Gaurav Gogoi:
দৈনিক অগ্ৰদূত ডিজিটেল ডেক্স:-বিধানসভা নির্বাচনত শোচনীয় পৰাজয়ৰ পাছত কংগ্রেছক অসমৰ ৰাইজৰ ওচৰলৈ লৈ যোৱাৰ এক জনসংযোগ অভিযান কার্যসূচী চলোৱাৰ সিদ্ধান্ত গ্রহণ কৰিছে প্রদেশ কংগ্ৰেছে। দলৰ সভাপতি গৌৰৱ গগৈয়ে এই কথা সদৰী কৰে। সামাজিক মাধ্যমৰ জৰিয়তেএই কথা সদৰী কৰাৰ উপৰি দেশৰ বৰ্তমানৰ নিৰ্বাচনী ব্যৱস্থাটোৰ বিৰুদ্ধে ৰাইজৰ মাজত জনমত গঠনৰ অভিযান দলে চলাব বুলি গগৈয়ে কয়।
তেওঁ কয়,অতি শীঘ্ৰে কংগ্ৰেছে ৰাজ্যজুৰি এক বৃহৎ জনসংযোগ অভিযান কার্যসূচী আৰম্ভ কৰিম। ইয়াৰ দ্বাৰা আগন্তুক দিনবোৰত কংগ্ৰেছৰ সাংগঠনিক কার্যকলাপ বৃদ্ধি কৰা হ’ব। অসমৰ ৰাইজৰ স্বাৰ্থত ভালদৰে সেৱা আগবঢ়াবৰ বাবে ৰাইজৰ পৰা দিহা-পৰামৰ্শও গ্রহণ কৰা হ’ব। এয়া কংগ্ৰেছ দলৰ বাবে নতুনকৈ আৰম্ভণি কৰাৰ সময়। আমি কংগ্ৰেছক ‘অসমৰ জনসাধাৰণৰ কংগ্ৰেছ’ দললৈ ৰূপান্তৰিত কৰিম। এতিয়াৰে পৰা কংগ্ৰেছে পূৰ্বতকৈ অধিক জনসাধাৰণৰ মাজলৈ যাব।’
গগৈয়ে লগতে কয় যে কংগ্রেছ সদায় এটা ছাতিৰ দৰে আছে। পুনৰ অসমৰ সকলো জনগণক ৰক্ষাৰ বাবে দলটোক ছাতিলৈ ৰূপান্তৰিত কৰা হ’ব। আনহাতে, কংগ্ৰেছ হ’ব অসমৰ প্ৰকৃত প্রগতিশীল বিকল্প। যিয়ে জনসাধাৰণৰ মাজৰ পৰা সমাধানৰ পথ উলিয়াই ৰাজ্যৰ সমস্যা সমাধান কৰিব। একে সময়তে যেতিয়াই চৰকাৰে ভয়-ভীতি প্ৰদৰ্শন কৰিব, কংগ্ৰেছ সদায় জনসাধাৰণৰ লগত থিয় দিব বুলিও গগৈয়ে সদৰী কৰে। আনহাতে, তেওঁ কয় যে ভাৰতবৰ্ষৰ সমগ্ৰ নির্বাচন ব্যৱস্থাটো এক সংকটত পৰিছে। নির্বাচন পৰিচালনাৰ দায়িত্বত থকা লোকসকলে এটা ৰাজনৈতিক দলৰ সুবিধাৰ বাবে নীতি নির্ধাৰণ কৰিবলৈ থকাৰ দৰে আচৰণ কৰি আছে বুলিও গগৈয়ে উল্লেখ কৰে।
তেওঁ লগতে উল্লেখ কৰে এনেদৰেও, ‘অসম হৈছে এক পৰীক্ষাগাৰ, যাক বিজেপিয়ে সমগ্ৰ ভাৰতত প্ৰসাৰিত কৰিব বিচাৰিছে। তেওঁলোকৰ কৌশল হৈছে- এক দেশ, এক দল,এজন মানুহ। আইনৰ অপব্যৱহাৰ নকৰাকৈ, কোনো প্রতিষ্ঠান দখল নকৰাকৈ অথবা নাগৰিকসকলক চাপ নিদিয়াকৈ তেওঁলোকে জয়লাভ কৰিব নোৱাৰে। আমি ইয়াৰ বিৰুদ্ধে সংগ্রাম কৰিবলৈ আৰু জনতাৰ কণ্ঠস্বৰ হৈ থিয় দিবলৈ সদায় প্রতিশ্রুতিবদ্ধ।’ অৱশ্যে গগৈয়ে লগতে উল্লেখ কৰে যে তেওঁলোকে ভাল কামতসদায় চৰকাৰলৈ সহযোগ আৰু পৰামৰ্শ আগবঢ়াব। অসমৰ স্বাৰ্থত সমর্থনো কৰিব; কিন্তু যেতিয়াই চৰকাৰ অন্যায় আৰু দমন নীতিত নামি পৰিব, তেতিয়াই তেওঁলোকে তাৰ বিৰুদ্ধে থিয় দিব।
