ব্ৰহ্মপুত্রসহ বিশ্বৰ ৪০খন নৈৰ অৱবাহিকা অঞ্চলৰ কোটি কোটি লোকৰ জীৱনলৈ গভীৰ আশংকাৰ সৃষ্টি হৈছে। গোলকীয় সাগৰপৃষ্ঠৰ উত্থানতকৈ অধিক দ্রুত হাৰত ডুব যাবলৈ ধৰিছে নৈসমূহৰ অৱবাহিকাসমূহ।
কাজেই অঞ্চলসমূহৰ ২৩ কোটিৰো অধিক জীৱন-সম্পত্তিলৈ অশনি সংকেতৰ সৃষ্টি হৈছে। নৈপৰীয়া এই অঞ্চলসমূহত এই জটিল অৱস্থাৰ সৃষ্টিৰ কাৰণ হৈছে বহু গভীৰতালৈ খননৰ জৰিয়তে ব্যাপক হাৰত ভূগর্ভস্থ জল আহৰণ, নৈসমূহৰ পলস কঢ়িয়াই নিয়াৰ পৰিমাণ হাস আৰু দ্রুত নগৰ উন্নয়ন।
এই নৈপৰীয়া অঞ্চলসমূহৰ প্ৰতি এনে দুর্যোগ সৃষ্টিৰ তথ্য পোহৰলৈ আনিছে এটা তিনিজনীয়া গৱেষকৰ দলে। কেলিফ’র্ণিয়া বিশ্ববিদ্যালয়ৰ সহকাৰী অধ্যাপক লিঅ’নার্ড অ’য়েনহেন, দুই ভূবিজ্ঞানী মনুচেহৰ শ্বিৰজায়ে আৰু ছুছান্না বেথে। এই তিনি গৱেষকৰ ব-দ্বীপ সংক্রান্তীয় এক প্রতিবেদন শেহতীয়াভারে বিশ্বখ্যাত বিজ্ঞান আলোচনী ‘নেচাৰ’ত প্রকাশ পাইছে।
তেওঁলোকে গৱেষণাৰ বাবে সমগ্ৰ বিশ্বৰ ৪০ নৈৰ অৱবাহিকা অঞ্চলক বাছি লয়। এই তিনি গৱেষকৰ অধ্যয়নত পোহৰলৈ অহা অনুসৰি ওচৰ-পাঁজৰৰ সাগৰৰ পৃষ্ঠ উত্থানতকৈ এনে একোটা অৱবাহিকা অঞ্চলৰ অধিক দ্রুততৰে খহিবলৈ ধৰিছে।
এই ৪০ অঞ্চলৰ ১৮ টাৰে অৱস্থা অধিক শোচনীয় বুলিও গবেষক তিনিজনে আঙুলিয়াই দিছে। সামগ্রিকভারে এই অঞ্চলসমূহৰ উদ্বেগজনক অৱস্থাই ২৩ কোটি ৬০ লাখ লোকৰ জীৱনলৈ সংশয় কঢ়িয়াই আনিছে।
কাৰণ এইসমূহ অঞ্চল ডুব যাবলৈ ধৰাৰ ফলত এইসমূহত বাস কৰা লোকসকল ভয়াৱহ বানৰ কৱলত পৰাটো নিশ্চিত হৈছে।
গতিকে এই কোটি কোটি লোকৰ জীৱন সম্পত্তিৰ প্ৰতি গভীৰ সংশয় নামি আহিছে। এই গৱেষণাৰ সময়ত গৱেষক তিনিজনে উন্নত উপগ্ৰহীয় ৰাডাৰ ব্যৱস্থাৰ সহায় লয়। ইয়াৰ জৰিয়তে পৃথিৱীৰ পাঁচখন মহাদেশৰ এনে অৱবাহিকা অঞ্চলৰ সাম্প্ৰতিক অৱস্থাৰ বুজ লয়।
ৰাডাৰৰ সহায়ত তোলা ফটোত দেখিবলৈ পোৱা গৈছে যে প্রতি পিক্সেলত ৭৫ বর্গকিলোমিটাৰকৈ এই অঞ্চলসমূহৰ ভূমি ডুব যাবলৈ ধৰিছে। এনে অঞ্চলসমূহৰ মাজত গংগা, ব্রহ্মপুত্র, ম্যানমাৰৰ মেকং আদিৰ অৱবাহিকাও আছে। এই সম্পৰ্কত গৱেষক অ’য়েনহেনে কয়, ‘বহু ঠাইত অধিক পৰিমাণত ভূগর্ভস্থ জল আহৰণ, দ্রুত নগৰীকৰণ, নৈসমূহৰ পলসৰ পৰিমাণ হ্রাস আদিয়ে অৱবাহিকাসমূহক সাগৰপৃষ্ঠৰ উত্থানৰ গতিতকৈ অধিক গতিত খহাইছে।’