সমষ্টিত পঁচিশ বছৰে নেদেখা পৰিস্হিতিৰ সন্মুখীন হ’ল নজৰুল ইছলাম
মৰিগাঁও জিলাৰ ভূৰাগাঁৱত আজি এক অপ্ৰীতিকৰ পৰিস্হিতিৰ সন্মুখীন হ’ল নগাঁও লোক সভাৰ সাংসদ প্ৰদ্যুত বৰদলৈৰ নেতৃত্বত অহা এটি চাৰিজনীয়া জনপ্ৰতিনিধিৰ দলে । দলটোত আছিল নগাঁও লোক সভাৰ সাংসদ প্ৰদ্যুত বৰদলৈ, লাহৰীঘাট সমষ্টিৰ বিধায়ক ডাঃ নজৰুল ইছলাম, মৰিগাঁও বিধান সভাৰ প্ৰাক্তন বিধায়ীকা জোন জোনালী বৰুৱা আৰু নগাঁৱৰ প্ৰাক্তন বিধায়ক দূৰ্লভ চমুৱা। উল্লেখ্য যে দীৰ্ঘদিন সমষ্টিবাসীৰ পৰা আঁতৰত থকা আৰু সমষ্টিবাসীৰ এটি সাধাৰণ ভগ্ন মথাউৰীৰ মেৰামতিৰ ব্যৱস্হা কৰিব নোৱাৰা ক্ৰমে ডাঃ নজৰুল ইছলাম আৰু যোৱা দূৰ্গা পূজাতে ভূৰাগাঁৱলৈ আহি আজি পৰ্যন্ত সমষ্টিত মুখ দেখুৱাবলৈ নহা সাংসদ প্ৰদ্যুত বৰদলৈৰ আগমনৰ বাৰ্তা বিয়পি পৰা মাত্ৰকে আজি ভূৰাগাঁৱৰ বানাক্ৰান্ত সকল ক্ষুব্ধ হৈ পৰে।
চাৰিওজন প্ৰতিনিধিয়ে লাহৰীঘাটৰ কাঠনি আৰু টেঙাগুৰী অঞ্চল পৰিভ্ৰমন কৰি ভূৰাগাঁৱত উপস্হিত হোৱা মাত্ৰকে ক্ষুব্ধ বানাক্ৰান্তই প্ৰদ্যুত বৰদলৈ “গ’ বেক, নজৰুল ইছলাম গ’ বেক” আদি ধ্বনিৰে উত্তাল কৰি চাৰিওজন জনপ্ৰতিনিধিকে আগচি ধৰে। পৰিস্হিতি এনে পৰ্যাই পাইগৈ যে বানাক্ৰান্তই নজৰুল ইছলামক শূণ্য দুৰত্বৰ পৰা ২৫ বছৰে আপুনি আমাক কি দিলে, আমি মাটি ভেটি হেৰুৱাই পঢ়া শুনা বাদ দি পথৰ ভিকহু হলো আদি বাক্য বানেৰে থকা সৰকা কৰে। সাংসদ প্ৰদ্যুত বৰদলৈকো পূজাৰ পৰা ইমান দিন আপুনি ক’ত আছিল, নিৰ্বাচনৰ সময়ত দিয়া ভাষণবোৰ কি হ’ল আদি প্ৰশ্ন কৰি বাকৰুদ্ধ কৰে। উল্লেখ্য যে এয়া কোনো বানাক্ৰান্তই বান সাহায্য নেপোৱাৰ প্ৰতিবাদ নাছিল। কেৱল এটা ভগ্ন মথাউৰী নিৰ্মাণ কৰি ভূৰাগাঁও বাসীক ৰক্ষা কৰিব নোৱাৰা ক্ষোভৰ বহিঃপ্ৰকাশহে আছিল।
মৰিগাঁও জিলা জলসম্পদ বিভাগে এইবাৰ প্ৰায় ত্ৰিশ কোটি টকা ব্যয় কৰি কে’বাটাও মথাউৰী নিৰ্মাণ কৰিছে । তথাপিতো ভূৰাগাঁও ৰাজহ চক্ৰৰ নব্বৈ খন গাঁও বানত বুৰিব লগা হ’ল। ইয়াৰ মূলতেই হৈছে ভূৰাগাঁৱৰ দিঘলিআটীৰ পৰা বৰালিমাৰী লৈ থকা ন কিলোমিটাৰ ৰিং বান্ধটোৰ চাৰি কিলোমিটাৰ অংশ আজিৰ পৰা চাৰি বছৰৰ আগতে বিচ্ছিন্ন হৈছিল। মথাউৰীটো নিৰ্মাণ কৰিছিল মৰিগাঁও গ্ৰামোন্নয়ন বিভাগে। বান গৰাখহনীয়াৰ স্হায়ী সমাধানৰ কথা বাদেই আনকি এই চাৰি কিলোমিটাৰ ভগ্ন বান্ধ মেৰামতিৰ ব্যৱস্হা কৰিবলৈ ভূৰাগাঁও বাসীয়ে সাংসদ প্ৰদ্যুত বৰদলৈ আৰু বিধায়ক নজৰুল ইছলামক বাৰম্বাৰ অনুৰোধ কৰাৰ পাছতো এই কামটোৰ দায়িত্ব ল’ব নোৱাৰিলে দুইজন প্ৰতিনিধিয়ে।
