তিনিচুকীয়া জিলাৰ ডুমডুমা বিধানসভা সমষ্টিৰ অন্তৰ্গত বৰডুবি গাঁও পঞ্চায়তৰ অন্তৰ্গত দহ নম্বৰ ৱাৰ্ড তথা বৰডুবি চাহ বাগিছাৰ তিনি দলং লাইনৰ ৰাইজে আজি ডিজিটেল ভাৰতৰ দিনতো নেদেখিলে কোনো উন্নয়ন । পথ, বিজুলী, খোৱা পানী, চিকিৎসা আদি আধুনিক জীৱন ধাৰণৰ বাবে প্ৰয়োজনীয় কোনো ব্যৱস্থাই এই ৱাৰ্ডৰ আবাসীৰ বাবে উপলব্ধ নহয় । ৰোগীৰ চিকিৎসাৰ বাবে ঘৰৰ পৰা নিয়া হয় ঠেলাত । নাইবা কেইজনমান লোকে ৰোগীক দাঙি নিব লগা চিকিৎসালয়লৈ । অঞ্চলটোৰ মূল পথৰ দলংখন ভঙা, তদুপৰি পথত দ দ গাত ।
উল্লেখযোগ্য যে, অসম চৰকাৰৰ গড়কাপ্তানী বিভাগৰ অন্তর্গত বৰডুবি গান্ধীগাঁৱৰ পৰা বৰডুবি চাহ বাগিচাৰ কলঘৰলৈকে থকা প্ৰায় পাঁচ কিলোমিটাৰ পথৰ পকীকৰণ আৰু এই পথত থকা ডুমডুমা নদীৰ ওপৰৰ পকী দলং বাঢ়নী পানীয়ে উটুৱাই নিয়াৰ পিছত যোগাযোগ ব্যৱস্থা ব্যাহত হৈ আজিৰ বিজ্ঞান আৰু প্ৰযুক্তি বিদ্যাৰ উত্তৰণৰ সময়তো আবাসী আদিবাসী লোক সকলে কটাবলগীয়া হৈছে দুৰ্বিসহ জীৱন । স্থানীয় ৰাইজ তথা চাহ জনজাতি সংগঠন সমূহৰ বিভিন্ন সময়ত আবেদন দিয়াৰ পিছতো গা লৰা নাই স্থানীয় সাংসদ প্ৰদান বৰুৱা, বিধায়ক দুৰ্গা ভূমিজৰ ।
ৰাইজৰ অভিযোগ অনুসৰি, বছৰ বছৰ ধৰি ৰাইজৰ প্ৰতিনিধি সকলে নিৰ্বাচনৰ সময়ত কেৱল ভোটৰ অংকত আহি দলং নিৰ্মাণ, পথ পকীকৰণ, বিশুদ্ধ খোৱা পানী, বিজুলীৰ ব্যৱস্থা, স্বাস্থ্য কেন্দ্ৰ নিৰ্মাণৰ মিছা প্ৰতিশ্ৰুতি প্ৰদান কৰি যায় । কিন্তু আজি পৰ্যন্ত কোনো প্ৰতিশ্ৰুতিয়েই কায্যকৰী ৰূপ নোপোৱাত স্থানীয় লোকসকলৰ চৰকাৰ আৰু জন প্ৰতিনিধিৰ প্ৰতি আস্থা আৰু হেৰাই গৈছে ।
