্ষেপণাস্ত্র আৰু ১১৯ টা ড্র’ন আজি পুৱা নিষ্ক্রিয় কৰিবলৈ সক্ষম হয়। সামাজিক মাধ্যমত প্ৰচাৰিত ভিডিঅ’ ফুটেজত দেখা গৈছে যে ডুবাইৰ বিমান বন্দৰতো ভাঙি পৰিছে যুদ্ধাস্ত্র। ডুবাইৰ অন্যতম ব্যস্ততম বিমান বন্দৰৰ বিল্ডিংটোৰ সন্মুখত পাৰ্ক কৰি থোৱা বিমানৰ সমীপতে বৃহৎ বিস্ফোৰণ সংঘটিত হয় আৰু ইয়াৰ সমীপৰে এখন ৰেলো চলাচল কৰি আছিল। ম’বাইল ফোনৰ ভিডিঅ’ ফুটেজত এই তথ্য উদ্ধাৰ হৈছে। এই আক্ৰমণৰ পাছত ইৰানৰ কঠোৰপন্থী ন্যায়িক মুৰব্বী গোলাম হুছেইন মহচিনি ইজেয়ে কয় যে ইৰানৰ সেনাবাহিনীৰ হাতত থকা প্রমাণে স্পষ্ট কৰিছে যে এই অঞ্চলটোৰ কিছুমান দেশৰ ভূমি মুকলিকৈ অথবা গোপনভাৱে শত্ৰুৰ দখলত আছে।
এনে লক্ষ্যস্থলীত আক্রমণ অব্যাহত থাকিব বুলি তেওঁ সকীয়নি দিয়ে। উল্লেখ্য যে ইয়াৰ পূৰ্বে পেজেস্কিয়ানে চুবুৰীয়া দেশসমূহৰ ওচৰত ক্ষমা বিচাৰিছিল। ইপিনে, ছৌদি আৰবে প্রকাশ কৰে যে ৰাষ্ট্ৰখনত থকা মার্কিন বায়ুসেনা ঘাটিলৈ ইৰানে ক্ষেপণাস্ত্র নিক্ষেপ কৰিছে আৰু একেদৰে জর্দানেও ইৰানৰ বিৰুদ্ধে অভিযোগ উত্থাপন কৰি কয় যে বিগত এসপ্তাহ ধৰি ৰাষ্ট্ৰখনত গুৰুত্বপূর্ণ আন্তঃগাঁথনি অহৰহ আক্রমণ চলাইছে ইৰানে।
বাঢ়িছে যুদ্ধৰ তীব্রতা
কালি ইৰানক তীব্র আক্রমণ কৰা হ’ব বুলি ট্রাম্পে তেওঁৰ নিজস্ব সামাজিক মাধ্যমত প্রকাশ কৰাৰ পাছতে ইজৰাইলে বিগত সপ্তাহৰ ভিতৰত সৰ্ববৃহৎ বোমা আক্রমণ কৰে ইৰানৰ এক সামৰিক একাডেমী, ভূতলৰ এক কমাণ্ড চেণ্টাৰ আৰু এক ক্ষেপণাস্ত্র ভাণ্ডাৰত।