মুখ্যমন্ত্রী ড° হিমন্ত বিশ্ব শর্মাই অগপৰে মিত্ৰতাৰ আলোচনা সমাপ্ত বুলি কালি স্পষ্ট কৰিলেও অগপ সভাপতি মন্ত্রী অতুল বৰাই কথা-বতৰা এতিয়াও চলি আছে বুলি সদৰী কৰাত উভয় দলৰ তৃণমূল পর্যায়ত চৰম বিভ্রান্তিৰ সৃষ্টি হৈছে। বিজেপি-অগপ উভয় দলৰ তৃণমূল কর্মীসকলৰ মাজত এনে পৰম্পৰ বিৰোধী ভাষ্যই জটিল পৰিস্থিতিৰ সৃষ্টি কৰিছে বুলি চৰ্চা আৰম্ভ হৈছে।
শাসকীয় মিত্রজোটৰ দুই প্রধান দল বিজেপি আৰু অগপ নেতৃত্বৰ স্থিতিত স্পষ্ট হয় যে তেওঁলোকৰ মাজৰ নিমিলা অংক অধিক মেৰপেচৰ মাজত সোমাইছে। আজি মুখ্যমন্ত্রী ড° শর্মাই স্পষ্ট কৰে যে অগপৰ লগত বিজেপিৰ আলোচনা কৰিবলগীয়া এতিয়া একো নাই। আলোচনা শেষ হৈছে, গতিকে সমষ্টিৰো ভাগ বাটোৱাৰা সম্পূৰ্ণ হৈছে। ইয়াৰ বিপৰীতে অগপৰ সভাপতি অতুল বৰাই কয় যে এতিয়াও কথা-বতৰা চলিহে আছে। গতিকে সমষ্টিৰ ভাগ বাটোৱাৰা খাটাং হোৱা নাই ।
অগপ সূত্রত প্রকাশ যে দিল্লীত বিজেপিৰ ৰাষ্ট্ৰীয় নেতৃত্বৰ স’তে হোৱা আলোচনাতহে প্রকৃতার্থত মিত্ৰতাৰ বিষয়টো স্পষ্ট হ’ব বুলি অগপ নেতৃত্বই ঘনিষ্ঠ মহলত প্রকাশ কৰিছে।
মুখ্যমন্ত্রীয়ে কালি ইয়াত বিষয়টোক লৈ সাংবাদিকৰ আগত কয়, ‘আমাৰ মতে অসম গণ পৰিষদৰ লগত সকলো চূড়ান্ত হৈছে। ভৱিষ্যতে কিবা আলোচনাৰ অৱকাশ আৰু নাই। মোৰ ফালৰ পৰা তেওঁলোকক জনাই দিছো যে এতিয়া আৰু আলোচনা নহয়। ইতিমধ্যে তেওঁলোকক কৈ দিয়া হৈছে যে এইকেইটা সমষ্টি আপোনালোকক দিয়া হৈছে আৰু আনকেইটা আমি লৈছো। গতিকে আলোচনাৰ কথা আৰু নাহে।’
ইয়াৰ লগতে মুখ্যমন্ত্ৰীয়ে কয় যে অগপই দুটা সমষ্টিক লৈ আলোচনা কৰিব বিচাৰে; কিন্তু বিজেপিৰ মতে আলোচনাৰ কথা আৰু নাহে। এই সন্দর্ভতো মুখ্যমন্ত্রীয়ে কয়, ‘মই তেওঁলোকক কৈ দিছো, এতিয়া আৰু আলোচনা নহয়। যি দুটা সমষ্টিক লৈ তেওঁলোকে কথা পাতিব বিচাৰে, তাত প্রতিদ্বন্দ্বিতা হ’ব। বন্ধুত্বমূলকো হ’ব পাৰে। তেওঁলোকে যি দুটা সমষ্টিৰ কথা কৈ আছে, সেই দুটা আমিতো এৰি দিব নোৱাৰো। গতিকে তাত প্রতিদ্বন্দ্বিতা হ’ব।’
অগপক বিজেপিয়ে কিমানটা সমষ্টি এৰি দিব, সেই বিষয়েও ৰাজনৈতিক মহলত চর্চা হৈ আহিছে। এই সন্দর্ভত মুখ্যমন্ত্রীয়ে কয় যে দলটোৰ বৰ্তমান নজন বিধায়ক আছে আৰু সেই সংখ্যাতকৈ বহু বেছি আসন দিয়া হৈছে। সেই সংখ্যা ২২তকৈ অধিক বুলি মুখ্যমন্ত্রীয়ে কয়। মুখ্যমন্ত্রীয়ে দাবী কৰে যে বিজেপিয়ে অগপক ক্ষতি কৰা কোনো কাম কৰা নাই।
মুখ্যমন্ত্ৰীৰ ভাষ্যৰ বিপৰীতে অতুল বৰাই সমষ্টিকেন্দ্রিক সিদ্ধান্ত অদ্যাপি চূড়ান্ত নোহোৱা বুলি উল্লেখ কৰি কয়, ‘আমি আশা কৰো যে দুই-এবাৰ বহিলেই সর্বসম্মত সিদ্ধান্তত উপনীত হম। গতিকে সমষ্টিক লৈ আমাৰ মাজত খাটাং সিদ্ধান্ত হোৱা নাই। বিজেপিৰ কেন্দ্ৰীয় নেতৃত্বৰ উপস্থিতিত যেতিয়ালৈকে সিদ্ধান্ত নহয়, তেতিয়ালৈকে সমষ্টিৰ বিষয়টো চূড়ান্ত নহয়। ২০১৬ আৰু ২০২১ৰ নিৰ্বাচনৰ দিন ঘোষণাৰ পাছতহে মিত্ৰতাৰ সিদ্ধান্তটো হৈছিল। কথা-বতৰা এতিয়াও চলি আছে। আমি আশা কৰো যে মিত্ৰতা আমাৰ মাজত ভালদৰে হ’ব।’
