এন ৯৫ মাস্কৰ মূল্য নিয়ন্ত্ৰণ কৰিবলৈ আবেদন জনাই বম্বে উচ্চন্যায়ালয়ত এটি গোচৰ তৰা হৈছে এই গোচৰৰ ভিত্তিত অহা দুসপ্তাহৰ ভিতৰত কেন্দ্ৰীয় চৰকাৰ আৰু ‘নেচনেল ফাৰ্মাচিউটিকেল প্ৰাইচিং অথৰিটি’ক এন ৯৫ মাস্কৰ মূল্য নিয়ন্ত্ৰণলৈ অনাৰ বাবে ব্যৱস্থা গ্ৰহণ কৰিবলৈ নিৰ্দেশ জাৰি কৰিছে বম্বে উচ্চ ন্যায়ালয়ে ।কৰ’না ভাইৰাছৰ সংক্ৰমণ বৃদ্ধি পাবলৈ লোৱাৰ সমান্তৰালভাৱে ক্ৰমে মূল্য বাঢ়িবলৈ লৈছে এন ৯৫মাস্কৰ।
কাৰণ এন ৯৫ মাস্ক পৰিধান কৰি থকা অৱস্থাত ধূলিকণা আৰু জীৱাণু নাকে -মুখে প্ৰৱেশ কৰাৰ পৰা সুৰক্ষিত হৈ থাকিব পাৰি ।তদুপৰি কৰ’নাৰ পৰা সুৰক্ষিত হৈ থাকিবলৈ চিকিৎসক স্বাস্থ্যকৰ্মীকে ধৰি সাধাৰণ সকলো লোককে সম্প্ৰতি মাস্ক পৰিধান কৰিবলৈ নিৰ্দেশ দিছে ‘ইণ্ডিয়ান কাউন্সিল অৱ মেডিকেল ৰিছাৰ্চ’ এ ।
কিন্ত সময়ৰ লগে লগে এন ৯৫মাস্কৰ চাহিদা যিমানেই বৃদ্ধি পাইছে তাতকৈ অধিক হাৰত বাঢ়িবলৈ লৈছে মূল্য।বিগত চাৰি মাহত প্ৰায় ২৫০শতাংশ পৰ্যন্ত মূল্য বৃদ্ধি পাইছে এন ৯৫ মাস্কৰ ।২০১৯ ৰ ছেপ্টেম্বৰত এখন এন ৯৫ মাস্কৰ চৰকাৰী মূল্য আছিল ১২টকা ২৫পইচা ।চলিত বৰ্ষৰ জানুৱাৰীত চৰকাৰী ভাৱে এন ৯৫ মাস্কৰ নিৰ্ধাৰণ কৰা মূল্য আছিল ১৭ টকা ৩৩পইচা ।
মাৰ্চলৈ মূল্য বৃদ্ধি হৈ হয়গৈ ৪২টকা ।যোৱা মে’ত চৰকাৰে এন ৯৫ মাস্ক ক্ৰয় কৰিছে ৬৩টকাকৈ ।চলিত মাহৰ প্ৰথম সপ্তাহতে ভাৰতত কৰ’না সংক্ৰমণ অধিক হাৰত বৃদ্ধি পাবলৈ লোৱাৰ সমান্তৰালভাৱে এন ৯৫ মাস্কৰ মূল্য একেটা পৰ্যায়তে ৬৩ টকাৰ পৰা বাঢ়ি হয়গৈ ১৬৫ টকা ।চৰকাৰে স্বয়ং বৰ্দ্ধিত মূল্যত এন ৯৫ মাস্ক ক্ৰয় কৰিবলৈ লোৱাৰ সময়তে মুকলি বজাৰত এখন এন ৯৫ মাস্কৰ মূল্য হয়গৈ ২৪০ ৰ পৰা ৩০০ টকা ।
ক্ৰমশঃ সাধাৰণ মানুহৰ ক্ৰয় ক্ষমতাৰ পৰা বাহিৰলৈ যাবলৈ লৈছে এন ৯৫ মাস্কৰ মূল্য ।ফলত সমস্যাৰ সন্মুখীন হ’বলগীয়া হৈছে সাধাৰণ লোক ।এক সাক্ষাৎকাৰত বিশ্ব স্বাস্থ্য সংস্থাৰ মহামাৰী বিশেষজ্ঞ মাৰিয়া ভান কেৰখোভে জনোৱা অনুসৰি সকলো সময়তে নীতি -নিয়ম মানি সামাজিক দূৰত্ব অক্ষুন্ন ৰখাটো সম্ভৱ নহয় ।
সেয়েহে বিপদ সংকুল স্থানত থাকিবলৈ বাধ্য হোৱাৰ সময়ত কাপোৰৰ সাধাৰণ মাস্কে কৰ’না সংক্ৰমণ ৰোধ কৰিব নোৱাৰে ।এনে ক্ষেত্ৰত ‘ছর্জিকেল ‘মাস্ক পৰিধান কৰাটো জৰুৰী হৈ পৰে ।সেয়েহে নিজকে সুৰক্ষিত অনুভৱ কৰিবলৈ এন ৯৫ ৰ দৰে মাস্ক বৰ্তমান সময়ত সকলোৱে পৰিধান কৰিবলৈ বিচাৰিছে ।যোগানতকৈ চাহিদা অধিক বৃদ্ধি পোৱাৰ অজুহাতত আকাশলংঘী হৈছে এন ৯৫ মাস্কৰ মূল্য ।
