২৮ ছেপ্টেম্বৰত জোধপুৰ আদালতত বলীউডৰ অভিনেতা ছলমান খানৰ শুনানি

ক’লা হৰিণ বধ কৰাত অভিযুক্ত বলীউডৰ অভিনেতা ছলমান খানক ২৮ ছেপ্টেম্বৰত জোধপুৰ জিলা তথা চেছন ন্যায়ালয়ে উপস্থিত হ’বলৈ আদেশ দিছে ৷ আজি এই বিষয়টোৰ সন্দৰ্ভত শুনানি সম্পূৰ্ণ নোহোৱাৰ কাৰণে ছলমান খানে ২৮ ছেপ্টেম্বৰত আদালতত উপস্থিত হ’ব লাগিব । অৱশ্যে এতিয়ালৈকে জোধপুৰ ন্যায়ালয়লৈ ছলমান যাব নে অন্য বিকল্প ব্যৱস্থা ল’ব সেই সম্পৰ্কত কোনো তথ্য সদৰী কৰা নাই ।

উল্লেখযোগ্য যে ১৯৯৮ ত জোধপুৰত ছলমান খানৰ ছবি” হাম ছাথ ছাথ হ্যে” দৃশ্যগ্ৰহণৰ সময়ত কাংকণী নামৰ গাঁৱত দুটা ক’লা হৰিণ বধ কৰিছিল অভিনেতাগৰাকীয়ে । ইয়াৰ কাৰণে ছলমানক পাঁচ বচৰৰ কাৰাদণ্ড দিয়া হৈছিল যদিও অভিনেতাগৰাকীয়ে জামিন লাভ কৰে ৷ প্ৰায় দুটা দশক ধৰি চলা এই গোচৰত অভিযুক্ত আছিল চেইফ আলি খান, অভিনেত্ৰী নীলম, টাবু আৰু সোনালী ব্ৰেণ্ডে ।