কৰ’না ভাইৰাছৰ প্ৰকোপত পৰি বিশ্বৰ প্ৰায় প্ৰতিখন দেশৰে ব্যৱসায় বাণিজ্যৰ অৱস্থা শোচনীয় হৈ পৰিছে। তলাবন্ধৰ বাবে ৰেস্তোৰাঁ হোটেল আদি বিভিন্ন ব্যৱসায়িক প্ৰতিষ্ঠান বন্ধ হৈ আছে। ইয়াৰে কিছুমান বন্ধ হৈ পৰিছে । জাৰ্মানীও ইয়াৰ ব্যতিক্ৰম নহয় । অন্যান্য ব্যৱসায়িক প্ৰতিষ্ঠানৰ দৰে কৰ’নাৰ বাবে বিপদত পৰিছে জাৰ্মানীৰ বীয়েৰ উৎপাদনকাৰী কোম্পানীসমূহো । হেজাৰ হেজাৰ লিটাৰ বীয়েৰ নষ্ট হোৱাৰ উপক্ৰম হৈছে ।শেষত উপায় নেদেখি বিনামূলীয়াকৈ বীয়েৰ বিতৰণ কৰিবলৈ আৰম্ভ কৰিছে এটা কোম্পানীয়ে ৷
বিভিন্ন কোম্পানীয়ে বিক্ৰীৰ অভাৱত বীয়েৰ পেলাই দিবলৈ বাধ্য হৈছে । বীয়েৰ পেলাই দিয়াৰ পৰিৱৰ্তে বিনামূলীয়া বিতৰণৰ সিদ্ধান্ত গ্ৰহণ কৰে ভিলিংগাৰ ব্ৰাইহাউছ নামৰ জাৰ্মান বীয়েৰ উৎপাদনকাৰী কোম্পানীটোৱে । ইতিমধ্যে জাৰ্মানীৰ হেছে ৰাজ্যত এই কোম্পানীটোৱে দুহেজাৰ ছশ লিটাৰ বীয়েৰ বিতৰণ কৰিছে ৷ কোম্পানীটোৰ স্বত্তাধিকাৰ ফ্ৰাঞ্জ মাষ্টে সংবাদ মাধ্যমৰ আগত কয় “আমি জনগণক ধন্যবাদ জনাব বিচাৰো ৷ আমি আশা ৰাখিছো ৷ এতিয়া যিসকল আহিছে তেওঁলোকে যাতে পৰিস্থিতি স্বাভাৱিক হোৱাৰ পাছতো এইদৰে আমাৰ স’তে থাকে ।
উল্লেখযোগ্য যে এই বীয়েৰসমুহ বিভিন্ন অঞ্চলৰ ৰেস্তোৰাঁ, বাৰ আৰু হোটেললৈ সৰবৰাহ কৰাৰ কথা আছিল । কিন্তু কৰ’না মহামাৰীৰ ধ্বংসলীলাৰ কাৰণে সকলোবোৰ বন্ধ হৈ পৰাত ভিলিংগাৰ ব্ৰাইহাউছ কোম্পানী বিপদত পৰে ৷ উল্লেখযোগ্য যে কোম্পানীটোৱে ব্যৱস্থা কৰা বিভিন্ন বিতৰণ কেন্দ্ৰৰ পৰা বিনামূলীয়া বীয়েৰ সংগ্ৰহৰ বাবে যথেষ্ট ভিৰ পৰিলক্ষিত হয় । প্ৰতিদিনে সামাজিক দূৰত্ব বজাই ৰখা, মাস্ক পৰিধান আদি নানা নিৰ্দেশনা মানি চলি পুৱাৰ পৰাই অসংখ্য লোকে শাৰী পাতি থিয় দি বীয়েৰ সংগ্ৰহ কৰা দেখা গৈছে ৷
উল্লেখযোগ্য যে কৰ’না অতিমাৰীয়ে অন্যান্য ক্ষেত্ৰৰ লগতে জাৰ্মানীৰ বীয়েৰ উৎপাদনতো ব্যাপক প্ৰভাৱ পেলাইছে ৷ গ্ৰীষ্মকালত সমগ্ৰ জাৰ্মানীতে নানা ধৰণৰ বীয়েৰ উৎসৱৰ আয়োজন কৰা হয় । কিন্তু এইবাৰ বাভাৰিয়াৰ ৰাজ্যৰ বিখ্যাক অক্টোবৰ ফেষ্ট সহ আন সকলো বীয়েৰ উৎসৱ ইতিমধ্যে বাতিল কৰা হৈছে ৷ ইয়াৰ উপৰি চীন আৰু ইটালীলৈ বীয়েৰ ৰপ্তানি বন্ধ হৈ পৰিছে ৷ এই ক্ষেত্ৰত বৃহৎ খহনীয়া হোৱাৰ আশংকা ব্যক্ত কৰিছে জাৰ্মানীৰ বীয়েৰ উৎপাদকসকলৰ সংগঠন ডয়চে ব্ৰাউৱাৰ বুণ্ডেয়ে ।