প্রসংগক্রমে উল্লেখ্য যে বিশেষকৈ অগপ মিত্ৰতাৰ বিষয়টোক লৈ যথেষ্ট সন্ধিক্ষণত আছে। দলটোৰ আটাইকেইজন বিধায়কে প্রার্থিত্ব পাবই লাগিব বুলি নেতৃত্বৰ ওচৰত দাবী দাখিল কৰাৰ লগতে বিজেপিকো এই বিষয়টো স্পষ্টভাবে জনাই দিয়া হৈছে। বৰ্তমানৰ বিধায়ককেইজনৰ মাজৰ কোনোবা প্রার্থিত্বৰ পৰা বঞ্চিত হ’লে তাৰ বিৰূপ প্ৰভাৱ পৰাৰো আশংকা আছে বুলি অগপ নেতৃত্বই ভাবিবলৈ বাধ্য হৈছে। ডাঃ কমলাকান্ত কলিতাৰ দৰে জ্যেষ্ঠ নেতাই আপোচৰ কথা মুঠেই আহিব নোৱাৰে বুলিও নিজৰ দলৰ নেতৃত্বক জনাই দিছে। নজন বিধায়ককে প্রার্থিত্ব দিবই লাগিব বুলি স্পষ্ট কৰি দিছে ৰমেন্দ্ৰ নাৰায়ণ কলিতাই। লক্ষ্যণীয় যে কলিতাৰ প্রার্থিত্বক লৈয়ে যথেষ্ট টনা-আঁজোৰাৰ সৃষ্টি হৈছে। কলিতাই মধ্য গুৱাহাটী সমষ্টিত প্রতিদ্বন্দ্বিতা কৰিবই বুলি কেৱল নিজৰ দলৰ নেতৃত্বকে নহয়, মুখ্যমন্ত্রীকো জনাই দিছে। কলিতাৰ দাবী মানিবলৈকে অগপই বিজেপিয়ে এৰি দিয়া ডিমৰীয়া সমষ্টিও ত্যাগ কৰিবলৈ সাজু হৈছে। দলটোৰ সূত্রই জনায় যে অগপৰ এই দাবীৰ কথা মুখ্যমন্ত্ৰীয়ে মুঠেও গুৰুত্ব দিয়া নাই। কালি যি দুটা সমষ্টিক লৈ অগপই বিজেপিৰ লগত আলোচনা কৰিব বিচাৰে বুলি মুখ্যমন্ত্রীয়ে সদৰী কৰে, তাৰে এটা হ’ল মধ্য গুৱাহাটী।
চর্চা অনুসৰি প্ৰাৰ্থিত্ব লাভ নকৰিলে কলিতাই বিজেপিলৈ যাব নেকি বুলিও প্রশ্ন উঠিছে। ইয়াৰ মাজতে আজি অভয়াপুৰীত আন এজন প্রার্থিত্ব প্রত্যাশী প্রাক্তন বিধায়ক ভূপেন ৰায়ে আজি প্রার্থিত্ব বঞ্চিত হোৱাৰ সম্ভাৱনাত বিজেপিত যোগদান কৰা বুলিও হুৱা-দুৱা লাগে। মনকৰিবলগীয়া যে পূৰ্বৰ দক্ষিণ অভয়াপুৰী বিধানসভা সমষ্টি আৰু বৰ্তমানৰ নৱগঠিত অভয়াপুৰী বিধানসভা সমষ্টিত বর্তমান বিধায়ক হিচাপে আছে প্রদীপ কুমাৰ সৰকাৰ। ইপিনে, প্রাক্তন বিধায়ক ৰায়ে সমষ্টি পুনৰ নিৰ্ধাৰণৰ পাছত পূৰ্বৰ উত্তৰ অভয়াপুৰী সমষ্টি আৰু বৰ্তমানৰ সৃজনগ্রাম ত্যাগ কৰি অভয়াপুৰী সমষ্টিত অগপৰ প্ৰাৰ্থিত্বৰ দাবীদাৰ হয়।
একেদৰে বিজেপিৰ পৰাও জিলা সভাপতি উজ্জ্বল কান্তি বায়কে ধৰি কে’বাজনেও আবেদন জনায়। ইপিনে, মুখ্যমন্ত্রী ড° শৰ্মাই অভয়াপুৰীত বিজেপিয়ে প্রতিদ্বন্দ্বিতা কৰিব বুলি ঘোষণা কৰাত ৰায় বিমোৰত পৰে। ইয়াৰ মাজতে তুমুল চর্চা আৰম্ভ হয় যে ৰায়ে বিজেপি দলত যোগদান কৰিব আৰু প্ৰাৰ্থিত্ব লাভ কৰিব। এই চৰ্চাক কেন্দ্ৰ কৰি বিজেপিৰ ভিতৰচ’ৰাত হুৱা-দুৱা লাগিছে। স্থানীয় বিজেপিৰ নেতাসকলে কয় যে বছৰ বছৰ ধৰি কপালৰ ঘাম মাটিত পেলাই দলৰ ভেটি শক্তিশালী কৰি তেওঁলোক আর্থিকভারে সর্বশ্রান্ত হৈছে। এই পৰিস্থিতিত আমদানিকৃত লোকক প্রার্থীক প্রার্থিত্ব দিলে কোনো পক্ষই মানি নলয় বুলিও একাংশ কয়। দলৰ ভিতৰত এই পৰিস্থিতিত বিস্ফোৰণ ঘটিব বুলিও এটা মহলে হুংকাৰ দি আছে।