তলাবন্ধৰ সময়ত নেদেখা জনৰ কোপদৃষ্টি স্বয়ং ভগৱানৰ ঘৰৰ ওপৰতো পৰিছে । দেশৰ প্ৰায় প্ৰতিটো মন্দিৰতে সম্প্ৰতি নগদ ধনৰ অভাৱে দেখা দিছে । মন্দিৰৰ কৰ্মচাৰীসকলক দৰমহা দিয়াৰ ক্ষেত্ৰতো সমস্যাৰ সন্মুখীন হৈছে দেশৰ বহু বৃহৎ ধৰ্মানুষ্ঠানে।তিৰুপতি বালাজি মন্দিৰকে ধৰি দেশৰ বহুকেইটা প্ৰসিদ্ধ ধৰ্মীয় অনুষ্ঠানে এনে সমস্যাৰ সন্মুখীন হোৱাৰ পাছত ইয়াৰ তালিকাত শেহতীয়াকৈ নাম সংলগ্ন হৈছে পশ্চিমবংগৰ নদিয়াৰ মায়াপুৰ ইস্কন মন্দিৰৰ নাম ।
মন্দিৰটোৰ পৰা ইতিমধ্যে ডেৰ হেজাৰ কৰ্মচাৰীয়ে কাম হেৰুৱাবলগীয়া হৈছে । মন্দিৰৰ কৰ্তৃপক্ষই জনোৱা অনুসৰি তলাবন্ধৰ আৰম্ভণিৰ সময়ৰে পৰা দুৰ্গত সকলক সাহায্য আগবঢ়াই অহা হৈছে । মন্দিৰৰ তহবিলৰ পৰা পানীৰ দৰে এই ক্ষেত্ৰত ধন ব্যয় কৰা হয় । কৰ্মচাৰী সকলৰ মাজতো মন্দিৰ কৰ্তৃপক্ষই যথাসম্ভৱ আৰ্থিক সাহায্য বিতৰণ কৰে এই সময়ছোৱাত । মন্দিৰ চৌহদৰ প্ৰধান প্ৰৱেশদ্বাৰ বৰ্তমানেও মুকলি কৰা হোৱা নাই । সেয়েহে মন্দিৰলৈ ভক্তৰ আগমন বন্ধ হৈ আছে ।
স্বাভাৱিকতে এনে পৰিস্থিতিত মন্দিৰৰ আয়ৰ পথো বন্ধ হৈ পৰিছে । ফলত মন্দিৰ কৰ্তৃপক্ষই সেৱামূলক কামত জড়িত কৰ্মচাৰীৰ সংখ্যা হ্ৰাস কৰিবলৈ বাধ্য হৈছে । অৰ্থনৈতিক সংকটৰ সন্মুখীন হ’লেও মন্দিৰ কৰ্তৃপক্ষই সাহায্য সামগ্ৰী বিতৰণ অব্যাহত ৰাখিছে । তলাবন্ধ আৰম্ভ হোৱাৰ সময়ৰে পৰা মন্দিৰৰ বাহিৰত দৈনিক পাঁচ হেজাৰৰো অধিক লোকৰ মাজত খিচিৰি বিতৰণ কৰি অহা হৈছে । মন্দিৰ চৌহদৰ ভিতৰত বহু লোকে কাম কৰি আছে ।এই লোকসকলৰ লগতে অধ্যয়নৰ বাবে অহা বহু শিক্ষাৰ্থীও আবদ্ধ হৈ আছে মন্দিৰ চৌহদতে । এই ক্ষেত্ৰত ইতিমধ্যে প্ৰচুৰ ব্যয় কৰিবলগীয়া মন্দিৰ কৰ্তৃপক্ষই । তদুপৰি মন্দিৰৰ দৈনিক পূজা-অৰ্চনা তথা অন্যান্য নিত্য প্ৰয়োজনীয় দিশতো দৈনিক ব্যয় কৰিবলগীয়া হয় বহু ধন । এনে ক্ষেত্ৰত এইবাৰ ৰথযাত্ৰা মন্দিৰৰ চৌহদতে অনুষ্টুপীয়াকৈ অনুষ্ঠিত কৰিবলৈ সিদ্ধান্ত লৈছে মন্দিৰ কৰ্তৃপক্ষই ।
জগন্নাথ, বলদেৱ আৰু সুভদ্ৰাৰ ৰথ তিনি খনৰ ৰছী টানিব মাত্ৰ ২০ জন ভক্তই । কীৰ্তন বা পূজাৰ বাবে থাকিব মাত্ৰ পাঁচজন পুৰোহিত । মন্দিৰৰ মুখ্যজনসম্পৰ্কৰক্ষী বিষয়া ৰচিক গৌৰাংগ দাসে জনোৱা অনুসৰি কাম হেৰুওৱা কৰ্মচাৰী সকলক মন্দিৰৰ তৰফৰ পৰা কিছু নগদ ধনৰ লগতে সাহায্য সামগ্ৰীও প্ৰদান কৰা হয় । এনে কাৰণটো মন্দিৰ কৰ্তৃপক্ষই বহু লক্ষ টকা ব্যয় কৰিবলগীয়া হয় । মন্দিৰ কৰ্তৃপক্ষই শেহতীয়াকৈ মন্দিৰৰ বাবে সাহায্য বিচাৰি দেশে-বিদেশে অনলাইনযোগে আহ্বান জনাইছে । বহুজনে এই আহ্বানৰ প্ৰতি সঁহাৰি জনাই সাহায্য প্ৰদানো কৰিছে ।
