Dr.Farooq Abdullah Attack in Jammu:
জম্মু-কাশ্মীৰত চাঞ্চল্যকৰ গুলীচালনা ঘটনা ৷ প্রাক্তন মুখ্যমন্ত্রী ডা:ফাৰুক আব্দুল্লালৈ লক্ষ্য কৰি গুলীচালনা দুৰ্বৃত্তৰ ৷ এক বিবাহ অনুষ্ঠানত অংশ গ্ৰহণ কৰি থকা অৱস্থাত দুৰ্বৃত্তই শূন্য দূৰত্বৰ পৰা গুলীচালনা কৰে ৷ অৱশ্যে নিৰাপত্তাৰক্ষীৰ তৎপৰতাত কথমপি ৰক্ষা পৰে বৰ্ষীয়ান ৰাজনীতিক গৰাকী ৷ আনহাতে গুলীচালনাৰে জড়িত ৬৫ বছৰীয়া লোক এজনক লগে লগে গ্ৰেপ্তাৰ কৰে আৰক্ষীয়ে ৷ ধৃত লোকজনৰ নাম কমল সিং জামোৱালক ৷
উল্লেখ্য যে ,বুধবাৰে সন্ধিয়া জম্মুৰ বৃহত্তৰ কৈলাশ অঞ্চলৰ ৰয়েল পার্কত অনুষ্ঠিত এখন বিবাহস্থলীত অংশ লৈ নেচনেল কনফাৰেন্সৰ সভাপতি তথা প্রাক্তন মুখ্যমন্ত্রী ডা:ফাৰুক আব্দুল্লা আৰু জম্মু-কাশ্মীৰৰ উপ-মুখ্যমন্ত্ৰী সুৰিন্দৰ চৌধুৰীকে ধৰি কে’বা গৰাকী জ্যেষ্ঠ ৰাজনৈতিক নেতা বিবাহস্থলী খনৰ পৰা ওলাই যোৱাৰ সময়তে ৬৫ বছৰীয়া এজন ব্যক্তিয়ে গুলীচালনা কৰাত বিবাহস্থলীত এক আতংকময় পৰিস্থিতিৰ হয় ৷
গণ্যমান্য ব্যক্তিসকলৰ সুৰক্ষাৰ বাবে নিয়োজিত নিৰাপত্তাৰক্ষীয়ে তৎমুহূৰ্ততে পুৰাণী মণ্ডীৰ কমল সিং জামৱাল (৬৫) নামৰ বৃদ্ধজনক পিষ্টল সহ গ্ৰেপ্তাৰ কৰে ৷ডা:ফাৰুক আব্দুল্লা আৰু উপ-মুখ্যমন্ত্রী সুৰিন্দৰ চৌধুৰী দুয়োজনেই নিৰাপদ আৰু কোনো ক্ষতি নোহোৱাকৈ কথমপি ৰক্ষা পৰে । ঘটনাৰ কিছু সময়ৰ পাছতে আৰক্ষীৰ জ্যেষ্ঠ বিষয়াসকলে ততাতৈয়াকৈ ঘটনাস্থলীত উপস্থিত হৈ প্রাথমিক তদন্ত আৰম্ভ কৰে আৰু অভিযুক্তক সোধা-পোছাৰ বাবে স্থানান্তৰ কৰা হয় থানালৈ।
আনহাতে আৰক্ষীৰ প্রাথমিক সোধা-পোছাৰ সময়ত পুৰাণী মণ্ডীৰ বাসিন্দা কমল সিং জামৱালে নেচনেল কনফাৰেন্সৰ নেতাজনক লক্ষ্য কৰি ল’ব বিচৰা বুলি স্বীকাৰ কৰে। আৰক্ষীৰ আগত কমল সিং জামৱালে কয়, ‘যোৱা ২০ বছৰ ধৰি মই ফাৰুকক হত্যা কৰিব বিচাৰিছিলো। আজি মই তেওঁৰ ওপৰত গুলীচালনা কৰিলোঁ, কিন্তু তেওঁ ৰক্ষা পালে। তেওঁ আৰু কয় যে এই কাণ্ডত ব্যৱহৃত আগ্নেয়াস্ত্রটো তেওঁৰ নামত পঞ্জীয়নভুক্ত অনুজ্ঞাপত্রপ্রাপ্ত ৰিভলভাৰ।
উল্লেখ্য যে বিবাহস্থলীৰ দৰাৰ বৰদেউতাক হয় কমল সিং জামৱাল ৷ আৰক্ষী বিষয়াসকলে তদন্তৰ অংশ হিচাপে এই বক্তব্যৰ সত্যাসত্য নিৰূপণ কৰা হৈছে আৰু গুলীচালনাৰ কাণ্ডৰ আঁৰৰ সঠিক উদ্দেশ্য আৰু পৰিস্থিতিৰ বিষয়ে জানিবলৈ অভিযুক্তক অধিক সোধা-পোছা অব্যাহত ৰাখিছে ৷
