Dr. Hiren Gohain:
নাগৰিকত্ব আইন সংশোধনী(কা) বিৰোধী সমন্বয় সমিতি, অসমে এক বিবৃতিত আমেৰিকা-ইজৰাইলে ইৰাণৰ ওপৰত যুদ্ধ জাপি দি ইৰাণৰ লগতে সমগ্ৰ বিশ্বৰ জনতাক অস্থিৰ আৰু সংকটৰ মুখলৈ ঠেলি দিয়া কাৰ্যৰ তীব্ৰ নিন্দা কৰিছে । কাকতলৈ প্ৰেৰণ কৰা বিবৃতিটোত সভাপতি ডঃহীৰেন গোহাঁই আৰু মুখ্য সমন্বয়ক দেবেন তামুলীয়ে কয় যে যুদ্ধই ১২ দিন অতিক্ৰম কৰিছে আৰু ইতিমধ্যে ভয়ানক মুল্যবৃদ্ধি,পেট্ৰল-ৰন্ধন গেচৰ নাটনি আদি যুদ্ধৰ কু-প্ৰভাৱ আমাৰ দেশতো প্ৰকট হৈ পৰিছে। এই যুদ্ধৰ পোনপটীয়া প্ৰভাৱ চাহ অৰ্থনীতিতো পৰিব, কিয়নো ইৰাণ হৈছে ভাৰতীয় চাহৰ বিশেষকৈ অসম চাহৰ অন্যতম ৰপ্তানিকাৰী দেশ ।
বিবৃতিটোত কয় যে আমেৰিকা-ইজৰাইল যুটিৰ ইৰাণ আক্ৰমনৰ ঘটনাক ভাৰতৰ মোডী চৰকাৰে গৰিহনা দিয়াৰ সাহস গোটাব পৰা নাই আৰু ভাৰতৰ পূৰ্বৰ গোষ্ঠী নিৰপেক্ষ অৱস্থানৰ পৰা সম্পূৰ্ণ বিপৰীত স্থিতি গ্ৰহণ কৰি ভাৰতবৰ্ষক আমেৰিকাৰ বহতীয়া দেশত পৰিণত কৰিছে যাৰ ফলত ভাৰতৰ সাৰ্বভৌমত্বৰ প্ৰতি ভাবুকি আহিছে আৰু ভাৰতৰ পূৰ্বৰ স্বাভিমান আৰু আত্মসন্মান মাটিত মিহলি হৈ পৰিছে। BRICS ৰ সভাত যাবলৈ মানা কৰা , ৰাচিয়াৰ পৰা ভাৰতে তেল ক্ৰয় কৰিব পাৰিব নে নাই সেয়া ট্ৰাম্প নিৰ্ণয় কৰা আদি কাৰ্যৰ দ্বাৰা মোডীক ট্ৰাম্পে নিজৰ আজ্ঞাবাহী ভৃত্যৰ দৰে নিৰ্দেশ দিয়া ঘটনাই ভাৰতৰ স্বাধীনমনা লোকক বিশ্ববাসীৰ ওচৰত লজ্জিত কৰি তুলিছে ।
বিবৃতিত কয় যে ইৰাণে আলোচনাৰ জৰিয়তে সমস্যা সমাধানৰ প্ৰস্তাৱ দিয়াৰ পাছতো আনকি আলোচনাৰসকলো চৰ্ত মানি লোৱাৰ পাছতো আমেৰিকা-ইজৰাইল যুটিয়ে ৰাষ্ট্ৰসংঘৰ নীতি উলংঘা কৰি ইৰাণৰ সৰ্বোচ্চ নেতা গৰাকীক হত্যা কৰাতে ক্ষান্ত নেথাকি অসামৰিক লোক, স্কুল, কলেজ, চিকিৎসালয় আদি লক্ষ্য কৰি বোমা নিক্ষেপ কৰিছে আৰু কেইবা শ নিৰীহ লোকৰ আনকি ছাত্ৰ-ছাত্ৰীক হত্যা কৰিছে। এই যুদ্ধ অব্যাহত থাকিলে তৃতীয় বিশ্ব যুদ্ধৰ ৰূপ লোৱাৰ সম্ভাৱনা প্ৰকট হৈ পৰিছে যি মানৱ সভ্যতাৰ প্ৰতি ভাবুকিৰ হৈ উঠিব।
বিবৃতিত যুদ্ধৰ বিৰুদ্ধে অৱস্থান গ্ৰহন কৰি আমেৰিকা-ইজৰাইল যুটিৰ ইৰাণ আক্ৰমণৰ ঘটনাক বিৰোধিতা কৰিবলৈ ভাৰত চৰকাৰৰ ওচৰত দাবী জনোৱা হয় আৰু আমেৰিকাৰ স্বাৰ্থত বিশেষকৈ খাৰুৱা তেলৰ বজাৰত আমেৰিকাৰ একচেটিয়া নিয়ন্ত্ৰন প্ৰতিষ্ঠা কৰাৰ স্বাৰ্থত সৃষ্টি কৰা এই যুদ্ধই কঢ়িয়াই অনা অৰ্থনৈতিক সংকটৰ বোজা ভাৰতৰ জনসাধাৰণৰ ওপৰত জাপি নিদিবলৈ দাবী জনোৱা হয়। আমেৰিকা-ইজৰাইলৰ দাদাগিৰিয়ে সকলো সীমা অতিক্ৰম কৰিছে আৰুযুদ্ধবাজ নীতিৰ বিৰুদ্ধে প্ৰবল গণ আন্দোলন গঢ়ি তুলিবলৈ আহ্বান জনাইছে।
