দেশজুৰি ক’ভিড-১৯ এ সৃষ্টি কৰা পৰিৱেশত অনলাইন শিক্ষাই বিশেষ গুৰুত্ব লাভ কৰিছে। বিভিন্ন বিদ্যালয়-মহাবিদ্যালয়ত অনলাইন ক্লাছৰ জৰিয়তে শিক্ষাদানৰ ব্যৱস্থা কৰা হৈছে। ইয়াৰ ফলত শিক্ষাৰ্থীসকলে অনলাইন পাঠদানৰ পদ্ধতিৰ স’তে বিভিন্ন সীমাবদ্ধতাৰ বাবে এখন যুঁজত লিপ্ত হ’বলগীয়া হোৱাৰ দৰে পৰিৱেশৰ সন্মূখীন হৈছে।
শেহতীয়াভাৱে এন চি ই আৰ টি এ এখন সমিতি গঠন কৰি এই সম্পৰ্কত জৰীপ চলাবলৈ দিয়াৰ পাছত বহু গুৰুত্বপূৰ্ণ তথ্য উদ্ধাৰ হৈছে। এই সমীক্ষা অনুসৰি, শিক্ষণৰ এই বিকল্প ব্যৱস্থাই সকলো ছাত্ৰ-ছাত্ৰীৰ বাবে সমমানৰ শিক্ষা নিশ্চিত কৰিব নোৱাৰে । বিকল্প পদ্ধতি শিক্ষণৰ ক্ষেত্ৰত দেখা দিয়া বৈষম্যৰ কাৰণসমূহ হৈছে শিক্ষকসকলৰ সময়ৰ অসমবিতৰণ, ছাত্ৰ-ছাত্ৰীৰ ক্ষেত্ৰত এনে শিক্ষণৰ প্রতি পৰিয়ালৰ সমৰ্থনৰ অভাৱ ।
এই জৰীপৰ তথ্য অনুসৰি তলাবন্ধৰ সময়ছোৱাত আৰু ইয়াৰ পাছত ৫০ শতাংশ ছাত্ৰ-ছাত্ৰীয়ে সমস্যাৰ সন্মুখীন হৈছে । ২০ ৰ পৰা৩০ শতাংশ ছাত্ৰ-ছাত্ৰীয়ে কয় তেওঁলোক কঠিন অভিজ্ঞতাৰ সন্মূখীন হৈছে আৰু১০ ৰ পৰা ২০ শতাংশই কয় যে এয়া তেওঁলোকৰ বাবে বোজা সদৃশ হৈছে । এনে বিভিন্ন প্ৰতিবন্ধকতাৰ কাৰণ হৈছে দুৰ্বল ইণ্টাৰনেট, নেটৱৰ্ক সংযোগ আৰু ছিগনেল । ম’বাইল ফোনৰ জৰিয়তে অনলাইন ক্লাছত শিক্ষাদান কৰাটো কঠিন বিষয় বুলি জৰীপত কোৱা হৈছে ।
একে সময়তে ছাত্ৰ-ছাত্ৰী সকলৰ ফলদায়ক শৈক্ষিক উদ্দেশ্যৰ বাবে সঁজুলিৰ ব্যৱহাৰৰ জ্ঞান সীমিত বা বহুতৰে নাই। একেদৰে শিক্ষকসকলো অনলাইন শিক্ষাৰ পদ্ধতিৰ স’তে সুপৰিচিত নহয় । জৰীপত দেখা গৈছে যে অধিকাংশ ছাত্ৰ-ছাত্ৰী অথবা শিক্ষককে ধৰি অংশীদাৰ সকলে ম’বাইল ফোনৰ ব্যৱহাৰ কৰিছে । ইয়াৰ পাছতে আছে লেপটপ। চৰকাৰে বিভিন্ন সময়ত উদগনি জনালেও টেলিভিছন আৰু ৰেডিঅ’ৰ ব্যৱহাৰ ক’ভিড-১৯ পৰিস্থিতিত তেনেই নূন্যতম। অধিকাংশ ছাত্ৰ-ছাত্ৰীয়ে ম’বাইলৰ ওপৰতে ভৰসা কৰা দেখা গৈছে। জৰীপৰ তথ্য অনুসৰি অনলাইন পদ্ধতিৰে গণিতৰ শিক্ষা গ্ৰহণ অতি কঠিন বিষয়।
