আগন্তুক ২০২১ ৰ বিধানসভাৰ নির্বাচনত শতাধিক আসন দখলৰ লক্ষ্যৰে বিজেপিয়ে আৰম্ভ কৰিছে অভিযান। বৃহস্পতিবাৰে দলে এই অভিযানৰ বিস্তৃত কাৰ্যসূচী ঘোষণা কৰে। নৰেন্দ্ৰ মোদী নেতৃত্বাধীন কেন্দ্ৰীয় চৰকাৰৰ দ্বিতীয় কাৰ্যকালৰ প্ৰথম বৰ্ষপূতি আৰু সৰ্বানন্দ সোণোৱাল নেতৃত্বাধীন ৰাজ্য চৰকাৰৰ চতুৰ্থ বৰ্ষপূতি উপলক্ষে এই কাৰ্যসূচী ঘোষণা কৰা হৈছে বুলি সদৰী কৰিছে যদিও দলে ৫০ লাখ পৰিয়ালৰ লগত সম্পৰ্ক ৰক্ষাৰ লক্ষ্যৰে আৰম্ভ কৰিবলৈ লোৱা জনসম্পর্ক অভিযানত বিশেষকৈ বিজেপি ৰ দখলত নথকা সমষ্টিসমূহত অধিক গুৰুত্ব আৰোপ কৰিছে। লক্ষ্যণীয়ভাৱে বিজেপিয়ে মিত্ৰদল অসম পৰিষদৰ ছটা সমষ্টি আৰু বিপিএফৰ সাতটা সমষ্টিত সাংগঠনিক ভেটি সুদৃঢ় কৰাৰ লক্ষ্যৰে এই জনসম্পৰ্ক অভিযান কাৰ্য্যসূচীৰ জৰিয়তে অধিক গুৰুত্ব আৰোপ কৰা হৈছে বুলি সদৰী কৰিছে।
উল্লেখ যে মিত্ৰ দল দুটাৰ মন্ত্ৰীত্ৰয় ফণীভূষণ চৌধুৰীৰ সমষ্টি, প্ৰমীলাৰাণী ব্ৰহ্মৰ সমষ্টি আৰু ৰিহন দৈমাৰীৰ সমষ্টিত এই অভিযানত অন্তৰ্ভুক্ত হোৱা ঘটনাই বিশেষ তাৎপৰ্য বহন কৰিছে। কাৰণ ৰাজ্যজুৰি আৰম্ভ হ’ব লগা এই কাৰ্য্যসূচীৰ জৰিয়তে বিজেপিৰ দখলত নথকা নিৰ্দিষ্ট সমষ্টিত এই কাৰ্যসূচী মুকলি কৰিবলৈ মুৰ্খমন্ত্ৰীৰ লগতে মন্ত্ৰী, সাংসদসকলক নিৰ্বাচিত কৰা হৈছে। ফণীভূষণ চৌধুৰীৰ সমষ্টিত, প্ৰমীলাৰাণী ব্ৰহ্মৰ সমষ্টি আৰু ৰিহন দৈমাৰীৰ সমষ্টিটো এই অভিযান মুকলি কৰিবলৈ তিনিজন মন্ত্ৰীক দায়িত্ব অৰ্পণ কৰা হৈছে। অহা ১৬ জুনৰ পৰা আৰম্ভ হ’ব ৰাজ্যিক বিজেপিৰ জনসম্পর্ক অভিযান আৰু ইয়াৰ জৰিয়তে ৰাজ্যৰ ৫০ লাখ পৰিয়ালক সামৰি লোৱা হ’ব বুলি ৰাজ্যিক বিজেপিৰ সাধাৰণ সম্পাদক পুলক গোহাঁয়ে এক সংবাদমেলত সদৰী কৰে।
যোৱা ৩০ মে’ত কেন্দ্ৰীয় চৰকাৰৰ দ্বিতীয় বছৰৰ প্ৰথম বৰ্ষপূতি আৰু ২৪ মে’ত ৰাজ্য চৰকাৰে সফলতাৰে চাৰিটা বৰ্ষ অতিক্ৰম কৰা উপলক্ষে ৰাজ্যিক বিজেপিয়ে কেতবোৰ কাৰ্যসূচী ৰূপায়ণ কৰা বুলি গোহাঁয়ে উল্লেখ কৰি কয় যে ইতিমধ্যে ৰাজ্যিক বিজেপিৰ মুঠ ৮ টা মৰ্চাৰ সতে এমাহজোৰা ভিডিঅ’ বার্তালাপ অনুষ্ঠানৰ আয়োজন হৈ আছে । এটা মৰ্চাৰ লগত মুঠ তিনিটা পৰ্যায়ত এনে সভা ডিজিটেল মাধ্যমৰ জৰিয়তে অনুষ্ঠিত হ’ব। মৰ্চাৰ ৰাজ্যিক বিষয়ববীয়া, জিলা মৰ্চাৰ লগতে জিলা আইটি চেল আৰু মৰ্চাৰ মণ্ডল সমূহৰ লগত এনে সভা অনুষ্ঠিত হ’ব। সভাপতি ৰঞ্জিত দাসে অংশগ্ৰহণ কৰা এই মুঠ ২৪ খন ভিডিঅ’ বার্তালাপ অনুষ্ঠান ১৫ জুনত শেষ হ’ব বুলি সম্পাদকজনে সদৰী কৰে। ক’ভিড-১৯ ৰ বাবে আগন্তুক তিনি চাৰি মাহলৈ ৰাজ্যত কোনো সভা সমিতি অনুষ্ঠিত নহয় বুলি ৰাজ্যিক বিজেপিৰ সাধাৰণ সম্পাদক পুলক গোহাঁয়ে সদৰী কৰি বিজেপিয়ে এই ক্ষেত্ৰত ডিজিটেল মাধ্যমৰ ওপৰত অধিক গুৰুত্ব প্ৰদান কৰা হৈছে বুলি কয় ।
তেওঁ কয়, ‘চলিত মাহত ৰাজ্যত তিনিখন ভাৰ্চুৱেল ৰেলী আৰম্ভ হ’ব য’ত বিজেপিৰ ৰাষ্ট্ৰীয় অধ্যক্ষ জে পি নড্ডাই দিল্লীৰ পৰা এই ৰেলী সম্বোধন কৰিব। সম্পূৰ্ণ ডিজিটেল মাধ্যমেৰে অনুষ্ঠিত হ’বলগীয়া এই ৰেলী অহা ১৮ জুনত, ২১ জুনত শিলচৰত আৰু ২৪ জুনত ডিব্ৰুগড়ত অনুষ্ঠিত হ’ব।’ এইসমূহ কাৰ্যসূচী চলিত মাহতে সম্পূৰ্ণ কৰি আত্মনির্ভৰ অসম গঢ়াৰ লক্ষ্যৰে ৰাজ্যিক বিজেপিয়ে পাঁচখনকৈ ভিডিঅ’ কনফাৰেন্সৰ জৰিয়তে খেতিয়ক, ব্যৱসায়ী, বহিঃ ৰাজ্যৰ পৰা উভতি অহা শ্রমিক, উদ্যোগী আৰু জিলা মণ্ডলৰ সভাপতিসকলৰ পৰা পৰামৰ্শ গ্ৰহণ কৰিব বুলি কয়। প্ৰধানমন্ত্ৰী নৰেন্দ্ৰ মোদী স্বাক্ষৰিত এখন পত্ৰ আৰু মুখ্যমন্ত্ৰী সৰ্বানন্দ সোণোৱালৰ চাৰিবছৰীয়া কামৰ খাতিয়ান লৈ ১৬ জুনৰ পৰা ৩০ জুন পৰ্যন্ত ৰাজ্যৰ ৫০ লাখ পৰিয়ালৰ ঘৰলৈ যাব ৰাজ্যিক বিজেপি।
জনসম্পৰ্ক অভিযান শীৰ্ষক এই কাৰ্যসূচীৰ বিতং তথ্য দাঙি ধৰি ৰাজ্যিক বিজেপিৰ সাধাৰণ সম্পাদক গোহাঁয়ে কয়, ‘১৬ জুনত ১১ বজাত মুখ্যমন্ত্ৰী সৰ্বানন্দ সোণোৱাল ৰাজ্যিক বিজেপিৰ সভাপতি ৰঞ্জিত দাস আৰু নেডাৰ আহ্বায়ক ড° হিমন্ত বিশ্ব শৰ্মাই এই কাৰ্য্যসূচী আৰম্ভ কৰাৰ পাছতে মন্ত্ৰী, সাংসদ, ৰাজ্যিক বিষয়ববীয়া আৰু বিধায়কসকলে ১১.৩০ বজাত নিৰ্দিষ্ট স্থানসমূহত এই কাৰ্য্যসূচী মুকলি কৰিব। সাম্প্ৰতিক পৰিস্থিতিত সকলোকে এই কাৰ্যসূচীত সামাজিক দূৰত্ব বৰ্তাই ৰাখিবলৈ কোৱাৰ লগতে এটা পৰিয়াললৈ দুজন কৰ্মকৰ্তাহে যাবলৈ কোৱা হৈছে। প্ৰতিটো পৰিয়ালক প্ৰধানমন্ত্ৰী আৰু মুখমন্ত্ৰী স্বাক্ষৰিত একোখন পত্ৰ দিয়া হ’ব।’