যাৰ ফলত বান্ধটো মেৰামতি নহ’ল আৰু সেই উন্মুক্ত অংশৰে ব্ৰহ্মপুত্ৰৰ বাঢ়নী পানী সোমাই ভূৰাগাঁও ৰাজহ চক্ৰৰ বিস্তৰ ক্ষতিসাধন কৰে। সেয়ে প্ৰতিনিধি দুজন উপস্হিত হোৱা মাত্ৰকে বানাক্ৰান্ত লোক সকল স্বতঃস্ফূতভাৱে আগুৱাই আহি এক অবৰ্ণনীয় জলন্ত পৰিস্হিতিৰ সৃষ্টি কৰে । বানাক্ৰান্তৰ মাজত আৱদ্ধ হৈ পৰা চাৰি প্ৰতিনিধিক ভূৰাগাঁও আৰক্ষীয়ে কোনোমতে নিৰাপদে ক্ষুব্ধ বানাক্ৰান্তৰ মাজৰ পৰা উলিয়াই পঠাবলৈ সক্ষম হয়। অৱশ্যে বানাক্ৰান্ত আৰু একাংশ স্হানীয় কংগ্ৰেছ কৰ্মীৰ মাজত কিছু হতাহতি হয়। উন্নয়নমূলক কাম-কাজৰ পৰা আঁতৰত থকা সৰ্বকালৰ ব্যৰ্থ প্ৰতিনিধি ডাঃ নজৰুল ইছলামে যোৱা ২৫ বছৰীয়া কাৰ্যকালত নিজা সমষ্টিত কেতিয়াও সন্মুখীন নোহোৱা পৰিস্হিতিৰ মুখামুখী হ’ল আজি। তদ্ৰুপ গণবিচ্ছিন্ন নেতা প্ৰদ্যুত বৰদলৈৰো একেই দশা হল নিজা সমষ্টিত।
বানাক্ৰান্তৰ মূৰ্ত্তি দেখি চুৰ্তি হেৰুৱা জোন জোনালী বৰুৱাই গাড়ীৰ পৰা নামিবলৈকে সাহস নকৰিলে। একে অৱস্হা হ’ল নগাঁৱৰ প্ৰাক্তন বিধায়ক দুৰ্লভ চমুৱাৰ । ঘটনাৰ সন্দৰ্ভত আছুৰ কেন্দ্ৰীয় কাৰ্যনিৰ্বাহক নৱ কুমাৰ নাথে কয় – এয়া কোনো নিৰ্দিষ্ট দল সংগঠনৰ প্ৰতিবাদ নহয়। এয়া কোনো পৰিকল্পিত প্ৰতিবাদ নহয়, বৰং আছু, জাতিয়তাবাদী যুৱ ছাত্ৰ পৰিষদ, কোচ ৰাজবংশীকে আদি কৰি প্ৰায় সকলো স্হানীয় সংগঠনকে ধৰি বিশেষকৈ বানত সৰ্বস্বান্ত লোকৰ তথা বন্যাৰ্তৰ ক্ষোভৰ বহিঃ প্ৰকাশ। অকৰ্মন্য জনপ্ৰতিনিধিৰ উন্নয়ন বিৰোধী আৰু গণ বিচ্ছিন্ন চৰিত্ৰ এক প্ৰত্যুত্তৰ।
আনহাতে এনে পৰিস্হিতিৰ সন্মুখীন হৈ সাংসদ প্ৰদ্যুত বৰদলৈয়ে সাংবাদিকৰ আগত প্ৰতিক্ৰিয়া প্ৰকাশ কৰি কয় বন্যাৰ্তৰ এই প্ৰতিবাদ তেনেই স্বাভাৱিক। প্ৰকাৰন্তৰে বন্যাৰ্তৰ ক্ষোভক যুক্তিযুক্ততাক অকপতে স্বীকাৰ কৰি লয় সাংসদ প্ৰদ্যুত বৰদলৈয়ে। অৱশ্যে বানাক্ৰান্তই উপযুক্ত বান সাহায্য নোপোৱা বুলি অভিযোগ কৰে সাংসদ বৰদলৈয়ে।
