বিশ্বৰ সৰ্বশক্তিমান দেশৰূপে খ্যাতি অর্জা আমেৰিকাৰ শক্তিক লৈ লাহে লাহে প্ৰশ্ন উত্থাপন হব’লৈ ধৰিছে । স্বাস্থ্য, আন্তঃগাঁথনিৰ পৰা আৰম্ভ কৰি উন্নত চিকিৎসা ব্যৱস্থা এই সকলোবোৰক লৈ আমেৰিকাই সদায়ে নিজকে জাহিৰ কৰি আহিছে; কিন্তু এই অহংকাৰ যে অতি থুনুকা সেয়া প্ৰমাণ কৰিলে ক’ভিড-১৯ সংক্রমণ। মাত্ৰ তিনিমাহৰ ভিতৰত মাৰ্কিন মুলুকত মৃতকৰ সংখ্যা এক লাখ অতিক্ৰম কৰিলে।বিশ্বৰ আন কোনো দেশ ইয়াৰ ওচৰে-পাজৰেও নাই। আমেৰিকাৰ পাছতে দ্বিতীয় স্থানত থকা ব্ৰাজিলত প্ৰায় ২৬হেজাৰ লোকৰ মৃত্যু হৈছে। মাৰ্কিন ৰাষ্ট্ৰপতি ড’নাল্ড ট্ৰাম্পাৰ প্ৰশাসনে অসহায়তা প্ৰকাশ কৰি মৃতদেহৰ সংখ্যা গণনা কৰাৰ বাহিৰে আৰু একো কৰিব পৰা নাই।
জন হপকিন্স বিশ্ববিদ্যালয়ৰ তথ্য অনুসৰি যোৱা নিশাই মৃতকৰ সংখ্যাই আমেৰিকাত এক লাখ অতিক্ৰম কৰিলে। আজি পুৱা পৰ্যন্ত ৰাষ্ট্ৰ খনত ১,০২,১০৭জনৰ মৃত্যু হৈছে আৰু আন ১৮হেজাৰৰ অৱস্থা আশংকাজনক।সংক্ৰমণৰ সংখ্যা আৰু সংক্ৰমিতৰ সংখ্যাৰ ক্ষেত্ৰতো বিশ্বৰ ভিতৰতে আমেৰিকাৰ অৱস্থা অতি শোচনীয়।দেশখনত এই পৰ্যনত প্ৰায় ১৭.৫০ লাখ মানুহ সংক্ৰমিত হৈছে। অর্থাৎ প্ৰতি ১০ লক্ষ জনসংখ্যাৰ ৫২৭৭ জন সংক্ৰমিত হৈছে। প্ৰতি ১০ লক্ষৰ ভিতৰত মৃত কৰ সংখ্যা ৩০৯ জন।কোনোপধ্যেই মৃত্যুৰ মিছিলত লেকাম টানিব পৰা নাই ট্ৰাম্প প্ৰশাসনে।ইয়াৰ উপৰি আর্থিক সংকটৰ ক’লা মেঘে ছানি ধৰিছে ৰাষ্ট্ৰ খনক।এই ক্ষেত্ৰতো বিপৰ্যস্ত হৈছে মাৰ্কিন মুলুক। ৰাষ্ট্ৰখনত বৃদ্ধি পাইছে নিবনুৱাৰ হাৰ আৰু ইয়াৰ সমান্তৰাল ভাৱে তলাবন্ধ প্ৰত্যাহাৰৰ দাবী বিক্ষোভ অব্যাহত আছে।
বিৰোধীৰ অভিযোগ অনুসৰি আৰম্ভণিৰ ট্ৰাম্প প্ৰশাসনৰ গা এৰা দিয়া মনোভাবৰ বাবেই এই অৱস্থা হৈছে। এসময়ত ইটালী, ফ্ৰান্স, স্পেইনৰ দৰে দেশসমূহ কৰ’নাৰ ভয়াবহতাত কঁপিছিল।কৰ’নাৰ সংক্ৰমণে ব্ৰিটেইনকো থকা-সৰকা কৰিছে যদিও এই দেশ সমূহত একপ্ৰকাৰ সংক্ৰমণ নিয়ন্ত্ৰধীন কৰিবলৈ সক্ষম হৈছে চৰকাৰ। এই ক্ষেত্ৰত একেবাৰে বিফল হৈছে আমেৰিকা। তাৎপৰ্যপূৰ্ণ ভাৱে বাকী দেশ সমূহৰ তুলনাত আমেৰিকাত কৰ’নাৰ ভয়াবহতা বহু দেৰিকৈ আৰম্ভ হয়। ৰাষ্ট্ৰ খনত প্ৰথমজন আক্রান্তৰ মৃত্যু হয় ২৬ ফেব্ৰুৱাৰীত। আজি পর্যন্ত মাৰ্কিন মুলুকত মৃতকৰ সংখ্যা এক লক্ষ অতিক্ৰম কৰিলে। ৰাষ্ট্ৰপতি ট্ৰাম্পে অৱশ্যে এই মৃত্যুৰ দায়িত্ব ল’বলৈ আগ্ৰহী নহয়। তেওঁৰ মতে, এনে পৰিস্থিতিৰ বাবে দায়ী চীন।