অসমীয়া নৱবৰ্ষৰ পহিলা দিনটোত মুখ্যমন্ত্ৰী সোণোৱালে আজি ডিব্ৰুগড়ৰ নিজা বাসভৱনত এক সংবাদমেল সম্বোধন কৰি প্ৰধানমন্ত্ৰী নৰেন্দ্ৰ মোদীয়ে জনোৱা ২১ দিনীয়া তলাবন্ধ নিষ্ঠাৰে পালন কৰা বাবে ৰাজ্যবাসীৰ শলাগ লোৱাৰ লগতে অহা ৩ মে’লৈ বৃদ্ধি কৰা তলাবন্ধৰ সময়ছোৱাত সামাজিক ব্যৱধানৰ নীতি সম্পূৰ্ণৰূপে মানি চলি ক’ভিড-১৯ ৰ সংক্ৰমণ নিয়ন্ত্ৰণ কৰাৰ ওপৰত বিশেষভাৱে গুৰুত্ব আৰোপ কৰিবলৈ কয়।
ৰাজ্যৰ স্বাস্থ্য বিভাগৰ সৈতে জড়িত চিকিৎসক, নাৰ্ছকে ধৰি লেবৰটৰি টেকনিছিয়ান, আশা কৰ্মী, এম পি ডব্লিউ, চাফাই কৰ্মী, খাদ্য আৰু অসামৰিক যোগান বিভাগ, আৰক্ষী, শক্তি বিভাগ, জনস্বাস্থ্য কাৰিকৰী বিভাগ আৰু বিভিন্ন বিভাগে কৰ’না ভাইৰাছৰ প্ৰতিৰোধৰ বাবে ৰাজ্যত চলি থকা যুঁজত আগবঢ়োৱা অৱদানৰ প্ৰশংসা কৰে। আগন্তুক দিনবোৰত ৰাজ্যত ক’ভিড-১৯ ৰ সংক্ৰমিত ৰোগীৰ সংখ্যা বৃদ্ধি পালেও তেনে পৰিস্থিতিৰ মোকাবিলা কৰিবলৈ ৰাজ্য চৰকাৰ পূৰ্ণৰূপত প্ৰস্তুত হৈ আছে বুলি মুখ্যমন্ত্ৰী সোণোৱালে উল্লেখ কৰি ৰাজ্যবাসীক উদ্দেশ্য কৰি কয় যে তেওঁলোকৰ সহযোগত এই দুৰ্যোগ পূৰ্ণ সময়ৰ পৰা ৰাজ্যখনক উদ্ধাৰ কৰাটো সহজ হৈ উঠিব।
অন্যহাতে, মুখ্যমন্ত্ৰী সোণোৱালে আজি ডিব্ৰুগড় জিলাৰ খনিকৰত জিলা প্ৰশাসনে গৃহহীন পৰিয়ালৰ বাবে স্থাপন কৰা আশ্রয়স্থলীত উপস্থিত হৈ তাত থকা লোকসকলক আহাৰ যোগান ধৰে। আৰু ৰাজ্যৰ দৰিদ্ৰ লোকসকলক সহায় কৰিবলৈ সমাজলৈ আহ্বান জনাই কয় যে সমাজৰ দৰিদ্ৰ আৰু পিছপৰা শ্ৰেণীৰ লোকসকলক খাদ্য সামগ্ৰী যোগান ধৰাৰ বাবে ৰাজ্য চৰকাৰে নিজাববীয়া পদক্ষেপ গ্ৰহণ কৰিছে।
ইয়াৰ উপৰি আজি ভাৰতবৰ্ষৰ সংবিধান প্ৰণেতা বাবাচাহেব ভীমৰাও ৰামজী আম্বেদকাৰৰ জন্ম দিৱসৰ সংগতি ৰাখি মুখ্যমন্ত্ৰী সোণোৱালে তেওঁৰ প্ৰতি গভীৰ শ্ৰদ্ধা নিবেদন কৰে।
