BCCI punishes Riyan Parag:
দৈনিক অগ্ৰদূত ডিজিটেল ডেক্স:-চলিত IPLৰ মাজতে ই-চিগাৰেট সেৱন কৰি বিচিচিআই শাস্তিৰ সন্মুখীন হ’ল ৰাজস্থান ৰয়েলচৰ কেপ্তেইন ৰিয়ান পৰাগ । ।IPLৰ আচৰণ বিধি উলংঘা কৰাৰ অভিযোগত বিচিচিআইৰ ৰোষত পৰা ৰিয়ানৰ বিৰুদ্ধে মেচ ফীৰ ২৫ শতাংশ জৰিমনা আৰু এটা ডি মেৰিট পইণ্টৰ কৰ্তনৰ নিৰ্দেশ ভাৰতীয় ক্ৰিকেট নিয়ন্ত্ৰণ ব’ৰ্ডৰ ৷ বৰ্ডৰ বিবৃতি অনুসৰি, “আই পি এলৰ বিশ্বাসযোগ্যতা বজাই ৰাখিবলৈ বিচিচিআইয়ে ভুল কৰা দল, ইয়াৰ বিষয়া, আৰু খেলুৱৈৰ বিৰুদ্ধে কঠোৰ ব্যৱস্থা গ্ৰহণৰ অন্যান্য বিকল্পও বিবেচনা কৰিছে।”
মনকৰিবলগীয়া যে ৰিয়ানে ইতিমধ্যে নিজৰ ভুল স্বীকাৰ কৰিছে। আই পি এলৰ আচৰণ বিধিৰ ২.২১ অনুচ্ছেদ উলংঘা কৰাৰ বাবে ৰিয়ানক দোষী সাব্যস্ত কৰা হৈছে৷ যিটো “খেলখনক বদনাম কৰা আচৰণ”ৰ সৈতে জড়িত। দ্বিতীয় ইনিংছৰ সময়ত তেওঁক টিভি কেমেৰাত ভেপিং কৰি (ই-চিগাৰেট ব্যৱহাৰ কৰি) ধৰা পৰিছিল। ৰিয়ানে নিজৰ ভুল স্বীকাৰ কৰি মেচ ৰেফাৰী অমিত শৰ্মাই দিয়া শাস্তি মানি লৈছিল। ভাৰত চৰকাৰে ২০১৯ চনত ই-চিগাৰেটৰ উৎপাদন, বিক্ৰী, বিতৰণকে ধৰি নিষিদ্ধ কৰিছিল। আইন অনুসৰি প্ৰথমবাৰৰ বাবে অপৰাধীক এবছৰ পৰ্যন্ত কাৰাদণ্ড আৰু ১ লাখ জৰিমনা বিহা হ’ব পাৰে। এক সূত্রই কয়, ‘ই-চিগাৰেট ভাৰতত নিষিদ্ধ হোৱা নেপথ্যত কাৰণ আছে। শৰীৰৰ ভিতৰলৈ কি কি উপাদান গৈছে, সেয়া কোনেও নাজানে। খেলুৱৈসকলৰ সুৰক্ষাৰ বাবে এই চিগাৰেট একেবাৰে সেৱন কৰা উচিত নহয়।
উল্লেখ্য যে মঙলবাৰে শক্তিশালী পঞ্জাৱ কিংছক পৰাস্ত কৰিছিল ৰাজস্থান ৰয়েলছে। সেই মেচতে নিয়ম ভাঙি বিতর্কত জড়িত হৈ পৰিছিল ৰাজস্থানৰ অধিনায়ক ৰিয়ান পৰাগ। অসম সন্তানে দলৰ সাজঘৰত ধূপমান কৰি থকা দেখা গৈছিল। সেই ভিডিঅ’ সম্প্রতি সামাজিক মাধ্যমত ভাইৰেল হৈছে। অভিযোগ প্রমাণিত হ’লে ৰিয়ানে শাস্তি পোৱাৰ সম্ভাৱনা প্ৰকট হৈ পৰিছিল । ৰাজস্থানৰ ইনিংছৰ ১৬ নম্বৰ অভাৰত এই ঘটনা ঘটিছে। সেই সময়ত ৰাজস্থানৰ সাজঘৰৰ দিশে কেমেৰা আছিল। তেতিয়াই হাতত এটা যন্ত্ৰ লৈ মুখৰ সন্মুখত ৰাখে ৰিয়ানে। সেই সময়তে তেওঁৰ সন্মুখত যশস্বী জয়ছোৱাল আহি উপস্থিত হয়। যশস্বী আঁতৰি যোৱাৰ পাছতে দেখা গ’ল যে ৰিয়ানৰ মুখৰ পৰা ধোঁৱা ওলাই আছে। ধাৰণা কৰা হৈছে যে ৰিয়ানে ই-চিগাৰেট জাতীয় কিবা সেৱন কৰিছে।