IMF:✒️আর্থিক দিশত ভাৰতক চেৰ পেলালে চুবুৰীয়া বাংলাদেশে। এখন দেশৰ নাগৰিকসকলৰ প্রকৃত আর্থিক অৱস্থাৰ আভাস দিয়া জনমূৰি জিডিপিৰ ক্ষেত্ৰত ভাৰততকৈ বাংলাদেশ বহু আগবাঢ়িল বুলি আন্তর্জাতিক মুদ্রানিধি (আইএমএফ) ৰ শেহতীয়া এক তথ্যত প্রকাশ পাইছে।
যোৱা ১৪ এপ্রিলত প্রকাশ পোৱা আন্তর্জাতিক বিত্তীয় সংস্থাটোৰ ‘ব’র্ল্ড ইক’নমিক আউটলুক’ৰ মতে চলিত মূল্যত সম্প্রতি বাংলাদেশৰ জনমূৰি জিডিপিৰ পৰিমাণ হৈছে ২,৯১১ ডলাৰ অর্থাৎ দুই লাখ ৭৪ হেজাৰ টকা।
ইয়াৰ বিপৰীতে ভাৰতৰ জনমূৰি জিডিপিৰ পৰিমাণ হৈছে ২,৮১২ ডলাৰ অৰ্থাৎ দুই লাখ ৫৮ হেজাৰ ৩৬৩ টকা। ইয়াৰ জৰিয়তে প্ৰমাণ হৈছে যে বাংলাদেশৰ নাগৰিকসকল আর্থিক দিশত ভাৰতীয়সকলতকৈ আগবাঢ়িল।
উল্লেখ্য যে ভাৰত চৰকাৰে জিডিপিতকৈ জনমূৰি জিডিপিয়ে নাগৰিকসকলৰ আৰ্থিক অৱস্থাৰ সঠিক ছবি দাঙি ধৰে বুলি অর্থনীতিবিদসকলে মন্তব্য কৰি আহিছে। এনে অৱস্থাতে প্ৰকাশ কৰা এই তথ্যই স্বাভাৱিকতে অর্থনীতিবিদসকলক উদ্বিগ্ন কৰিছে।
লক্ষ্যণীয় যে আইএমএফৰ যোৱা বছৰৰ তথ্য অনুসৰি বছৰটোত ভাৰতৰ জনমূৰি জিডিপি বাংলাদেশতকৈ অধিক আছিল। বছৰটোত ভাৰতৰ জনমূৰি জিডিপি ২,৬৭৫ ডলাৰ হোৱাৰ বিপৰীতে বাংলাদেশৰ আছিল ২,৬৩৫ ডলাৰ। এই ক্ষেত্ৰত তাৎপর্যপূর্ণ দিশটো হ’ল যে ২০২৪ৰ মাজভাগৰ পৰা বাংলাদেশত অস্থিৰ ৰাজনৈতিক পৰিৱেশ বিৰাজ কৰে।
হত্যা-হিংসাৰ লেখীয়া ঘটনাই দেশখনত অৰাজক পৰিৱেশৰো সৃষ্টি কৰে। তৎসত্ত্বেও দেশখনে আর্থিক উন্নয়নৰ ক্ষেত্ৰত ভাৰতক চেৰ পেলাবলৈ সক্ষম হৈছে। অৱশ্যে সম্প্ৰতি ভাৰতৰ সামগ্রিক মুঠ ঘৰুৱা উৎপাদনৰ পৰিমাণ ৪.১ লাখ কোটি ডলাৰ হোৱাৰ বিপৰীতে বাংলাদেশৰ ৫১০ বিলিয়ন ডলাৰহে।
আনহাতে, আইএমএফৰ শেহতীয়া তথ্য অনুসৰি, সম্প্রতি সামগ্রিকভাবে সমগ্ৰ বিশ্বৰ বিকাশশীল আৰু উন্নয়নশীল দেশসমূহৰ জনমূৰি জিডিপি হৈছে ৭,৫০০ ডলাৰ। একেদৰে সম্প্রতি সামগ্রিকভাৱে বিশ্বৰ জনমূৰি জিডিপিৰ পৰিমাণ হৈছে ১৫,৬০০ ডলাৰ।
সাধাৰণতে আইএমএফে বছৰত দুবাৰ এই ‘ব’র্ল্ড ইক’ন’মিক আউটলুক’ প্রকাশ কৰি আহিছে। ইয়াৰ জৰিয়তে সংস্থাটোৱে বিশ্ব অর্থনীতিৰ অৱস্থা আৰু অদূৰ ভৱিষ্যৎ সম্পর্কে পূর্বানুমান প্রকাশ কৰে।