চুড়ান্ত এন আৰ চিত নাম নাথাকিলে আতংকিত নহ’বলৈ আহ্বান বাঙালী জনমুক্তি বাহিনীৰঃবিনা চৰ্তত হিন্দু সকলক এন আৰ চিত নাম সন্নিবিষ্ট কৰাৰ দাবী

শ্ৰীৰামপুৰ: কাইলৈ প্ৰকাশ পাব চুড়ান্ত ৰাষ্ট্ৰীয় নাগৰিকপঞ্জী (এন আৰ চি) ৷ এন আৰ চি প্ৰকাশৰ পাছত যাতে পৰিস্হিতি স্বাভাৱিক থাকে তাৰ প্ৰতি লক্ষ্য কৰি ৰাজ্য প্ৰশাসনে ব্যাপক তৎপৰতা অৱলম্বন কৰাৰ সময়তে এন আৰ চিত নাম অন্তৰ্ভুক্ত নোহোৱা লোক সকলক শংকিত নহ’বলৈ আৰু বাদ পৰা লোকসকলে যাতে কোনো প্ৰৰোচনাত ভৰি নিদিয়ে তাৰ বাবে যুদ্ধবিৰত বাঙালী জনমুক্তি বাহিনীৰ সভাপতি ৰঞ্জন সৰকাৰে আজি এক সংবাদ মেলত আহ্বান জনায়।কোনো কাৰনতে যদি নাম বাদ পৰিছে তেনেহলে অযথা আৱেগিক নহৈ পৰৱৰ্তী প্ৰক্ৰিয়াত চামিল নিজৰ নথি-পত্ৰ দাখিল কৰি নাম অন্তৰ্ভুক্ত কৰাৰ চেষ্টা কৰিবলৈ অনুৰোধ কৰে। বিশেষকৈ আৱেগপ্ৰৱন লোক সকলক উদ্দেশি তেওঁ কয় যে এন আৰ চিত নাম নুঠিলে আত্মহত্যা কৰাৰ দৰে কাপুৰুষালী অপকৰ্ম যাতে কোনেও নকৰে তাৰ বাবেও বিনম্ৰতাৰে আহ্বান জনায় বাঙালী জনমুক্তি বাহিনীৰ নেতাগৰাকীয়ে। উল্লেখ্য যে ৰাইজলৈ এই বাৰ্তা দিয়াৰ উদ্দেশ্যে আজি পুৱা ১০-০০ বজাত গোসাঁইগাঁও প্ৰেছ ক্লাবত আয়োজন কৰা এক সংবাদমেল যোগে সংগঠনটোৰ সভাপতি ৰঞ্জন সৰকাৰে কয় যে উচ্চতম ন্যায়ালয়ৰ পৰ্যবেক্ষণত চলি থকা এন আৰ চি আৰু চৰকাৰ তথা এন আৰ চি কৰ্তৃপক্ষৰ প্ৰতি আমাৰ পূৰ্ণ আস্থা আছে যে এখন শুদ্ধ আৰু বিদেশীমুক্ত এন আৰ চি প্ৰকাশ পাব। ১৯৭১ চনৰ ২৪ মাৰ্চৰ পূৰ্বে অসমলৈ অহা কোনো এজন নাগৰিকৰ নাম এন আৰ চিৰ পৰা বাদ নপৰে আৰু বাদ পৰিলেও প্ৰকৃত ভাৰতীয় নাগৰিক হ’লে তেওঁৰ নাম পৰৱৰ্তী পৰ্যায়ত অন্তৰ্ভুক্ত হোৱাটো নিশ্চিত৷ তেওঁ আৰু কয় যে কালি প্ৰকাশ হ’বলগীয়া তালিকাত নাম বাদ পৰিলেও শংকাৰ কোনো কাৰন নাই ৷ কাৰন পৰবৰ্তী সময়ত নাম অৰ্ন্তভুক্ত কৰাৰ বাবে ১২০ দিনৰ সময় দিয়াৰ লগতে সকলো ধৰনৰ আইনী সহযোগিতাৰ আশ্বাস প্ৰদান কৰিছে চৰকাৰে ৷ তেনে ক্ষেত্ৰত উপযুক্ত নথি-পত্ৰ থকা সকলো নাগৰিকে নিজৰ নাম সন্নিবিষ্ট কৰাৰ বাবে সুযোগ তথা সহযোগ পাব৷ আনহাতে চৰ্তহীন ভাৱে হিন্দু নাগৰিকৰ নাম এন আৰ চিত অন্তৰ্ভুক্ত কৰিবলৈ দাবী জনায় সভাপতি গৰাকীয়ে ৷ তেওঁ কয় যে অখন্ড ভাৰত বৰ্ষত ধৰ্মৰ ভিত্তিত পাকিস্তান আৰু বাংলাদেশ গঠন হৈছিল ৷ তেনে ক্ষেত্ৰত অখন্ড ভাৰতবৰ্ষৰ নিৱাসী হিন্দু সকলৰ বসবাস কৰাৰ একমাত্ৰ দেশ হল ভাৰতবৰ্ষ ৷ হিন্দু সকল ভাৰতত থাকিব নোৱাৰিলে অতি দুৰ্ভাগ্যজনক ঘটনা হ’ব ৷ গতিকে হিন্দু সকলৰ প্ৰতি সহানুভূতি দেখুৱাই ভাৰতীয় নাগৰিকৰ মৰ্যাদা দিৱলৈ মহামান্য উচ্চতম ন্যায়ালয় আৰু চৰকাৰৰ ওচৰত দাবী কৰে ৷ আনকি তৎকালীন ভাৱে নাগৰিকত্ব সংশোধনী বিধেয়ক আইন (CAB) আনি হলেও হিন্দু নাগৰিকক ভাৰতীয় নাগৰিকত্বৰ মৰ্যাদা দিবলৈ আহ্বান জনায় সভাপতি গৰাকীয়ে।