চিৰাং জিলাৰ আমগুৰী থানাৰ অন্তৰ্গত পাটাবাৰীত বন বিভাগৰ লোকক আক্ৰমণ বেদখলকাৰীৰ । চিৰাং বন বিভাগৰ কে’বাজনো লোক আহত হোৱাৰ লগতে এজনৰ অৱস্থা সংকটজনক । চিৰাং সংমণ্ডল বন বিষয়া ব্ৰহ্মানন্দ পাতিৰীয়ে জনোৱা মতে, পাটাবাৰীত বন বিভাগৰ পাঁচশ হেক্টৰতকৈ অধিক বন বিভাগৰ ভূমি আছে । বনাঞ্চল সংৰক্ষিত এই ভূমিত বনাঞ্চল গঢ় দিয়াৰ চেষ্টা চলাইছে বন বিভাগে ।
তাৰে মাজত এশ হেক্টৰ ভূমিত চিৰাং বন বিভাগে যোৱা ৭ আগষ্টৰ পৰা গছপুলি ৰোপণৰ কাম চলি আছিল । আজিও আমটেকা আৰু কুকলং বনাঞ্চলৰ একাংশ বন বিভাগৰ লোকে কাম কৰি আছিল । কিন্তু কিছু জনজাতীয় ধনী শ্ৰেণীৰ লোকে উক্ত ভূমি অবৈধ ভাৱে দখল কৰাৰ চেষ্টা চলাই আছিল ।
বন বিভাগে তেওঁলোকক কে’বাবাৰো বুজোৱাৰ পিচতো আজি বন বিভাগৰ লোকে কাম কৰি থকা অৱস্থাত হঠাতে থাইচোগুৰীৰ অজা বসুমতাৰী, লেন্দাই দৈমাৰী, ছুদেমপাৰাৰ ৰিপক নাৰ্জাৰী, বেশৰবাৰীৰ সঞ্জিৱ বসুমতাৰী, অক্সিগুৰীৰ পছিছ বৰগয়াৰী, বেশৰ বাৰীৰ নিতেন বৰগয়াৰী, অক্সিগুৰীৰ মেলেকো নাৰ্জাৰীৰ নেতৃত্বত কিছু লোকে বন বিভাগৰ লোকক আজি বিয়লিৰ ভাগত আক্ৰমণ কৰে ।
উপায়ান্তৰ হৈ শূণ্যলৈ কে’বাজাই গুলি চলোৱাৰ পিচতহে বন বিভাগৰ লোকসকল ৰক্ষা পৰে । আক্ৰমণত বন বিভাগৰ কে’বাজনো লোক আহত হয় । তাৰ ভিতৰত বাতাবাৰী জইন্ট ফৰেষ্ট মেনেজমেন্টৰ সভাপতি উত্তম মুচাহাৰী গুৰুতৰ ভাৱে আহত হয় । আহত মুচাহাৰী বৰ্তমান বঙাইগাঁওৰ ব্যাক্তিগত নাৰ্ছিং হোমত চিকিৎসাধীন অৱস্থাত আছে ।
এই সন্দৰ্ভত আমটেকা বনাঞ্চলিক বিভাগৰ পৰা আমগুৰি থানাত এজাহাৰ দাখিল কৰা বুলিও জনায় চিৰাং সংমণ্ডল বন বিষয়া ব্ৰহ্মানন্দ পাতিৰীয়ে। এই সন্দৰ্ভত আমগুৰী থানাত ভাৰতীয় দণ্ডবিধিৰ ৪৪৭/৪২৭ ধাৰা অনুসৰি ৩৯/২০ নম্বৰ গোচৰ পঞ্জীয়ন হৈ আছিল যোৱা আগষ্ট মাহতে । তাৰ পিচতো আজি এই ঘটনা সংঘটিত হয় আৰু আজিও বন বিভাগে গোচৰ দিব লগীয়া হয়।
পাতিৰীয়ে লগতে জনায় যে জিলাখনৰ বনাঞ্চল ধ্বংস হৈ অহাৰ ফলতে নৈ সমূহৰ গৰাখহনীয়াই তীব্ৰ ৰূপ ধাৰণ কৰিছে । যাৰ বাবে তৎকালীন ভাৱে বৃহত্তৰ ঔগুৰি, পাটাবাৰী, আইধুবুৰি, নাঙলভাঙা আদি অঞ্চল নৈৰ গৰাখহনীয়াৰ পৰা ৰক্ষাৰ বাবে এইদৰে পাটাবাৰীত বন বিভাগৰ ভূমিত গছ পুলি ৰোপণ কৰাৰ ব্যৱস্থা কৰা হৈছে ।
কিন্ত তাৰ মাজতে এইদৰে বন বিভাগৰ ভূমি অবৈধ ভাৱে দখল কৰি বিভিন্ন ঠাইৰ পৰা অহা লোকে বন বিভাগৰ লোকক বাধা প্ৰদান কৰা বুলি অভিযোগ কৰি বন বিষয়া জনে কয় যে দৰিদ্ৰ ভূমিহীন লোকক বন বিভাগে ঠায়ে ঠায়ে ভূমি প্ৰদান কৰিছে কিন্ত ধনী শ্ৰেণীৰ লোকক ভূমি দিয়াৰ প্ৰশ্নই নুঠে । যিকোনো প্ৰকাৰে জিলাখনৰ নৈ পৰীয়া অঞ্চল সমূহ নৈৰ ভয়াবহ বানপানী আৰু গৰাখহনীয়াৰ পৰা ৰক্ষা কৰা আৰু পৰিৱেশ ৰক্ষাৰ স্বাৰ্থত বনাঞ্চল গঢ়ি তুলিবই লাগিব । এই ক্ষেত্ৰত জনসাধাৰণৰ সহযোগীতাৰ বিশেষ প্ৰয়োজন আছে বুলিও জনায় বন বিষয়া পাতিৰীয়ে ।
আনহাতে, বিটিচিত ৰাজ্যপালৰ শাসন আৰম্ভ হোৱাৰ লগে লগে ৰাজ্যপালে বনাঞ্চল ৰক্ষাৰ বাবে কঠোৰ নিৰ্দেশনা জাৰি কৰাৰ লগতে বিটিচিত দহ লক্ষাধিক গছপুলি ৰোপনৰ বাবে ধৰিত্ৰী নামৰ এক বিশেষ আঁচনিৰ ৰূপায়ণ কৰিছিল ।
অথচ ৰাজ্যপালৰ শাসনৰ এই সময়ছোৱাতে বন বিভাগৰ লোকৰ ওপৰত বনাঞ্চল অবৈধ ভাৱে দখল কৰা লোকে আক্ৰমনৰ ঘটনা সংঘটিত কৰিছে আজি চিৰাঙৰ পাটাবাৰীত। এই ঘটনাৰ পিছতে বন বিভাগৰ লোকে আমগুৰি থানাত এজাহাৰ দাখিল কৰে । আনহাতে, আৰক্ষী প্ৰশাসনে এই সন্দৰ্ভত কি ব্যৱস্থা গ্ৰহণ কৰে সেয়া হ’ব লক্ষ্যণীয় ।
