ৰাইজে নখ জোকাৰিলে নৈ বয় যায় সেই কথাষাৰ পুনৰবাৰ প্ৰতিপন্ন কৰিলে শোণিতপুৰ জিলাৰ মিছামাৰীৰ বেলশিৰি গাঁৱৰ ৰাইজে।পৰিৱৰ্তনকামী বিজেপি নেতৃত্বাধীন ৰাজ্য চৰকাৰখনৰ উন্নয়ণৰ বিপৰীতে ৰাইজে গাঁঠিৰ ধন ভাঙি আৰু শ্ৰমদানৰে নিৰ্মাণ কৰা এখন বাঁহৰ দলং অৱশেষত সম্পূৰ্ণ হৈ উঠিল। দলংখনৰ শুভ উদ্বোধন কৰিলে ৰাইজে।
ৰাইজে বিগত প্ৰায় তিনি মাহ ধৰি ননকে বেলশিৰি গাঁৱৰ ৰাইজে বেলশিৰি নদীৰ ওপৰত নিৰ্মাণ কৰা ১৪৬ ফুট দৈৰ্ঘ্য আৰু ৮ বহল দলংখন মাংগলিক অনুষ্ঠান মাজেৰে শুভ উদ্বোধন কৰে সমাজ সেৱক শৈলেন্দ্ৰ নাৰ্জাৰীয়ে। ৰাইজে ঘৰে ঘৰে বাঁহ সংগ্ৰহ কৰি প্ৰায় ৭৫ হাজাৰ টকা ব্যয় সাপেক্ষে নিৰ্মাণ কৰি উলিওৱা বাঁহৰ দলংখনৰ দুয়োমূৰে কলগছ পুতি, ধূপ-ধূনা, চাকি-বন্তি জ্বলাই, নৈবদ্য আগবঢ়াই আয়তিৰ উৰুলী ধ্বনিৰ মাজেৰে দলংখন যাতায়তৰ বাবে আনুষ্ঠানিক ভাৱে মুকলি হোৱাৰ পিছতেই বৃহত্তৰ অঞ্চলৰ ৰাইজে স্বস্তিৰ নিশ্বাস পেলাই।উল্লেখ্য দেশে স্বাধীনতা লাভ কৰা প্ৰায় ৭২ বছৰ অতিক্ৰম কৰাৰ পিছতো ৰাইজৰ যাতায়তৰ ক্ষেত্ৰত উপযোগী হোৱাকৈ বেলশিৰি নদীৰ ওপৰত এখন পকী দলং নিৰ্মাণ নোহোৱাত প্ৰায় ২০ খনৰো অধিক গাঁৱৰ ৰাইজৰ লগতে ছাত্ৰ-ছাত্ৰীসকলে যমৰ -যাতনা ভোগ কৰি আহিছিল।
ধনখনা উচ্চ মাধ্যমিক বিদ্যালয়ৰ শিক্ষক অজিত তালুকদাৰ, সমাজ কৰ্মী ভিক্টৰ নাৰ্জাৰী আৰু শিৱ কিষাণৰ নেতৃত্বত নিৰ্মাণ হোৱা দলংখনৰ পৰা ৰাইজে যাতায়তৰ ক্ষেত্ৰত আজিৰে উপকৃত হ’ব সেয়া নিশ্চিত হৈ পৰিছে। বিশেষকৈ অঞ্চলটোত দুৰ্ঘটনা প্ৰতিৰোধ হ’ব আৰু বহু লোকৰ প্ৰাণ ৰক্ষা পৰিব। উল্লেখ্য যে ৰাইজে যি ঠাইত বাঁহৰ দলংখন নিৰ্মাণ কৰিছ তাৰ নিচেই কাষতে এখন ৰেলৱে বিভাগৰ লোহাৰ দলং আছে। বিভাগটোৱে বেলশিৰি নদীৰ ওপৰত নিৰ্মাণ কৰা ২৭৫ নম্বৰৰ দলংখনৰ ওপৰেদি ৰাইজে বছৰ পাছত বছৰ ধৰি মৰণক শৰণ কৰি অহা-যোৱা কৰি আহিছিল।
ৰঙিয়া-ৰঙাপৰা সংযোগী ব্ৰডগজ ৰেলপথচোৱাৰ নদীখনৰ ওপৰত থকা দলংখনৰ ওপৰেদি ৰাইজে যাতায়তৰ কৰাৰ সময়ত দ্ৰুতগতি অহা ৰেলৰ খুন্দাত এতিয়ালৈকে ১৫ জনৰ অধিক লোকৰ মৃত্যু ঘটিছে। যোগাযোগৰ ক্ষেত্ৰত বিকল্প ব্যৱস্থা নথকাত উপায় বিহীন হৈ ৰাইজ আৰু ছাত্ৰ-ছাত্ৰীসকলে মৰণক শৰণ কৰি ৰেলেৱে দলংখনৰ ওপৰেদি অহা-যোৱা কৰি আহিছিল।
ননকে বেলশিৰি গাঁৱৰ ৰাইজে বাঁহৰ দলংখন নিৰ্মাণ কৰাত পৰ্যাপ্ত ভাৱে এটি জ্বলন্ত সমস্যাৰ পৰা পৰিত্ৰাণ পাইছে। কিন্তু ৰাইজৰ এটা দীৰ্ঘদিনীয়া সমস্যা সমাধান কৰাৰ ক্ষেত্ৰত চৰকাৰৰ জনপ্ৰতিনিধি সকলে কোনো ধৰণৰ গুৰুত্ব প্ৰদান নকৰাৰ অভিযোগ উত্থাপিত হৈছে। সেয়া যি কি নহওক ৰাইজে নিৰ্মাণ কৰা দলংখন শুভ উদ্বোধনৰ প্ৰাকক্ষণত এক উখল-মাখল পৰিবেশ বিৰাজ কৰে। দলংখন চাবলৈ অঞ্চলটোৰ আৱাল-বৃদ্ধা-বনিতা ভিৰ কৰি তোলা পৰিলক্ষিত হয়।
