Uttar Pradesh CM Yogi Adityanath:✒️নিৰ্বাচনী উত্তেজনাৰ মাজতে বৰপেটাত অনুষ্ঠিত এক বিশাল জনসভাৰ পৰা কংগ্ৰেছৰ বিৰুদ্ধে তীব্ৰ ৰাজনৈতিক আক্ৰমণ চলায় উত্তৰ প্ৰদেশৰ মুখ্যমন্ত্ৰী যোগী আদিত্যনাথে। তেওঁ অভিযোগ কৰে যে, দীৰ্ঘদিনীয়া শাসনকালত কংগ্ৰেছে অসমৰ স্বাভিমান, পৰিচয় আৰু সাংস্কৃতিক ভেঁটি দুর্বল কৰি তুলিছিল।
নিজৰ ভাষণত আদিত্যনাথে কয় যে, কংগ্ৰেছৰ “তুষ্টিকৰণমুখী ৰাজনীতি”য়ে অসমত অবৈধ অনুপ্ৰৱেশ সমস্যাক গুৰুতৰ কৰি তুলিছিল। তেওঁৰ মতে, এই নীতিয়ে ৰাজ্যখনৰ জনসংখ্যাগত সমীকৰণৰ লগতে সামাজিক-সাংস্কৃতিক পৰিৱেশতো নেতিবাচক প্ৰভাৱ পেলাইছে।
তেওঁ স্পষ্টকৈ উল্লেখ কৰে যে, কংগ্ৰেছ শাসনৰ সময়ত সীমান্ত সুৰক্ষা আৰু স্থানীয় জনগোষ্ঠীৰ স্বাৰ্থ যথেষ্ট অৱহেলিত হৈছিল। বিপৰীতে, বিজেপি-নেতৃত্বাধীন চৰকাৰে অনুপ্ৰৱেশ নিয়ন্ত্ৰণ আৰু অসমৰ সাংস্কৃতিক পৰিচয় সুৰক্ষাৰ ক্ষেত্ৰত দৃঢ় আৰু নীতি-ভিত্তিক পদক্ষেপ গ্ৰহণ কৰিছে বুলি দাবী কৰে ।
যোগী আদিত্যনাথে (Yogi Adityanath)আৰু কয় যে, বিজেপিৰ লক্ষ্য কেৱল উন্নয়ন নহয়, বৰং অসমৰ স্বাভিমান আৰু ঐতিহ্য পুনৰ প্ৰতিষ্ঠা কৰা। ইয়াৰ বাবে তেওঁ জনসাধাৰণক বিজেপি আৰু মিত্ৰদলসমূহৰ প্ৰাৰ্থীক সমৰ্থন জনাবলৈ আহ্বান জনায়।
অসমৰ ৰাজনীতিত বহুদিন ধৰি কেন্দ্ৰীয় বিষয় হিচাপে থকা অনুপ্ৰৱেশ আৰু পৰিচয়ৰ প্ৰশ্ন এইবাৰো নিৰ্বাচনী প্ৰচাৰৰ মূল কেন্দ্ৰবিন্দু হৈ উঠিছে। বৰপেটাৰ এই সভাৰ পৰা কৰা মন্তব্যই আগন্তুক দিনত ৰাজনৈতিক বিতৰ্ক আৰু অধিক তীব্ৰ হোৱাৰ ইঙ্গিত দিছে।