TVK chief Thalapathy vijay meets Governor:
দৈনিক অগ্ৰদূত ডিজিটেল ডেক্স:-সদ্য সমাপ্ত তামিলনাডু বিধানসভা নির্বাচনত আত্মপ্রকাশ কৰিয়েই ইতিহাস ৰচনা কৰা অভিনেতা থলাপতি বিজয় নেতৃত্বাধীন তামিলাগা ভেট্রি কাড়াগাম (টিভিকে)-এ চৰকাৰ গঠন কৰিবলৈ সাজু হৈছে। পৰৱৰ্তী চৰকাৰ গঠনৰ কাৰণে টিভিকেক আৰু ১০ জন বিধায়কৰ সমৰ্থনৰ প্রয়োজন আছে ৷ এনে ঘটনাক্ৰমৰ মাজতে কংগ্ৰেছে চৰ্তহীনভাৱে টিভিকেলৈ সমৰ্থন আগবঢ়াইছে ৷ একেদৰে সমৰ্থন আগবঢ়াইছে চিপিআই, চিপিআইএম, ভিচিকে ৷ কংগ্ৰেছ সহ তিনিও দলতে আছে দহজন বিধায়ক ৷ কংগ্ৰেছৰ আছে ৫ জন বিধায়ক ৷
বুধবাৰে কংগ্ৰেছ সহ তিনিও দলৰ বিধায়ক সমৰ্থন লাভ কৰাৰ পিছতে চৰকাৰ গঠনৰ উদ্দেশ্যৰে তামিলনাডুৰ ৰাজ্যপালক লোক ভৱনত সাক্ষাৎ কৰে টিভিকেৰ মুৰব্বী থালাপতি বিজয় সহ সমৰ্থন আগবঢ়োৱা দল কেইটাৰ বিধায়ক সকলে ৷ টিভিকেৰ মুৰব্বী গৰাকীয়ে ৰাজ্যপালৰ হাতত চৰকাৰ গঠনৰ প্ৰস্তাৱ আগবঢ়াই ।
আনহাতে শপতগ্ৰহণ অনুষ্ঠানৰ কাৰণে চেন্নাইস্থিত জৱাহৰলাল নেহৰু ইনড’ৰ ষ্টেডিয়ামত পূর্ণ গতিত চলিছে প্রস্তুতি। ২০২৪ত গঠিত টিভিকেই এইবাৰ প্ৰথমবাৰৰ কাৰণে নির্বাচনী ৰণত অৱতীৰ্ণ হৈয়েই ১০৮টা সমষ্টিত চমকপ্রদ সফলতা লাভ কৰে।
উল্লেখ্য যে সদ্যসমাপ্ত তামিলনাডু বিধানসভা নির্বাচনত থলা পতি বিজয় নেতৃত্বাধীন টিভিকেই ৰাজ্যখনৰ সৰ্বমুঠ ২৩৪টা সমষ্টিৰ ভিতৰত ১০৮টা সমষ্টিত বিজয় সাব্যস্ত কৰি একক বৃহত্তম দলৰ মৰ্যাদা লাভ কৰিছে যদিও পৰৱৰ্তী চৰকাৰ গঠন কৰিবলৈ দলটোক এতিয়া লাগে আৰু ১০ গৰাকী বিধায়কৰ সমর্থন। টিভিকেৰ মুৰব্বী থলাপতি বিজয়ে ইতিমধ্যে সমর্থন বিচাৰি ভাৰতীয় জাতীয় কংগ্ৰেছৰ নেতৃত্বলৈ আনুষ্ঠানিক পত্ৰ প্ৰেৰণ কৰা বুলি উল্লেখ কৰি দলটোৰ কেন্দ্রীয় সাংগঠনিক সম্পাদক কে চি বেনুগোপালে কয় যে টিভিকেৰ স’তে মিত্রতা সন্দৰ্ভত চূড়ান্ত সিদ্ধান্ত ল’বলৈ তামিলনাডু প্রদেশ কংগ্ৰেছ কমিটীক পূর্ণ কর্তৃত্ব প্রদান কৰা হৈছে। কংগ্রেছ নেতা বেনুগোপালে লগতে দাবী কৰে যে সেই সন্দৰ্ভত টিভিকে নেতৃত্বৰে তামিলনাডু কংগ্ৰেছৰ প্ৰতিনিধিয়ে মঙলবাৰে এক গুৰুত্বপূৰ্ণ বৈঠকত মিলিত হৈ বিজয়ৰ দললৈ পূৰ্ণ সমৰ্থন আগবঢ়াই ৷ কংগ্ৰেছৰ শীর্ষ নেতাজনে লগতে কয় যে তামিলনাডুৰ জনতাই ধৰ্মনিৰপেক্ষ চৰকাৰ গঠনৰ স্বাৰ্থত টিভিকেৰ প্রতি বিপুল জনসমর্থন আগবঢ়াইছে। অর্থাৎ তামিল ৰাইজে বিজেপিক লৈ চৰকাৰ গঠন কৰাটো নিবিচাৰে। ইপিনে, কেন্দ্রীয় নেতৃত্বৰ উদ্ধৃতি দি তামিলনাডু কংগ্ৰেছৰ তত্ত্বাবধায়ক গিৰিশ শুদাংকৰে কয় যে ৰাজ্যখনৰ যুৱ শক্তি, নাৰী সমাজ আৰু সচেতন ৰাইজৰ এক বৃহৎ অংশই ধৰ্মনিৰপেক্ষ আৰু উন্নয়নশীল চৰকাৰ গঠনৰ স্বাৰ্থত টিভিকেক বিপুল সমর্থন আগবঢ়াইছে। গতিকে টিভিকেৰ নেতৃত্বত চৰকাৰ গঠনৰ স্বাৰ্থত কংগ্রেছে পূর্ণ সমর্থন দিবলৈ প্রস্তুত।
তাৎপৰ্যপূৰ্ণ যে টিভিকেৰ মুৰব্বী থলাপতি বিজয়ে ইতিমধ্যে ৰাজহ্বা কৰিছে যে বিজেপিৰ লগত টিভিকেৰ মতাদর্শগত বিৰোধিতা আছে আৰু তেনে বিৰোধিতাৰ কাৰণেই কেন্দ্ৰত ক্ষমতাত থাকিলেও বিজেপিৰে মিত্রতা সম্ভৱ নহয়। ইপিনে,বিজেপিৰ স’তে মতাদর্শগত বিৰোধিতা থকা হেতুকে এনডিএৰ অন্যতম অংশীদাৰ দল এআইএডিএমকেৰ স’তে টিভিকেৰ মিত্ৰতাৰ জল্পনা-কল্পনাও ইমানতে অন্ত পৰিল। বিপৰীতে কংগ্ৰেছৰ লগতে চিপিআই, চিপিআইএম, ভিচিকে আদি দলেও থালাপতি বিজয়ৰ টিভিকেক সমর্থন দিছে।
উল্লেখ্য যে টিভিকে প্রধান থালাপতি বিজয়ে পাৰাম্বুৰ আৰু পূব ট্রিছি- দুয়োটা সমষ্টিতে বৃহৎ ভোটৰ ব্যৱধানত বিজয় সাব্যস্ত কৰে। বিপৰীতে, ডিএমকেৰ সভাপতি তথা তামিলমাডুৰ সদ্য প্রাক্তন মুখ্যমন্ত্রী এম কে ষ্টেলিনে কলাথুৰ সমষ্টিত পৰাজয় বৰণ কৰে। ১৯৯৬ৰ তামিলনাডু বিধানসভা নির্বাচনত তদানীন্তন মুখ্যমন্ত্রী জে জয়াললিতাই বাৰণ্ডৰ সমষ্টিৰ পৰা পৰাজিত হোৱাৰ পাছত ২০২৬ত এম কে ষ্টেলিন মুখ্যমন্ত্ৰীৰ পদবীত থাকি পৰাজয়বৰণ কৰা দ্বিতীয়গৰাকী নেতা। সদ্যসমাপ্ত নির্বাচনত এম কে ষ্টেলিন নেতৃত্বাধীন ডিএমকেই মাত্র ৫৯টা সমষ্টিত জয়ী হ’বলৈ সক্ষম হয়। গুৰুত্বপূৰ্ণ কথাটো হ’ল ‘২৬ৰ নিৰ্বাচনত থলাপতি বিজয়ৰ টিভিকেই বিগত কে’বা দশক ধৰি তামিলনাডুৰ ৰাজনীতিত প্রভুত্ব বিস্তাৰ কৰি অহা ডিএমকে আৰু এআইএডিএমকেক একপ্ৰকাৰে ধৰাশায়ী কৰি দিয়ে। তাতোকৈ লজ্জাজনক বিষয়টো হ’ল কেন্দ্রত ক্ষমতাত থকা বিজেপিয়ে সদ্যসমাপ্ত তামিলনাডু বিধানসভাৰ নিৰ্বাচনত মাত্র এটা সমষ্টিত জিকিবলৈ সক্ষম হয়।
